Tong krah blan 7, Quảng Trị pơ-iă kơtang, Khul tơhan hơđăp gah Trung đoàn tơhan pơnah kơnông 241 hơmâo 160 čô pot glăi tơdron blah wang đưm pioh hơ-ŭ hơdor ƀing gŏp. Ƀơi kơƀang čih pioh mơng Trung đoàn dưm ƀơi pơsat tơhan djai pơsăn drơi jăn tơring glông Hướng Hoá, ƀing tơhan hơđăp đưm hlâo adih hơmâo pioh mông hơ-ŭ hơdor ƀing gŏp hơmâo djai pơsăn drơi jăn amăng wai pơgang, pơklaih rơngai lŏn ia ta. Amăng mrô 400 čô mơnuih apăn bruă, ling tơhan gah Trung đoàn tơhan pơnah kơnông 241 djai pơsă drơi ƀơi tơdron blah wah Quảng Trị, truh ră anai lu per tơlang tơleh ăt dŏ ter hang ia krông, amăng gơ̆p pơtâo, amăng glai rưng. Ơi Nguyễn Hùng Tiến, tơhan hơđăp Trung đoàn 241 brơi thâo: Mơng thun 2013, ƀing tơhan hơđăp Trung đoàn 241 hơmâo gum pơgôp man pơka kơƀang čih pioh ƀơi pơsat dor tơhan djai pơsăn drơi jăn tơring glông Hướng Hoá hăng rĭm thun ƀing tơhan hơđăp mơng anom bruă pơphun nao čuă jơmư pơ kual lŏn hing ang kiăng tŭi ñang hơdor kơ ƀing gŏp:

“Ƀing gơmơi ƀuh tơlơi gơgrong mơng ƀing mơnuih dŏ hơdip yua kơ ƀing gŏp djai pơsăn drơi jăn, ƀing gơmơi ngă hiưm pă kiăng hơdor tơngia kơ ƀing gơñu. Amăng mrô adơi ayong ăt dŏ lu mơnuih aka ƀu ĕp ƀuh ôh, tơlơi anai hning rơngŏt biă mă. Yua anun yơh, kơƀang čih pioh hơmâo man pơkra tui ia hâ̆o ia hang, prăk kak hăng yôm hloh lĕ pran jua mơng ƀing mơnuih dŏ hơdip”.

Rĭm thun ăt tui anun mơn, amăng lơ 27/7, sang anŏ ayong Phạm Việt Phong mơng plơi prong Ninh Bình tui nao pơsat dêh čar Trường Sơn kiăng tŭi ñang pioh hơdor wa ñu lĕ tơhan djai pơsăn drơi Phạm Văn Trọng. Tơhan djai pơsăn drơi Phạm Văn Trọng lĕ tơhan amăng Binh đoàn 559, djai pơsăn drơi jăn ƀơi Quảng Trị thun 1972, lơm ñu 22 thun. Rĭm thun, ayong Phong hrŏm hăng sang anŏ nao pơ Quảng Trị čuă jơmư, tŭi ñang tơhan djai pơsăn drơi, pơdah pran hơdor tơngia hăng ƀing tơhan djai pơsăn drơi:

“Wa ƀing gơmơi djai pơsăn drơi jăn ƀơi Quảng Trị, kâo lĕ ană tơčô ăt lĕ mơnuih wai lăng pơsit wa. Ƀing ta hơmâo tơlơi hơdip tui ră anai hơmâo tơlơi tuh drah pơčah asar djai pơsăn drơi ƀơi Quảng Trị anai. Lơm tui rai pơ anai ƀuh pơsat man pơkra hiam ăt hơđong pran jua. Dơnun wa dŏ đih ƀơi anai, kâo hăng kơnuk kơna amra kiăo tui lăng na nao”.

Hơdôm hrơi anai, ƀơi pơsat tơhan djai pơsăn drơi ƀơi tơring čar Quảng Trị, lu grup khua mua Ping gah hăng Kơnuk kơna hrŏm hăng ƀing mơnuih amăng sang anŏ tơhan djai pơsăn drơi nao tŭi ñang, pơdah pran jua hơdor tơngia hăng ƀing tơhan djai pơsăn drơi yua tơlơi rơngai, rơnuk rơnua lŏn ia. Hơdôm guang bơnga hrŏm hăng ñang pơdah pran jua hơdor bơngăt ƀing mơnuih ba gru amăng lŏn ia. Ơi Nguyễn Duy Tiến, 82 thun, tơhan hơđăp mơng Binh đoàn 559 pot glăi mơng tơdron blah wang đưm Quảng Trị čang rơmang bưp glăi adơi ayong đưm hlâo adih:

“Rĭm wŏt pot glăi tơdron blah wang đưm hlâo adih amăng pran jua kâo ăt hơdor glăi djop mơta. Blung hlâo lĕ bưp glăi adơi ayong, ƀing gŏp dŏ hơdip truh ră anai. Hăng ƀing adơi ayong djai pơsăn drơi, ƀing gơmơi pioh hơdor tơngia. Thun anai, ƀing gơmơi ngă lơphet pioh hơdor. Rĭm wŏt pot glăi tơdron blan wang đưm hlâo amăng pran jua ƀing gơmơi čang rơmang bưp glăi adơi ayong”.

Pơđut blah wang, rơbêh 53.000 čô tơhan djai pơsăn drơi dor ƀơi 72 pơsat anet prong amăng kual lŏn Quảng Trị hing ang. Pioh hơdor tơlơi gum pơgôp prong prin mơng tơhan djai pơsăn drơi, Ping gah hăng Kơnuk kơna lêng kơ đing nao tuh pơ alin dưm dăp, pơkra ming hơdôm boh pơsat dor tơhan. Ră anai, hơdôm boh pơsat jing ring bruă gru grua mơyang, pioh hơdor ƀing tơhan djai pơsăn drơi, kiăng pơtô pơblang gru grua brơi rơnuk hlăk ai. Ơi Lê Nguyên Hồng, Khua gơnong bruă mă, tơhan rơka hăng mơnuih mơnam tơring čar Quảng Trị brơi thâo: Ƀrô lơ 27/7 thun anai, tơring čar Quảng Trị čơkă giăm 15.000 čô mơnuih amăng sang anŏ, tuai čuă ngui, ƀing tơhan hơđăp nao tŭi ñang. Sit biă ñu, dong mơng blan 7 thun 2022 truh ră anai, Jơnum min mơnuih ƀon sang tơring čar Quảng Trị pơphun čơkă lu khul grup nao hơ-ŭ hơdor pơsat tơhan djai pơsăn drơi dêh čar Jơlan mrô 9 hăng pơsat hơdor tơhan dêh čar Trường Sơn amăng mơmŏt mlăm:

“Ƀing gơmơi čơkă lu khul grup rai hơ-ŭ hơdor hăng ƀing gơmơi ƀuh blung hlâo Quảng Trị pơ-iă kơtang, amăng mơmŏt mlăm ăt rơ-ơ̆ mơn. Dua dong lĕ, amăng mơmŏt mlăm amra jê̆ giăm ƀiă, mut nao pơsat ăt ƀuh mơyang mơn hăng lăng hyu ăt hiam mơn. Mơnuih ƀon sang, ling tơhan đơ đam dêh čar nao hơ-ŭ hơdor pơsat Trường Sơn hăng Jơlan mrô 9, hăng ƀing gơmơi ăt hơmâo mơnuih dŏ wai lăng kiăng djru brơi ƀing mơnuih amăng sang anŏ tơhan djai pơsăn drơi nao čuă jơmư”.

Blan 7, lu mơnuih tui nao tơl hơdôm pơsat Trường Sơn, Jơlan mrô 9, Thành Cổ Quảng Trị…tŭi ñang, đông bơnga amăng ia krông Thạch Hãn kiăng pơdah pran jua hơdor tơngia ƀing tơhan djai pơsăn drơi jăn.