Dŏ amăng sang ƀơi ƀuôn Ea Rông, să Krông Na, tơring glông Buôn Đôn, tơring čar Dak Lak, amon H’Hải Niê Kdăm, hrăm anih 7A, sang hră gưl dua Võ Thị Sáu glăk gir run hrăm hră, hăng tơlơi čang rơmang tơdơi anai amra jing nai pơtô. Ñu rơngiă ama mơng 2 thun, sang anŏ tơnap tap, amĭ ñu dju djuam duam ruă. Ƀuh sang anŏ ñu tơnap tap, thun 2019, puih tơhan wai pơgang guai Sêrêpôk djru rông ba H’Hải tui jơlan hơdră “Čung ba čơđai nao sang hră”. Hrŏm hăng tơlơi gum djru rĭm blan 500 rơbâo prăk, ƀing apăn bruă, ling tơhan ƀơi puih tơhan Sêrêpôk ăt hơmâo nao tơña bla, pơ alum pran jua hăng git gai ƀing čơđai hrăm hră. Thâo hluh rơđah tơlơi tơnap tap mơng sang anŏ hăng ƀuh pran khăp pap mơng ƀing met wa ƀơi puih tơhan, H’Hải lêng kơ gir run hrăm hră rơgơi:

“Ƀingmet wa ƀơi puih tơhan djru brơi ƀing gơmơi lu biă mă, kâo bơni biă mă lơ̆m hơmâo mơnuih djru čung ba ƀing gơmơi nao sang hră hăng hơmâo ƀing anong met wa pơtô brơi amăng hơdôm tơlơi hrăm”.

Ăt rơngiă ama hăng sang anŏ tơnap tap biă mă, amon Hà Duy Khánh dŏ ƀơi ƀuôn Đừng Nhạp, să giăm guai Ia Lốp, tơring glông Ea Sup hơmâo ling tơhan wah pơgang guai Ea H’Leo djru čung ba nao sang hră. Amai Lò Thị Loan, amĭ Khánh brơi thâo, tơlơi đing nao gum djru mơng ling tơhan ngă ñu hok mơ-ak biă mă, tơlơi tơlơi pơtrut pơsur pran jua prong prin mơng sang anŏ:

“Ling tơhan wai pơgang guai hơmâo djru brơi kơ kâo 500 rơbâo prăk amăng ha blan, ƀơk brơi wŏt anun gơnam, hră, gơnam yua, laih dong nao tơl rĭm boh sang anŏ tơña bla, pơ alum pran jua, đing nao, črâo ba ƀing čơđai hrăm hră. Amăng hrơi blan laih rơgao ƀing čơđai lêng kơ gir kơtir hrăm hră”.

Trung úy Hà Văn Tân, mơnuih apăn bruă amăng grup hyu pơtô pơblang mơng pui tơhan wai pơgang guai Ea H’Leo lĕ sa amăng ƀing mơnuih apăn bruă djru ngă tui bruă jao “Čung ba ƀing čơđai nao sang hră” hăng “ană rông mơng puih tơhan”. Ñu brơi thâo, ƀing čơđai hơmâo djru ba lĕ ƀing čơđai drit druai, ƀing gơñu kơƀah djop mơta amăng tơlơi hơdip mơda. Yua anun, ƀing gơñu pơsit tong ƀu djơ̆ kơnong djru brơi prăk kak đôč ôh mơ̆ ngă hiưm pă kiăng jao pran khăp pap, djru brơi ƀing čơđai hrưn đĭ amăng tơlơi hơdip:

“Ayong adơi ƀơi puih tơhan juăt nao tơña blan, črâo ba ƀing čơđai hrăm hră. Mơng hrơi blan ngă tui jơlan hơdră ƀing čơđai lêng kơ pơdah pran hrưn đĭ hăng gir run hrăm hră rơgơi”.

Pok pơhai jơlan hơdră “Čung ba ƀing čơđai nao sang hră” hăng hơbô̆ bruă “Ană rông ƀơi puih tơhan”, mơng thun 2014 truh ră anai, Ling tơhan wai pơgang guai tơring čar Dak Lak hơmâo rông ba giăm 250 čô čơđai. Hrŏm hăng rơnoh prăk djru rĭm blan lĕ 500 rơbâo prăk, hơdôm anom bruă wai pơgang guai ăt hơmâo lu jơlan hơdră jao prăk djru hrăm hră, hơdôm anung gơnam hơmâo nua djru brơi ƀing čơđai hơđong pran jua hrăm hră. Thiếu tá Vũ Văn Dương, mơnuih apăn bruă ƀơi puih tơhan wai pơgang guai Ea H’Leo lăi pơthâo kơ bruă pok pơhai jơlan hơdră anai:

“Ngă tui tơlơi git gai mơng Ping gah, anom bruă git gai tơhan wai pơgang guai tơring čar, anom bruă hơmâo gum hrŏm hăng djop gưl, gong gai ƀon lan hăng hơdôm boh sang hră laih dong sang anŏ ƀing čơđai amăng să Ia Lốp nao pel ĕp, ruah mă ƀing čơđai sang anŏ tơnap tap hloh kiăng kơ djru ba. Truh ră anai, anom bruă hơmâo gum djru brơi 50 čô čơđai. Gah ƀon lan lêng kơ tŭ ư, dong yua, bơ hơdôm boh sang hră hăng sang anŏ čơđai hok mơ-ak biă mă”.

Hăng tơlơi gum djru mơng ling tơhan, lu čơđai ƀơi kual giăm guai tơring čar Dak Lak hơmâo ngă hăng glăk čung ba ƀing čơđai nao sang hră, găn rơgao tơnap tap kiăng tơdơi anai jing ƀing mơnuih thâo mă bruă gum pơgôp brơi plơi pla lŏn ia.