VOV4.Jarai - Ƀơi kual Dap kơdư, samơ̆ ayong Phạm Thế Hùng 25 thun, dŏ ƀơi să Čư̆ Né, tơring glông Krông Ƀuk (Dak Lak) ăt hơmâo tơlơi dưi amăng bruă rông akan Koi Japan. Ră anai ñu hơmâo 3 dơnao rông akan Koi prong hơdôm rơbâo met karê, dưi pơhrui glăi rơbêh 1 klai prăk amăng rĭm thun.

Lăi nao pơphun bruă mă, ayong Phạm Thế Hùng, dŏ ƀơi să Čư̆ Né, tơring glông Krông Ƀuk, brơi thâo, tơdơi kơ hrăm abih anih 12 amăng thun 2015, lui hĭ nao hrăm gưl prong, ñu ruah bruă pơkra rơdêh thut hăng pok sang pơkra rơdêh amăng plơi. Hăng pran hor rông akan Koi Japan, lơ̆m ƀu hơmâo bruă, ñu juăt mut amăng internet pel ĕp kơ bruă rông akan, laih anun ñu sĭ rơdêh thut kiăng kơ blơi djuai akan anai ba glăi rông. Yua blung hlâo aka ƀu thâo, 2 wŏt blơi ba glăi rông blung hlâo lêng kơ djai abih.

Hăng pran gir kơtir, ayong Hùng hơmâo nao tơl dơnao rông akan pơ ƀôn prong Hồ Chí Minh, Đồng Nai … kiăng kơ lăng tui arăng rông. Lơ̆m thâo rơđah, ñu lui hĭ bruă pơkra rơdêh, rơkâo sang anŏ čan 120 klăk prăk tuh pơ alin man pơkra dơnao rông akan Koi. Tal anai, yua kơ gir run, akan rông lêng kơ hơdip truh prong hăng mơboh na nao.

Ră anai rĭm blan ayong Phạm Thế Hùng dưi pơhrui glăi mơng 50-100 klăk prăk mơng bruă rông akan Koi

Ayong Phạm Thế Hùng brơi thâo, kiăng kơ dưi rông akan Koi, kiăng kơ ngă dơnao ia rơngeh hơdjă, anih bư̆ dơnao hăng kơdư ƀiă laih dong phư brơi angĭn pưh nao; biă mă ñu kiăng pơgang kman ƀă akan. Tơdơi kơ hơdôm thun rông, ră anai ñu hơmâo 3 boh dơnao rông akan prong 12.000 m2 ƀơi tơring čar Dak Lak, Kon Tum hăng Lâm Đồng.

“Ră anai kâo sĭ rĭm blan mơng 5 truh pơ 1 tơ̆n akan, tla hĭ prăk tuh pơ alin dŏ glăi mơng 50-100 klăk prăk amăng sa blan. Kâo pơmĭn pơ anăp anai, kâo amra ngă wŏt bruă man pơkra dơnao rông akan Koi ƀơi anăp lan sang hăng ƀơi hơdôm sang mơñum kơphê kiăng kơ tuai dưi lăng akan Koi, tơdah hơmâo mơnuih rơkâo man pơkra dơnao rông akan kâo amra ngă mơtăm yơh kiăng kơ hơmâo dong prăk pơhrui”.

Mơng hơdôm tơlơi dưi anun, ră anai ayong Phạm Thế Hùng ƀu djơ̆ kơnong djru ĕp brơi bruă mă kơ ƀing hlăk ai amăng plơi pla đôč ôh mơ̆ ñu ăt črâo brơi, djru brơi ƀing hlăk ai hrăm tui ñu. Nguyễn An Khánh, dŏ ƀơi plơi Katy 5, să Čư̆ Né, tơring glông Krông Ƀuk, brơi thâo.

“Mă bruă brơi kơ ayong Hùng, kâo hơmâo prăk apah mơng 4-5 klăk prăk amăng sa blan. Kâo tuh pơ alin man pơkra dơnao, bơbung hăng măi pơđoh ia … rơnuč blan 4/2022 anai amra pok dơnao rông akan Koi. ABih tih prăk tuh pơ alin blung a giăm 100 klăk prăk, hăng kâo hơmâo čan prăk amĭ amao giăm 70 klăk prăk, mrô prăk dŏ glăi ayong Hùng brơi kâo čan huăi mă kmlai ôh. Tơdah kơƀah prăk ñu amra brơi djuai akan rông hăng kam brơi akan ƀong, kâo amra tla glăi ƀơƀrư̆ tơdah hơmâo”.

Dơnao rông akan Koi mơng ayong Phạm Thế Hùng hơmâo hăng glăk pơtrut pơsur hlăk ai amăng plơi pla hrăm tui

Tui hăng ayong Võ Minh Cường - Kơ-iăng Khua khul pơlir hơbit hlăk ai Việt Nam tơring glông Krông Ƀuk, rông akan Koi lĕ sa bruă bơwih ƀong phrâo ƀơi kual dưi samơ̆ ăt ba glăi tŭ yua prong prin. Tơlơi anai pơgôp pơtrut pơsur pran pơphun mă bruă thâo pơčeh phrâo mơng hlăk ai amăng plơi pla.

“Grup hlăk ai pơphun bruă mă tơring glông Krông Ƀuk glăk pơjing lu hơbô̆ bruă bơwih ƀong phrâo ƀudah hơmâo dơnao rông akan Koi Dak Lak yua ayong Phạm Thế Hùng djru brơi. Mơng anun, djru pơtô brơi mă bruă hăng črâo ba amăng pơphun bruă mă kơ ƀing ding kơna pơkŏn. Laih dong, ƀing gơmơi amra akŏ pơjing lu grup phrâo lĕ hơdôm anom bơwih ƀong hrŏm hăng hơdôm bruă mă phrâo, hơmâo lu dong bruă mă brơi ƀing hlăk ai ƀơi ƀon lan kah hăng hơmâo prăk pơhrui kiăng kơ djru brơi sang anŏ ƀing hlăk ai”.

Siu Đoan: Pơblang