Đĭ pơhiăp amăng mông ngă lơphet, Khua git gai pơ ala mơnuih ƀon sang dêh čar ơi Vương Đình Huệ brơi thâo, ƀơi kual lŏn ATK Việt Bắc, thun 1984, Khua mir sir Hồ Chí Minh iâu pơthưr pơplông khăp kơ lŏn ia hăng pơsur: “Pơplông lĕ bruă khăp kơ lŏn ia, tơdah khăp kơ lŏn ia kiăng pơplông, ƀing mơnuih nao pơplông lĕ ƀing mơnuih khăp kơ lŏn ia hloh”. Găn rơgao 75 thun, tơlơi pơsit anun jing tơlơi pơtrut prong prin mơng tal pơplông khăp kơ lŏn ia kiăng pơđĭ kyar ƀu pơdơi, pơgôp ba glăi tơlơi dưi prong prin, yôm phăn amăng rơnuk pơjing hăng wai pơgang lŏn ia Việt Nam, pơđĭ kyar lŏn ia ta kar ră anai.

Tuyên Quang lĕ tơring čar ba jơlan hlâo đơ đam dêh čar amăng wai pơgang glai rưng hăng pơđĭ kyar bơwih ƀong huă mơng kual glai rưng. Đơ đam lŏn pla glai dưm dưm 76% lŏn glai hơđăp. Tơring čar hơmâo ngă klă bruă kah pha 3 djuai glai kyâo; pok pơhai klă bruă wai pơgang hăng pơđĭ kyar glai rưng; pla phrâo rơbêh 11 rơbâo ektar rĭm thun; pơjing kual glai kyâo pioh trơ̆i mă kyâo hăng giăm 200 rơbâo ektar, kyâo pơtâo ngă hơ-iu dưm dưm rơbêh 65%; wai pơgang glai kyâo, hlô mơnong djop mơta, hơđong kjăp, pơgôp yôm phăn wai lăng hơdôm pơjeh hăng hlô rông amăng dơnao ia; gơgrong bong glăi klă hloh hơjan kơthel, không phang, lŏn tơhlŏm…brơi kơ kual kơdư. Khua git gai pơ ala mơnuih ƀon sang dêh čar ơi Vương Đình Huệ lăi pơtong, thun 2023, Tuyên Quang kiăng ngă tui gru grua plơi pla hơkrŭ hăng hơdôm tơlơi dưi, pơtrut ƀiă dong amăng pơplông khăp kơ lŏn ia, lar hyu tơlơi pơtrut pơsur ƀing apăn bruă, Ping gah hăng mơnuih ƀon sang djop djuai ania gir run ngă tui djop mơta hăng lăp djơ̆ hơnong pơkă, bruă jao ba tơbiă.

“Ƀrô tal anai, kâo rơkâo djop anom bruă gơnong glông, blung hlâo hăng ƀơi anăp lĕ Ding jum ngă hmua hăng pơđĭ kyar ƀon lan djru brơi tơring čar Tuyên Quang pơtrut dong amăng bruă mă yua boh thâo phrâo amăng wai pơgang hăng pơđĭ kyar glai rưng, pơđĭ kyar bơwih ƀong mơng kual glai rưng, pơlir hăng bruă pla glai, wai pơgang glai hrŏm hăng pơđĭ kyar bơwih bơwang amăng glai rưng hăng tuai čuă ngui amăng đang glai, djă pioh gru gru yôm phăn hăng man pơdong plơi pla phrâo”.

Khua git gai pơ ala mơnuih ƀon sang dêh čar rơkâo djop gưl, gơnong bruă pơplih phrâo hăng pơtrut kơtang, ha amăng plĕ, sit nik hăng tŭ yua ƀiă dong tơlơi pơplông khăp kơ lŏn ia pơlir hăng bruă hrăm hăng ngă tui tơlơi pơmĭn, tơlơi hơdip, bruă mă mơng Khua mir sir Hồ Chí Minh; ƀu pơdơi ngă tui pran mut hrŏm, pran kơtang mơng djop anih anom kơđi čar, ha pran sa jua, mut hrŏm mơng abih bang mơnuih ngă tui klă hơdôm tơlơi pơtrun mơng Ping gah, tơlơi pơtrun mơng Khua pơ ala mơnuih ƀon sang dêh čar kơ bruă pơđĭ kyar bơwih ƀong huă -mơnuih mơnam hăng pơhrui ngăn drăp kơnuk kơna thun 2023 kiăng tŭ mă hơdôm tơlơi gal, tơlơi dưi, pơtrut kơtang pơđĭ kyar djop mơta bruă bơwih ƀong huă-mơnuih mơnam, pơhlôm tơlơi hơdip mơda mơnuih mơnam hăng hơnong pơkă akŏ phun lĕ hrưn đĭ tơlơi hơdip djop mơta kơ mơnuih ƀon sang.

Rĭm gơnong bruă, gong gai ƀon lan, rĭm khul grup, anom bruă tŏ tui pơsit tong hăng git gai kjăp hơdôm tal pơplông hăng hơnong pơkă pơplông tong ten, boh tơhnal lăp djơ̆, jơlan hơdră gêh gal kiăng pơhưč abih bang mơnuih, djop hnưr, amăng djop gơnong bruă, anom bruă, ƀon lan, ngă tal pơplông jing tơlơi sit nik amăng tơlơi hơdip rĭm hrơi, jing tơlơi juăt ba glăi tơlơi dưi sit nik; pơtrut bruă pơkrem, gir run pơgang, pơgăn hưp ƀong kông ngăn, yua gơnam khưi khai, ngă soh, pơplih bruă ngă hră pơ-ar; sit biă ñu lĕ ngă klă bruă pel ĕp, pơtô hrăm, pok prong hơbô̆ bruă tŭ yua; pơplih phrâo amăng bruă pơpŭ bơni, pơtrut pơsur hơdôm khul grup, abih bang mơnuih pơgiong klă hloh bruă jao tui hăng pran gơgrong rĭm bruă mă, sit nik pioh hơdor 75 thun hrơi wa Hô iâu pơthưr pơplông khăp kơ lŏn ia (11/6/1948-11/6/2023).

Khua git gai pơ ala mơnuih ƀon sang dêh čar pơsit tong, bơyan bơnga Quý Mão 2023 tŏ tui lĕ “Tết pla kyâo” hơmâo pok phun mơng bơyan bơnga Canh Tý, găn rơgao 63 thun hlâo adih tui tơlơi git gai mơng Khua mir sir Hồ Chí Minh; lĕ tơlơi ƀuăn ngă tui tơlơi rơkâo mơng Khul apăn bruă Ping gah amăng tơlơi pơtrun mrô 13 mơng gơnong glông amăng kơtưn tơlơi git gai mơng Ping gah hăng bruă wai pơgang hăng pơđĭ kyar glai rưng kiăng pơjing bruă bơwih ƀong mơtah, pơđĭ kyar hơđong kjăp:

“Abih bang ngă tui hơdôm bruă akŏ phun, blung hlâo lĕ: Ƀing mơnuih pla glai kyâo kiăng dưi hơdip mơng glai rưng hăng pơdrông asah mơng bruă wai lăng glai, gir run pơplih hơnong pơkă pơjing Tuyên Quang lĕ anih wai lăng glai rưng akŏ phun mă yua boh thâo phrâo hăng anih pơkra pơjing gơnam mơng kyâo ƀơi kual dơnung hăng čư̆ siăng gah Kơdư tui tơlơi rơkâo amăng tơlơi pơtrun mrô 11 mơng Ding jum kơđi čar kơ jơlan gah pơđĭ kyar bơwih ƀong huă-mơnuih mơnam, pơhlôm rơnuk rơnua amăng kual dơnung hăng čư̆ siăng gah Kơdư truh thun 2030, anăp nao truh thun 2045, anai lĕ hơnong pơkă djop mơta”.

Hăng pran hur har phrâo, gir run phrâo, bruă mă phrâo, Khua git gai pơ ala mơnuih ƀon sang dêh čar čang rơmang “Tết pla kyâo pioh hơdor na nao kơ wa Hô” bơyan bơnga Quý Mão thun 2023 amăng tơring čar Tuyên Quang amra ba glăi boh tŭ yua hiam klă, pơgôp pơjing dêh čar Việt Nam mơtah mơda, pơđĭ kyar hơđong kjăp, djơ̆ tơlơi kiăng yôm phăn mơng Khua mir sir Hồ Chí Minh: “Bơyan bơnga lĕ tết pla kyâo/Ngă kơ lŏn ia ta jai hrơi hiam klă’’.