Anai lĕ bruă mă phun dưi pơdah thâo ƀơi mông jơnum Khua mua pơpha bruă gah anom bruă kơphê rĭm thun thun 2022 yua kơ Anom bruă kơsem min jơlan hơdră hăng bruă mă pơđĭ kyar ngă hmua ngă hrom hăng Anom bruă Pla pơjing, Ding jum Đang hmua hăng pơđĭ kyar plơi pla pơphun lơ 26/10, ƀơi tơring čar Dak Lak. Tơdơi kơ giăm 10 thun ngă bruă, Khul git gai pơpha bruă ngă gah anom bruă kơphê Việt Nam hơmâo djru pơtrut pơblih rŭ glăi đang kơphê tha sui thun mơboh ƀiă, kơnang kơ kơčăo bruă rŭ pla glăi kơphê, ngă hmua hơđong kjăp tui hơdră pla kơphê hiam, pơđĭ rơnoh sĭ mơdrô kơphê pơjeh kơphê hiam jơman.

Bruă ngă hmua pla pơjing kơphê djơ̆ tơhnal pơkă kơphê jơman hloh

Ƀơi mông jơnum, ƀing pơ ala pơtum pơčrông sai, kah pơpha, djru hrom tơlơi pơčeh phrâo pơđĭ kyar kơphê Việt Nam hơđong kjăp pơ anăp adih. Khul khua mua git gai pơpha bruă ngă gah anom bruă kơphê Việt Nam kơnang kơ lu bruă mă amăng thun 2023, pơtum đing nao bruă rŭ glăi pla kơphê hăng pơđĭ kyar pơjeh kơphê jơman hloh pioh ngă tui tơhnal pơtrun truh thun 2025, amra hơmâo 107 rơbâo ha kơphê rŭ pla glăi phrâo hăng 11 rơbâo 500 ha kơphê pơjeh hiam klă jơman hloh pơhrui glăi 5000 tơn.