Jơlan hơdră bơkơtuai hăng hơdôm gru rơđah hmâo bôh than ƀuh rơđah amăng abih bang mơnuih ƀon sang hrăm hăng ngă tui tơlơi pơmin, pran jua, kơnuih Hồ Chí Minh; khom kơdŏng glăi tơlơi ngă mă ha jăn ƀu klă amăng rơnuk phrâo.

Hơdôm tơlơi ruai sit nik kơ pran jua tuh rơyuh drơi pô, hor pơčeh yua kơ mơnuih ƀôn sang, yua kơ bruă pơgang lŏn ia, yua kơ bruă mă jar kơmar yôm phăn mơ̆ng ƀing ling tơhan hmâo pơdah glăi laih tui hơdôm tơlơi čih, hơdôm črăn hơdră adôh suang hăng hơdôm tơlơi lăi pơthâo nao rai ƀơi anăp ƀơi jơlan hơdră djru mơnuih ƀôn sang thâo hluh hloh kơ kơnuih Ling tơhan Wa Hồ; mơ̆ng anun lar hyu hơdôm hơdră phrâo, hơdră ngă klă, pơčeh phrâo, ba glăi bôh tơhnal amăng abih bang ling tơhan.

Sa amăng mrô hơdôm rơtuh gru rơđah anun lĕ Thượng úy Nguyễn Tuấn Anh, Sang bruă Pơgang hơđong plăng internet, Viettel, mơnuih hmâo hor kơ bruă kơsem min, hơduah ĕp hmâo lăi pơthâo glăi amăng đơ đam rŏng lŏn tơnah rơbêh kơ 600 jơlan tlaih lui hong gah pơgang hơgom, djru hơdôm khul grŭp sang bruă prong, dưi bĕ tơlơi lui ruh prong gah prăk kak. Thượng úy Nguyễn Tuấn Anh lăi pơthâo:

 “Bruă mă phun mơ̆ng ƀing gơmơi lĕ gum hrŏm grŭp redteam hmâo bruă mă kah hăng hacker pioh hơduah ĕp hơdôm jơlan lui lơi soh anô̆ pơgang hơgom prong mơ̆ng gah rơngiao hăng amăng lăm glông bruă mơ̆ng hơdôm bôh anom bơwih ƀong, khul, hăng mơ̆ng anun ĕp tơbiă hơdôm jơlan pơsir pioh hơkrŭ glăi hơdôm jơlan lui lơi hong. Kâo hăng ƀing gŏp kâo rơngiao kơ hor hăng bruă mă, ăt khom gir run na nao mơn ƀu pơdơi yak rơgao djŏp tơlơi pơkă pioh pơsir ngă pô măi mok, djru pơgang mơnuih ƀôn sang, Lŏn ia ƀơi glông plăng internet”.

Jơlan hơdră dô̆ hmâo tơlơi gum hrŏm mơ̆ng mơnuih ƀôn sang lĕ neh wa djuai ania ƀiă, abih bang sang hmâo 5 čô mơnuih ƀong djơ̆ bơmao măt amăng tơlơi ruă măt kraih, lơm anun jơlan nao pơ̆ sang ia jrao ataih đơi. Ƀơi anăp tơlơi anun, ơi ia jrao ling tơhan hmâo djop tơhnal, abih pran jua djru pơtlaih hơdip kơ abih bang sang anô̆. Mơnuih ƀôn sang anun hmâo ba abih pran jua tơpă sit hăng thâo tơngia klă hiam gum djru ƀơi jơlan hơdră:

 “Kâo bơni kơ ơi ia jrao lu biă, kơnang kơ hmâo ơi ia jrao mơ̆ abih bang sang kâo tlaih djai, truh ră anai suaih pral laih. Truh hăng jơlan hơdră hrơi anai sang anô̆ kâo hmâo gơnam kiăng mơ-ĭt brơi kơ ơi ia jrao. Kâo hăng sang anô̆ kâo brơi ơi ia jrao hăng kiăng lăi lĕ sang anô̆ kâo mơ̆ng ră anai dưi thâo krăn hơƀơi bơmao măt, hơƀơi bơmao huăi măt".

Hăng mrô mông 90 mơnit, jơlan hơdră pơdah rŭp ƀơi anăp Bơkơtuai ngă gru rơđah “Bơngač rơđah kơnuih Ling tơhan Wa Hồ" jing tơlơi pơkĕ hrŏm mơ̆ng hơdôm tơlơi ruai sit nik mơ̆ng mơnuih bơkơtuai, amăng anun hmâo hơdôm tơlơi ră ruai tal blung a dưi lăi pơthâo, hrŏm hăng hơdôm tơlơi čih lăi kơ lu tơlơi rơđah phrâo, ngă pơhưč, pơjing pran pơsôh kơ mơnuih hmư̆ lăng, plah nao rai lu črăn tơlơi adôh suang hmâo dăp hơdră pơjing tơnap, phara, pơkĕ hrŏm tơlơi pôr lăi pơthâo jơlan hơdră; rơgao kơ anun, djru mơnuih lăng hmư̆ thâo hluh rơđah hloh kơ kơnuih Ling tơhan Wa Hồ; djru lar hyu hơdôm hơdră phrâo, hơdră ngă pơčeh phrâo, ba glăi bôh tơhnal amăng abih bang ling tơhan.

Ding kơna Ding jum kơđi čar, Khua Grŭp pơtô bruă Ping gah dêh čar Nguyễn Trọng Nghĩa brơi thâo, mơ̆ng thun 2021, Ping gah ling tơhan dêh čar ta hmâo mă yua Tơlơi pơtrun pơsit kơ ngă tui pran jua Ling tơhan Wa Hồ, khom pơgăn ngă ha jăn ƀu klă amăng rơnuk phrâo. Mơ̆ng tơlơi črâo ba anun, truh ră anai khul ling tơhan mơ̆ng ƀing ta prong kơtang abih bang, yap wot bruă pơhrăm, bruă prăp lui kơdŏng blah, mă bruă ngă đang hmua. Bruă apăn mơ̆ng khul ling tơhan hyu mă bruă hăng iă ñu lĕ kơnuih Ling tơhan Wa Hồ  jai hrơi jai dưi lông, jai hrơi jai dưi ngă bơngač amăng abih bang hơdôm bruă yap wot amăng bruă pơgang tơlơi dưi pô, ăt kah hăng pơgang pơgăn ayuh hyiăng ngă, klin ruă. Hăng Khul ling tơhan amra pơsăn drơi pioh pơgang tơlơi yâo mơ-ak, tơlơi suaih pral kơ mơnuih ƀôn sang. Tơdah pơtŏng sit hă djơ̆ mơn, Tơlơi pơtrun pơsit mơ̆ng Ping gah Khul ling tơhan dêh čar ta gah ngă tui pran jua Ling tơhan Wa Hồ, khom kơdŏng glăi tơlơi ngă mă ha jăn ƀu klă amăng rơnuk phrâo jing Tơlơi pơtrun pơsit yôm phăn, kiăng hloh, djru pơdŏng Khul ling tơhan kơjăp phik gah bruă kơđi čar, pơđĭ dlông anô̆ klă ruah mă, pran kơtang kơdŏng blah, ngă giong klă djop bruă hmâo jao./.