VOV4.Jarai - Tui hăng Ding jum ngă hmua hăng pơđĭ kyar plơi pla, 4 blan rơgao, prăk pơhrui mơng bruă blơi sĭ gơnam kơ čar rơngiao hăng gơnam mơng hmua, kyâo, akan hơdang hơmâo năng ai 31,8 klai dolar Mi, đĭ 7% pơhmu hăng tơđar; nua sĭ mơdrô gơnam mơng hmua, kyâo, akan hơdang hơmâo giăm 4 klai dolar, đĭ 3.2 wơ̆t pơhmu hăng tơđar thun hlâo. Amăng 4 blan, gơnam mơng hmua ba sĭ hơmâo rơbêh 7 klai 400 klăk dolar Mi, đĭ giăm 10,5%; kyâo hơmâo giăm 5 klai 900 klăk dolar, đĭ 4,9%; akan hơdang hơmâo giăm 3 klai 600 klăk dolar, đĭ 43,7%. Bruă ngă hmua hơmâo laih 5 mơta gơnam, grup gơnam hơmâo pơhrui glăi rơbêh 1 klai dolar kah hăng braih, kơphê, añăm pơtăm boh troh, hơdang, gơnam pơkra mơng kyâo. Sa, dua mơta gơnam hơmâo nua ba sĭ kơ čar rơngiao lu hloh pơhmu hăng tơđar hlâo kah hăng kơphê, kơsu, tiu, hơbơi plum, hơdôm gơnam pơkra mơng hơbơi plum, akan tra, hơdang, kyâo hăng gơnam pơkra mơng kyâo. Hơdôm mơta gơnam hơmâo nua pơmă sĭ kơ čar rơngiao hơmâo če, añăm pơtăm boh troh, boh ñông.

Siu H’Mai: Pơblang