Rơwang hrơi tơjuh rơgao, Grup sem lăng mơ̆ng Jơnum min apăn bruă phun pơ ala mơnuih ƀôn sang dêh čar nao mă bruă hăng jơnum min mơnuih ƀôn sang tơring čar Bình Định kơ bruă ngă tui Hră pơtrun mơ̆ng khua mua pơ ala mơnuih ƀôn sang dêh čar pơblih phrâo hơdră pơtô hrăm, pơblih hơdrôm hră pơđok pioh pơtô hrăm djop gưl. Tui hăng tơlơi lăi pơthâo, tơring čar Bình Định hơmâo ngă giong laih bruă pơtô hrăm glăi kơ ƀing nai pơtô thâo hơdră pơtô hrăm phrâo djop gưl thun 2018 brơi kơ 12.700 čô nai hăng ƀing khua mua apăn bruă wai lăng amăng gơnong bruă pơtô hrăm. Gơnong bruă Pơtô hăng Pơjuăt tơring čar Bình Định pok pơhai in pơkra hră pơar pioh pơtô hrăm hăng in hơdrôm hră djop brơi kơ djop sang bruă mă yua pơtô hrăm tui tơlơi kiăng amăng tơring čar.

Ƀơi mông mă bruă lăi pơthâo hăng Grup sem lăng mơ̆ng Jơnum min apăn bruă phun pơ ala mơnuih ƀôn sang dêh čar, Jơnum min mơnuih ƀôn sang tơring čar Bình Định rơkâo Kơnuk kơna djru brơi soh sel hơdrôm hră hrăm kơ čơđai sang hră kual ataih, mơnuih djuai ƀiă, tơring čư̆ siăng; rơkâo Ding jum Pơtô hăng Pơjuăt tañ pôr pơthâo hơdră pơphun pơplông abih anih 12 mơ̆ng thun hrăm 2024-2025 kiăng tơring čar prăp lui hlâo hmao kru tong ten hloh.

Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn rơkâo tơring čar Bình Định ăt djă hnong boh tơhnal dưi ngă, pơsir hơdôm tơlơi dŏ gun amăng bruă pơtô hrăm mơ̆ Grup sem lăng tal anai pơčrâo brơi; pơtum lu tơlơi kơtang, anŏ gêh găl pioh pơtrut pơđĭ kyar pơtô hrăm, pơblih yua mrô amăng bruă pơtô hrăm:

“Pơđĭ tui boh tŭ yua pơhrăm brơi kơ ƀing nai pơtô hăng khua mua wai lăng djop gưl. Pơtrut bruă mă yua mrô ba tơlơi pơhing hmar, pơgôp hrom amăng bruă ngă tui kơčăo bruă, hơdră dêh čar pơtrun, ĕp djop anŏ gêh găl tơlơi djru mơ̆ng mơnuih mơnam kiăng hơmâo prăk  tuh pơ alin kơ bruă djru kual mơnuih djuai ƀiă, kual tơnap tap amăng bruă pơtô hrăm”.

Grup hyu sem lăng mơ̆ng Jơnum min apăn bruă phun pơ ala mơnuih ƀôn sang dêh čar lăi lĕ, bruă ngă hră pơar git gai, pơtô brơi pok pơhai hơdră pơtô hrăm djop gưl amăng dêh čar mơ̆ng thun 2018 ƀơi tơring čar Bình Định ngă tui tơpă ară, jing atur bruă kơđi čar-tơlơi phiăn pơkă gêh găl kơ djop anom bruă, plơi pla ngă tui.

Hrom hăng bruă mă pok pơhai thun blan rơgao, Kơ-iăng khua git gai pơ ala mơnuih ƀôn sang dêh čar ơi Trần Thanh Mẫn hrom hăng Grup mă bruă mơ̆ng Jơnum min apăn bruă phun pơ ala mơnuih ƀôn sang dêh čar hơmâo mă bruă laih mơ̆n hăng Jơnum min mơnuih ƀôn sang tơring čar Hưng Yên kơ bruă ngă tui Hră pơtrun mơ̆ng khua git gai pơ ala mơnuih ƀôn sang dêh čar kơ hơdră pơblih phrâo pơtô hrăm djop gưl. Khua git gai ping gah tơring čar Hưng Yên, ơi Nguyễn Hữu Nghĩa brơi thâo, tơring čar hlăk đing nao hlâo kơ ruă tuh pơ alin man pơdong brơi gah bruă pơtô hăng pơjuăt, amăng anun man pơdong sang hră, anih hrăm, kiăng ngă djơ̆ anŏ gêh găl kơ abih bang čơđai sang hră hrăm:

“Mơ̆ng akŏ rơwang bruă mơtam, gơmơi hơmâo ngă hră pơtrun mrô 12 kơ Pơđĭ kyar pơtô hăng pơjuăt tơring čar Hưng Yên truh thun 2025 hăng anăp nao truh thun 2030”. Hră pơtrun hơmâo pơthâo bruă mă abih bang, tơhnal pơkă pơđĭ kyar tum teč ƀu kơnong pơsir hơdôm mơta bruă man pơdong hăng pok pơhai ngă tui hơdră pơtô hrăm tui hơdrôm hră phrâo đôč ôh, pơ anăp anai gơmơi pơtum nao 5 mơta bruă phun: Sa lĕ ană mơnuih, biă mă ñu ƀing nai pơtô hăng khul khua mua amăng bruă pơtô hrăm; dua lĕ gơnam yua mă bruă pơtô hrăm; klâo lĕ pơdjơ̆ nao prăk yua mă bruă; pă lĕ pơtrut bruă ngă hrom ană plơi pla hăng 5 lĕ pơdjơ̆ nao bruă gơgrong pơphun pok pơhai ngă tui bruă anai”.

Pơhiăp klah čun amăng mông mă bruă, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn rơkâo, pơ anăp anai, tơring čar Hưng Yên ăt jŭ yap glăi, pơtong lăng bruă pơkă hnong gah bruă pơtô hrăm, pioh sem lăng, pơkă glăi dưi ngă klă hloh anŏ kiăng kơ mơnuih hrăm hăng pơđĭ tui boh tŭ yua pơtô hrăm:

“Pơhưč bruă tuh pơ alin kơ gơnong bruă pơtô pơjuăt, pơtrut kơtang hloh bruă gum hrom mơ̆ng mơnuih ƀôn sang amăng bruă pơtô hrăm. Ră anai hơmâo lu sang hră yua mơnuih ƀôn sang ngă pô, lu nao pơtô gah rơngiao kơ bruă kơnuk kơna ăt ta ƀuh mơak yơh, ta kơnong wai lăng đôč. Pơtrut bruă pơkă gưl bruă, tơlơi dưi, kơtưn jao mơnuih ƀôn sang ngă pô gơgrong ba bruă mă pơtô hrăm amăng sang gơñu ngă pô, laih anun kơtưn bruă hyu sem lăng, pel ĕp pơsir hơdôm tơlơi soh glăi amăng bruă pơtô pơjuăt”.