Amĭ Việt Nam khin hơtai juăt lăi amĭ VN sông kơtang, yă Nguyễn Thị Khả dŏ pơ plơi La Bông, să Hòa Tiến, tơring glông Hòa Vang, ƀôn prong Đà Nẵng hơmâo rơkơi ñu hăng ană lêng kơ djai pơsăn drơi jăn yua kơ lŏn ia. Thun 1968, rơkơi yă anăn Võ Văn Cảnh, djai pơsăn drơi lơ̆m hlăk nao mă bruă pơ tơring glông Nông Sơn, tơring čar Quảng Nam. Truh thun 1978, ană đah rơkơi ñu dơ̆ng anăn Võ Văn Bình lơ̆m nao mă bruă djru jar kmar ăt djai pơsăn drơi pơ dêh čar Kur. Thun anai 84 thun,  yă Nguyễn Thị Khả ƀơi anŏ hơdor, suăng ƀơi anŏ ƀu thâo krăn hlơi ôh. Prăp lui hơdor glăi hrơi pioh kơ tơhan djai pơsăn drơi jăn kơ lŏn ia hăng tơhan rơka rơkač lơ 27/7, djop gưl anom bruă, gong gai kơnuk kơna nao čuă, yă Khả mơak pran jua hăng lăi:

“Ană rơkơi djai abih rơngôt biă mă, samơ̆ yua hơmâo Ping gah kơnuk kơna djru sang anŏ kâo plai ƀiă mơ̆n tơlơi hyiăl amăl hning rơngôt. Lơ 27/7 rĭm thun dưi hơmâo Khul đah kơmơi mut phung hăng gong gai kơnuk kơna rai čuă jơmư trư găn. Kâo ƀuh kơnuk kơna đing rai sang anŏ mơak yơh”.

Hơdôm hrơi hăng anai, sang anŏ ơi Ngô Văn Hồng, dŏ pơ să Hòa Bắc, tơring glông Hòa Vang, ƀôn prong Đà Nẵng hok mơak lơ̆m dưi glăi dŏ pơ sang phrâo pơdong. Thun 1966, ơi Hồng nao ngă tơhan dŏ amăng glai hơkrŭ kơ lŏn ia ta, blah ayăt, ayăt pơnah ñu djơ̆ boh phao rơka hĭ. Ră anaim ñu arăng yap tơhan rơka 4/4. Sang anŏ tơnap tap biă mă, sang anŏ pơmin nao kơ bruă dưi ngă sang phrâo ôh. Akŏ thun anai, ơi Ngô Văn Hồng, dưi hơmâo gong gai kơnuk kơna ƀôn prong Đà Nẵng djru 60 klăk prăk, ñu čan prăk gah rơngiao dơ̆ng, anun pơdong sang kjăp hloh:

“Kâo lĕ tơhan rơka rơkač djơ̆ boh phao, Kơnuk kơna djru mơ̆n prăk rĭm blan. Phrâo anai, kơnuk kơna sang anŏ gơmơi pơdong sang, tơlơi hơdip mơda kâo mơ̆n, mơ̆ng anai pơ anăp huăi hŭi kơ hơjan angin dơ̆ng tah sang phrâo kjăp laih”.

Ƀôn prong Đà Nẵng ră anai hơmâo rơbêh 100.000 čô mơnuih ngă hơkrŭ djru bruă čar. Mơ̆ng rơnoh prăk dêh čar, prăk ƀôn prong, ƀing pơdrong čơmah djru, sang bruă sĭ mơdrô pơčruh hrŏm, truh ră anai, ƀôn prong anai hơmâo pơdong phrâo hăng ming pơkra glăi rơbêh 10.000 boh sang brơi kơ mơnuih hơkrŭ kơ lŏn ia, rơnoh prăk abih tih 330 klai prăk.

Ơi Lê Văn Minh, Kơ-iăng Khua Gơnong bruă wai lăng Bruă mă Tơhan rơka hăng Mơnuih mơnam ƀôn prong Đà Nẵng brơi thâo: hlâo adih, rơnoh djru man pơdong sang hơdor tơngia mơ̆ng 30-40 klăk prăk thun anai đĭ truh 60 klăk prăk sa boh sang, dưi hơmâo sang dŏ arăng djru abih bang 100 klăk, man pơdong sang kjăp, hơđong amăng bơyan rơbŭ kơthel:

"Jơlan hơdră djru sang anŏ hơmâo ngă bruă hơkrŭ tơnap tap, biă mă ñu sang anŏ ƀun rin, ƀôn prong đing nao hăng git gai djop anom bruă djru ba hơdôm sang anŏ tơnap tap hloh. Ngă hiư̆m pă tơlơi hơdip ƀing gơñu boh ƀiă bơkơnar hăng sang anŏ ieo gah ƀudah hloh kơ sang anŏ ieo gah amăng plơi pla. Ƀôn prong pơtong lăng ngă tui tơlơi pơčrâo ba mơ̆ng Gơnong dlông kiăng pơđĭ tui rơnoh djru. Bruă đing nao djru ba pơkra ming sang dŏ kơ sang anŏ hơmâo ngă bruă hơkrŭ sa bruă mă yôm pơphăn biă mă, ngă gêh găl kơ mơnuih hơmâo djru kơ dêh čar dưi hơmâo sang dŏ hiam rơgoh hăng kjăp hiam klă.