Hơdôm hrơi akŏ blan 7, amăng ring bruă dŏ man pơdong sang djru ba sang anŏ hơmâo anăn ngă hơkrŭ ƀơi tơring čar Quảng Ngãi, hmư̆ jua măi tuh ƀêtông, jua tơmut taih, čom, pong, jua măi k’uă kyâo dik dăk mơtam. Ƀing khua mua, mơnuih apăn bruă, ling tơhan blah ngă, kông an hrŏm hăng khul tơdăm dra mut phung laih anun mơnuih ƀôn sang amăng plơi nao djru hrơi bruă, pơtrut hmar bruă man pơdong sang khăp, pap, hơdor tơngia kiăng giong hlâo kơ kơnôl 20/7.

Tơdơi kơ 15 thun pơdong sang anŏ prô̆ ƀong hăng hơdip mơda amăng sa boh sang anet kơniă, phŏ răm tui, amai Lê Thị Kiều, dŏ ƀơi plơi Xuân Trung, să Trà Bồng ăt hơmâo laih sang dŏ prong ƀiă kơjăp hloh. Amai Kiều lĕ ană mơ̆ng sa čô tơhan ruă nuă djơ̆ jrao hret đioxin, ñu pô hai ăt dŏ bơbeč djơ̆ mơ̆ng ia jrao hret ngă mơ̆n, lu thun laih rơgao, tơlơi hơdip mơda amăng sang anŏ tơnap biă mă. Prăk kơnuk kơna djru rim blan ƀu djop ƀong huă hăng hơdip mơda rim hrơi, aka lăi nao ôh man pơkra glăi sang dŏ kiăng pơđao, ƀu khin pơmin nao ôh.

Phrâo anai, sang anŏ amai Lê Thị Kiều dưi hơmâo kơnuk kơna djru 60 klăk prăk mơ̆ng rơnoh prăk lŏm lui sang tơ̆i, sang phŏ kơ sang anŏ hơmâo anăn kơnuk kơna djru. Pơ alin hăng rơnoh prăk pơkom pioh hơdôm thun hăng anai, rơkơi bơnai amai Kiều hơmâo pơdong sang phrâo.

 “Sang phrâo anai mơ̆ng sang anŏ gơmơi hơmâo man giong laih samơ̆ aka ƀu truă bah amăng, aka pơdong sang apui ôh. Gơmơi gir run ĕp prăk dơ̆ng, kiăng djop ngă sa boh sang hlom bom hơmâo sang apui. Sang anai kơnong dua amĭ ană đôč dŏ, gir run kiăng tañ pơkra sang apui hơmâo anih tơnă asơi hơbai añăm, hơmâo anih ană bă hrăm hră. Ră anai hơmâo sang phrâo djơh hăng anai mơak biă mă”.

Sang mơ̆ng ơi Hồ Văn Ngoạt dŏ ƀơi plơi Trà Hiệp, să Thanh Bồng, ăt hlăk man pơdong hmar tañ giong. Ơi Ngọat lĕ ană đah rơkơi sa čô tơhan hơkrŭ, dŏ ƀơi tơdron blah djơ̆ jrao hret. Lu thun laih rơgao, sang anŏ dŏ amăng sang tơ̆i, sang răm, sit bơyan rơbŭ kơthel hơjan hlim hŭi biă mă sang dlưh ƀu kơjăp. Dưi hơmâo kơnuk kơna djru 60 klăk prăk, ơi Hồ Văn Ngoạt čan dơ̆ng 200 klăk prăk, pioh man pơdong sang hiam klă, kơjăp ƀiă:

“Hlâo adih sang gơmơi tơ̆i răm, phŏ abih laih. Ră anai, kơnuk kơna djru 60 klăk prăk, sang anŏ čan dơ̆ng prăk pioh pơdong sang, hơmâo anih dŏ hơđong. Ră anai, ăt hơmâo sang laih bơni kơ kơnuk kơna hơmâo djru. Dưi hơmâo sang hiam klă, rô̆ răi djơh hăng sang anŏ gơmơi mơak biă mă”.

Ƀơi să Thanh Bồng, hơmâo 4 boh sang anŏ hơmâo anăn kơnuk kơna djru brơi pơdong sang lŏm lui sang tơ̆i, sang phŏ. Pơphun man pơdong mơ̆ng blan 5/2026, truh ră anai abih 4 boh sang ngă giong năng ai 70% rơnoh jao. Kiăng dưi hmao hăng hrơi jao hlâo truh kơnôl 20/7 tui hăng tơlơi pơtrun mơ̆ng khua mua tơring čar Quảng Ngãi, plơi pla hơmâo akŏ pơjing khul djru ba, jak iâu ƀing tơhan kông an, ling tơhan amăng să, khul mơnuih mơnam mut phung, khul hlăk ai tơdăm dra laih anun mơnuih ƀôn sang nao djru hrŏm hruh brơi sang, pơdŭ đuăi gơnam, pơgiăng nao pơtâo čuah, simăng mă bruă, djru man pơdong hrŏm. Hơdôm hrơi anai, hơmâo ƀing tơdăm dra mut phung djru laih anun hơmâo lu sang anŏ ieo gah gum hrŏm man pơdong plai ƀiă huăč prăk apah.

Ơi Hồ Thanh Trường, Kơ-iăng Khua Jơnum min mơnuih ƀôn sang să Thanh Bồng, tơring čar Quảng Ngãi brơi thâo, abih bang djop sang anŏ dưi djru lêng kơ sang anŏ tơnap tap soh. Tơring čar, plơi pla hơmâo jak iâu djru hrŏm mơ̆ng bruă koh kyâo keo kyâo mi hăng sĭ hlô mơnong rông, pơkom prăk pơdong sang; iâu pơthưr ƀing apăn bruă kơnuk kơna djru ba rah, laih anun jak iâu ƀing ngă bruă mơdrô hơmâo pran jua čơmah pơčruh hrŏm Keh prăk djru mơnuih ƀun rin, kiăng kơ hơdôm sang anŏ kơƀah prăk dưi djop prăk man pơdong sang hiam rô̆, kơjăp hloh, rơnuk rơnua hơđong:

“Jơnum min mơnuih ƀôn sang să Thanh Bồng pơpha bruă mă kơ ƀing tơhan kông an, tơhan să ngă hrŏm djop khul grup mơnuih mơnam amăng plơi pla, biă mă hơdôm sang anŏ ieo gah djru hrŏm man pơdong sang kơ sang anŏ tơnap tap, kah hăng djru ruh brơi sang, pơdŭ  đuăi drưp drap sang hơđăp, pơgiăng nao boh pơtâo, čuah, ƀrik man sang, wơ̆t simăng djru pơdăp brơi, klơi luh pơdong tơmeh…kiăng pơtrut hmar hloh bruă man pơdong sang tui tơlơi pơčrâo ba mơ̆ng khua mua tơring čar, ngă giong hlâo kơ kơnôl 20/7/2026”.

Blan 3/2026, Khua dêh čar tŭ ư hrŏm jơlan hơdră man pơdong, lŏm lui sang tơ̆i, sang phŏ kơ ƀing ană bă tơhan djơ̆ jrao hret rơnuk blah ngă đưm, hlăk ngă tơhan hơkrŭ hăng rơnoh prăk dŏ rơbêh mơ̆ng Keh prăk djru mơnuih ƀun rin dêh čar djă pioh. Giong kơ anun mơtam, Jơnum min mơnuih ƀôn sang tơring čar Quảng Ngãi ngă hră pơtrun, dăp bruă, brơi djop să, plơi pla jŭ yap glăi, pok pơhai kiăng tơgŭ ngă bruă, man pơdong brơi sang djru anai khom giong hlâo kơ kơnôl 20/7/2026.

Tơring čar Quảng Ngãi hơmâo 157 čô jing ană bă ƀing tơhan nmgă hơkrŭ dŏ ƀơi tơdron blah djơ̆ jrao hret ƀơi 51 boh să, phường, gong gai phara, hơmâo mơnuih kiăng djru ba man pơdong sang. Khua tơhan tơring čar Quảng Ngãi akŏ pơjing 74 grup hăng 727 čô mơnuih apăn bruă, ling tơhan djru man pơdong sang. Gơnong bruă Man pơdong ăt ngă hră kač rup pơdong sang, kiăng sang dưi kơjăp djơ̆ găl hăng kual plơi pla. Ƀu kơnong djru sang dŏ đôč ôh, lu plơi pla amăng tơring čar Quảng Ngãi dŏ pơgôp hrŏm bruă djru prăk mơ̆ng mơta tơlơi kah hăng djru ba pơjeh phun pla, djuai hlô mơnong rông, ngă gêh găl djru brơi mơnuih ƀôn sang dưi čan prăk kơmlai ƀiă mơ̆ng dêh čar djru kiăng pơđĭ kyar tơlơi bơwih ƀong huă, hơđong tơlơi hơdip mơda.