VOV4.Jarai - Lơ 17/9 laih rơgao, ƀơi tơring glông Krông Pač, tơring čar Dak Lak pơphun mông lăi pơthâo kơ bruă ba sĭ mơdrô boh sầu riêng pơ tač rơngiao blung a tui Hră kĭ pơkôl kơplah wah Ding jum ngă hmua hăng pơđĭ kyar ƀon lan Việt Nam hăng Anom bruă wai lăng sĭ mơdrô pơ tač rơngiao dêh čar Khač. Tơlơi anai pok rai tơlơi dưi prong mơng gơnong bruă boh sầu riêng mơng dêh čar Việt Nam sĭ mơdrô lu hloh tui jơlan bah amăng jang ba sĭ mơdrô lu hloh amăng jar kmar.

Rơdêh pơgiăng boh sầu riêng blung a ba sĭ mơdrô pơ tač rơngiao găn nao jơlan amăng jang tui hră kĭ pơkôl kơplah wah Ding jum ngă hmua hăng pơđĭ kyar ƀon lan Việt Nam hăng Anom bruă wai lăng sĭ mơdrô pơ tač rơngiao dêh čar Khač lĕ rơbêh 300 tơ̆n pla pơjing ƀơi tơring čar Dak Lak. Anai lĕ tơring čar hơmâo đang hmua pla boh sầu riêng prong tal dua amăng dêh čar ta (kiăo tui tlôn Tiền Giang) hăng giăm 15.000 ektar, pĕ pơhrui amăng thun 2022 him lăng giăm 170.000 tơ̆n.

Khua ding jum ơi Lê Minh Hoan nao čuă jơmư đang hmua pla boh sầu riêng hơmâo pơsit mrô kual pla pơjing ƀơi tơring glông Krông Pač, Dak Lak.

Ơi Y Giang Gry Niê Knơng, Kơ-iăng Khua Jơnum min mơnuih ƀon sang tơring čar Dak Lak hok mơ-ak brơi thâo, ră anai, tơring čar hơmâo Anom bruă wai lăng sĭ mơdrô pơ tač rơngiao dêh čar Khač tŭ yap 4 mrô adung dưm boh sầu riêng hăng 23 mrô kual pla pơjing (dưm dưm giăm ha mrah mrô kual pla pơjing đơ đam dêh čar hơmâo tŭ yap). Hrŏm hăng tơlơi gir run mơng Ding jum ngă hmua hăng pơđĭ kyar ƀon lan amăng hơdôm tal bơkơtuai, boh than anai pơdah pran gir run prong hloh mơng ƀing mơnuih ngă hmua, anom bơwih ƀong sĭ mơdrô amăng tơring čar:

“Kiăng kơ dưi pơgiăng nao boh sầu riêng blung a sĭ mơdrô pơ tač rơngiao găn nao jơlan amăng jang hơmâo lăi pơthâo amăng hrơi anai, hơdôm kual pla pơjing, anih pơkra dưm amăng adung boh sầu riêng khŏm prap lui hăng găn rơgao lu wŏt pel ĕp mơng anom bruă bơdjơ̆ nao mơng dua boh dêh čar, djơ̆ hăng tơlơi rơkâo mơng bruă pơhlôm hlăt mŏt pơčrăm, pơhlôm gơnam hơdjă, ngă tui djơ̆ hăng tơlơi pơkă amăng bruă dưm amăng adung hăng pơhlôm tong ten anih pla pơjing”.

Đĭ pơhiăp amăng mông ngă lơphet, Khua ding jum ngă hmua hăng pơđĭ kyar ƀon lan ơi Lê Minh Hoan pơsit tong, Hră pơkôl amăng pơhlôm gơnam hiam hơdjă hơmâo kĭ amăng lơ 11/7/2022 kơplah wah Ding jum ngă hmua hăng pơđĭ kyar ƀon lan Việt Nam hăng anom bruă wai lăng sĭ mơdrô pơ tač rơngiao dêh čar Khač lĕ boh than dưi ngă tui tơlơi gir run amăng sui thun mơng anom bruă bơdjơ̆ nao kơplah wah dua boh dêh čar. Hrŏm hăng anun lĕ tơlơi gum hrŏm mơng abih bang mơng anom bruă pơkra pơjing hăng sĭ mơdrô boh sầu riêng Việt Nam.

Rơdêh pơgiăng boh sầu riêng sĭ mơdrô pơ tač rơngiao tui hră kĭ pơkôl blung a mơng Việt Nam

Khua ding jum lăi pơtong, bruă ba sĭ mơdrô boh sầu riêng pơ tač rơngiao tui jơlan amăng jang blung a hơmâo pơphun lĕ tơlơi hok mơ-ak hrŏm mơng mơnuih ƀon sang kual Yŭ Dơnung, Ngŏ dơnung hăng Dap kơdư. Anai lĕ tơlơi yôm phăn yua dêh čar Khač lĕ dêh čar blơi mut boh sầu riêng prong hloh amăng rŏng lŏn tơnah. Hrŏm hăng hơdôm tơlơi dưi ba sĭ mơdrô pơ dêh čar pơprong, djru brơi anom bơwih ƀong sĭ mơdrô hăng mơnuih ngă hmua pơhrui glăi hơmâo hmăi mơng boh sầu riêng, ba sĭ mơdrô lu hloh tui jơlan amăng jang, hăng anai ăt jing tơlơi lông yua hơdôm boh tơhnal amăng hră pơkôl sit nik lĕ rơkâo mă yua boh thâo phrâo amăng pla pơjing, dưm amăng adung hăng ba sĭ mơdrô djơ̆ tơlơi pơkă. Khua ding jum Lê Minh Hoan pơsit tong:

“Amăng hrơi blan mut hrŏm jar kmar hăng ngă hmua mơta, bơwih ƀong pơlir hơbit ră anai, hăng tơlơi pơmĭn “čung nao hrŏm” lĕ tơlơi khŏm ngă. Boh sầu riêng ƀudah phun kyâo boh troh pơkŏn kiăng ba sĭ mơdrô, hơmâo anih anom blơi mut hơđong, abih bang mơnuih kiăng pla pơjing gơnam hơmâo nua mơng anun gum hrŏm, ngă hrŏm kiăng pơđĭ kyar.”

Tui anom bruă wai lăng phun pla, đơ đam đang hmua pla boh sầu riêng amăng dêh čar ta ră anai giăm 90.000 ektar hăng pĕ pơhrui rĭm thun giăm 1 klăk 300 rơbâo tơ̆n, anai lĕ phun pla ƀơi kual Ngŏ dơnung, Dap kơdư hăng kual lŏn dăo Cửu Long. Boh sầu riêng mơng Việt Nam arăng lăng yôm biă mă. Bruă ba sĭ mơdrô lu tui jơlan amăng jang lĕ tơlơi dưi prong hăng boh sầu riêng hăng him lăng amra hơmâo boh than yôm phăn amăng tal bơkơtuai kiăng kơ pok ba sĭ mơdrô gơnam đang hmua pơkŏn mơng Việt Nam pơ anăp anai.

Công Bắc: Čih

Siu Đoan: Pơblang