Hơdôm hrơi anai, sang anô̆ ayong Đinh Công Nhiên hrŏm hăng neh wa amăng plơi glăk mơ-ak yuă prah pơdai ƀơi hmua pơdai plơi Klah, să Ia Mơ, tơring glông Čư̆ Prông, tơring čar Gia Lai. Ayong Đinh Công Nhiên brơi thâo, rơgao hăng anai 2 thun, ƀing apăn bruă đang hmua mơ̆ng tơring glông, să hmâo nao laih pơ̆ plơi pơsur neh wa pơplih ngă hmua pơdai 2 bơyan. Neh wa dưi pơtô brơi mă yua lŏn, rah pơtem, bơwih brơi truh kơ yuă prah. Bơyan pơdai thun anai, Đinh Công Nhiên him lăng amra pơhrui hmâo 5 tơn pơdai, pơhrui hmâo rơbêh kơ 50 klăk prăk.

 “Hlâo adih akă hmâo kueng hnoh lĕ ngă sa bơyan pơdai pơhrua glăi ƀu hmao hăng ngă dua bơyan pơdai ôh, pơdai ngă 2 bơyan hmâo hmăi hloh. Thun anai sa bơyan pơdai dong lĕ bơyan tal 3, rơbêh kơ sa blan dong yuă prah laih. Hơdôm thun hlâo adih ngă sa bơyan djơ̆ anô̆ ñu kơƀah braih huă, ră anai plai ƀiă laih”.

Nao pơ̆ să guai dêh čar ta Ia Mơ hơdôm hrơi anai, tơlơi mă bruă, tơlơi hơdip mơda mơnuih ƀon sang pơplih phrâo. Mơ-ak lơm phun pơdai hmâo lu bôh prăp lui či yuă prah, ayong Siu Toàn ƀơi plơi Klah, să Ia Mơ brơi thâo, Bơyan pơdai thun anai, sang anô̆ pok prong lŏn ngă mơ̆ng 3 ara truh 8 ar hmua pơdai, hrŏm hăng anun pơplih hơdai yua djuai pơjeh pơdai hiam hăng čang rơmang bơyan anai amra djru sang anô̆ pơhrui glăi lu hloh. Ayong Siu Toàn lăi:

 “Hlâo adih akă hmâo hnoh ia anun sang anô̆ kâo ƀu ngă hmua ia, samơ̆ ră anai hmua pơdai hmâo ia laih, yua kơ dưi hmâo kơnuk kơna tuh pơplai pơkra hnoh ia anun neh wa ƀơi anai hơđong pran jua biă amăng bruă ngă đang hmua, kơnong kơ drơi pô kâo ăt khom gir run ngă mơn pioh hmâo asơi huă ao buh, rông ană hrăm hră hăng hơđong tơlơi hơdip mơda sang anô̆”.

Ƀơi hmua pơdai plơi Klah, ơi Nguyễn Tuấn Anh, Kơ-iăng Khua Jơnum min mơnuih ƀôn sang să Ia Mơ hleč đĭ tơkai sum trun amăng hmua pơtô brơi neh wa bơwih brơi kơ phun pơdai. Ơi Nguyễn Tuấn Anh brơi thâo, să ră anai hmâo rơbêh kơ 155 ektar hmua pơdai, kơnong amăng 2 thun rơgao, kơnong kơ plơi Klah hmâo rơbêh kơ 100 ektar pơdai 2 bơyan, sang anô̆ hmâo tơlơi gal dô̆ ngă 3 bơyan dong.

Kơnang kơ pơplih hơdai nao ngă hmua ia, să Ia Mơ hmâo pơsir brơi laih tơlơi asơi huă, mơnuih ƀôn sang ƀu bơngot kơ rơpa. Hăng 5 bôh plơi, mrô mơnuih djuai ania ƀiă hmâo 70%, pơdai hmua ia hmâo djru laih neh wa pơplih tơlơi pơmin amăng bruă ngă đang hmua, mrô sang anô̆ ƀun rin hrŏ trun ƀơƀrư̆ tui hơdôm thun. Ơi Nguyễn Tuấn Anh lăi.

 “Đưm hlâo adih hmua plơi Klah kơnong kơ ngă sa bơyan hăng hluai tui kơ ia hơjan, neh wa tơnap tap biă kơ pơđĭ kyar bơwih ƀong hăng biă ñu lĕ phun pơdai hmua ia. Lơm hmâo hnoh ia pơđoh nao tơl hmua plơi lĕ, pơplih tơlơi pơmin hơdră ngă mơ̆ng neh wa djuai ania amăng pơđĭ kyar bơwih ƀong, hrŏ trun ƀun rin, Bruă anai djơ̆ hăng hơdră pơtrun mơ̆ng Tơlơi crâo ba mrô 08 mơ̆ng Ping gah tơring čar, mơ̆ng anun mrô pơdai đĭ truh 9 tơn pơdai akă čơhmu thu sa ektar. Neh wa ƀuh ba glăi bôh tơhnal mơ̆ng lar hyu djop abih bang plơi pla ala ƀôn, pơplih hơdră ngă hmua hăng mă yua bôh thâo phrâo măi mok amăng ngă đang hmua hăng ngă rai lu pơdai hăng mrô pơhrui glăi đĭ lu neh wa ƀuh ba glăi bôh tŭ yua biă”.

Kiăng pơtrut bruă ngă hmua pơdai ƀơi kual guai dêh čar, tơring glông Čư̆ Prông hmâo laih lu hơdră bruă gum djru. Ơi Đinh Văn Dũng, Khua git gai Ping gah tơring glông Čư̆ Prông, brơi thâo, Tơring glông djru pơjeh, kơmok pruai pioh pơsur neh wa pơplih hơdai nao yua pơjeh pơdai phrâo hiam; pơtô mă yua bôh thâo phrâo măi mok phrâo pioh pơkrem rah hăng hmâo lu pơdai, pơdai hiam rah. Hơdôm tơlơi gir run anai ba glăi laih bôh than lăp pơtrut pơsur.

 “Lăi pơthâo abih kơ hơdôm gưl ping gah, hơdôm gưl hơdôm gơnong bruă pioh pok pơhai pơphun prong hyu djop, kiăo tui djơ̆ tơlơi ngă đang hmua mơ̆ng mơnuih ƀôn sang pioh pơplih hơdră ngă phrâo, djă tơngan črâo bruă amăng bruă ngă pơdai hmua ia”.

Hăng tơlơi pơplih pô kơtang amăng ngă hmua pơdai, mơnuih ƀôn sang plơi Klah, să Ia Mơ hmâo yak rơgao laih tơlơi tơnap, tơlơi rin rơpa pioh čơkă sa tơlơi hơdip mơda phrâo trơi pơđao, jơnap hloh. Hơdôm blah hmua pơdai mơtah hlê̆ ƀu kơnong kơ mrô braih yôm phăn ôh mơ̆ ñu dô̆ jing tơlơi ư-ang, jing anô̆ pơdah brơi ƀuh tơlơi hrưn đĭ mơ̆ng neh wa djuai ania ƀiă kual guai dêh čar./.