Ƀing ơi ia jrao, nai ia jrao mơng sang ia jrao prong Huế glăk pơphun jơlan hơdră djru khăm pơjrao brơi mơnuih ƀôn sang hơdôm să kual ataih, asuek amăng tơring čar Lâm Đồng. Him lăng amra hơmâo giăm 2.000 čô mơnuih arăng khăm pơjrao brơi mơng jơlan hơdră anai. Sit biă ñu, dong mơng lơ 6-10/8, ƀing ơi ia jrao, nai ia jrao amra pơphun khăm pơjrao ƀơi hơdôm boh să Dă Chais hăng Đưng Knớ, tơring glông Lạc Dương hăng să Đông Thanh, Phúc Thọ, tơring glông Lâm Hà. Anai lĕ hơdôm kual ataih, asuek, hơmâo lu mơnuih djuai ania ƀiă dŏ hơdip.

Mơnuih ƀôn sang amra hơmâo arăng khăm hăng črâo brơi bruă bơwih brơi tơlơi suaih pral, ƀơk jrao brơi ƀing mơnuih ruă kă bơdjơ̆ nao tơlơi ruă amăng lăm, tơlơi ruă ƀing čơđai, ruă mơta hăng tơgơi ƀô̆ mơta. Amăng jơlan hơdră khăm pơjrao ƀơi să Đưng Knớ, tơring glông Lạc Dương lơ 7/8, grup hơmâo khăm, ƀơk jrao brơi giăm 500 čô mơnuih. Jao 400 anung gơnam brơi hơdôm sang anŏ tui hơdră djru, sang anŏ ƀun rin, sang anŏ tơnap tap amăng să.