Dưi hơmâo tui anun, hrŏm hăng tơlơi lăng tuh pơ alin mơng Ping gah hăng Kơnuk kơna, tơlơi pơmin nao hlâo ba jơlan mơng rim čô mơnuih ping gah pơ anai. 2 thun laih rơgao, đang pla phun kơbuă prang prong giăm 1.000m2 mơng sang anŏ mơnuih ping gah Cil Pam Ka Duyên, ƀơi plơi Dạ Tro, să Dạ Nhim, tơring glông Lạc Dương (lâm Đồng) jing anih hmư̆ hing ngă hơbô̆ bruă phrâo brơi ană plơi sem lăng, hla tui. Ping gah Cil Pam Ka Duyên brơi thâo, hơmâo mơnuih biă, bruă biă kah bruă pơtô lăi, iâu pơthưr ngă tui tơlơi pơtrun mơng Ping gah, tơlơi phiăn mơng Kơnuk kơna mơng klă, neh met wa mơng hla tui.

“Mơng hrơi mut amăng ping gah, kâo thâo rơđah hloh kơ hơdôm jơlan hơdră djru mơng ping gah tơlơi phiăn mơng Kơnuk kơna. Yua hnun kâo mơng thâo ngă klă bruă hơmâo Ping gah, gong gai jao. Mơng anun, kâo djru brơi ană plơi lu hloh mơn. Biă ñu, iâu pơthưr neh met wa pơplih djuai phun pla, gir pla phun pĕ pơhrui ƀiă hrơi či pơđĭ kyar bơwih ƀong huă amăng sang anŏ. Ră anai tơlơi hơdip neh met wa djuai ƀiă ƀơi anai plai ƀiă laih tơnap tap pơhmu hăng mơng hlâo”.

Ƀu kơnong mơnuih ping gah Cil Pam Ka Duyên đôč ôh, lu mơnuih ping gah pơkŏn lĕ mơnuih djuai ƀiă mơng să Dạ Nhim ăt thâo rơđah mơn tơlơi gơgrong bruă mơng gơñu, nao hlâo amăng djŏp bruă. Amăng anun, khŏm yap nao bruă pơplih phrâo phun pla, djru nao rai pơđĭ kyar tơlơi bơwih ƀong, djru hrơi mă bruă, djuai phun pla, boh thâo ngă hmua...Yua hnun mơn, bruă ngă hmua mơng Dạ Nhim hơmâo pla lu djuai phun, amăng ƀrư̆ ngă hmua kiăo tui hră rơkâo blơi gơnam, pơđĭ tui nua gơnam. Mơng bruă pla kơnong phun kơphê đôč, ră anai Dạ Nhim hơmâo pla 16 ha phun jrao Atisô, 6ha phun kơbuă prang, 40 ha bơnga čơkăp than, 300 ha añăm hla rok, rơtă djŏp djuai hăng rơbêh 330 ha đang boh troh. Mrô sang anŏ rin ăt trun mơn, ră anai dŏ glăi kơnong kơ 7% đôč tui hăng hơnong pơkă phrâo. mơnuih ping gah Cil Pam Ka Phương, Khua plơi Đarahoa, să Dạ Nhim, brơi thâo:

“Ƀing gơmơi iâu pơthưr neh met wa djŏp djuai ania ƀiă amăng plơi gir pơđĭ kyar bơwih ƀong huă - mơnuih mơnam. mơng hlâo adoh ană plơi juăt pla kơphê yơh, ră anai jak iâu pla phun pơkŏn dong kiăo tui arăng kiăng blơi kah hăng anăm hla rok, trong, rơtă djŏp djuai či pơđĭ kyar hloh”.

Ping gah să dạ Nhim hơmâo abih bang 122 čô mơnuih ping gah, jơnum ƀơi 10 grup ping gah, amăng anun ping gah mơnuih djuai ƀiă hơmâo 52%. Tui hăng ơi Kon Sơ Ha Vương, Khua Jơnum min djŏp djuai ania mơnuih mơnam Việt Nam să Dạ Nhim, hrŏm hăng bơwih ƀong, tơlơi gơgrong nao hlâo, ba jơlan mơng rim čô ping gah hơmâo pơtrut ngă amăng rim bruă mă, biă ñu lĕ man pơdong plơi pla phrâo, pơhrŏ trun sang anŏ rin, gum pơgôp djuai ania, akŏ pơdong anom bruă kơđi čar kơjăp kơtang:

“Ngă tyui tơlơi git gai mơng Ping gah hăng tơlơi phiăn mơng Kơnuk kơna, hrơi blan rơgao, Ping gah, gong gai hơmâo pơtô pơblang kiăng neh met wa ngă tui klă jơlan hơdră man pơdong plơi pla phrâo. Hăng hơdră ngă bruă kơnuk kơna hăng mơnuih ƀon sang gum ngă, lu ring bruă jơlan nao rai, tơdrông toa, amăng bưng pơđoh ia hơmâo man pơkra kơjăp. Hrŏm hăng tơlơi bơwih ƀong hơđong, tơlơi hơdip mơta hăng pran jua mơng ană plơi hơmâo pơplih klă tui hloh mơn”.

Pơtrut tui tơlơi gơgrong bruă mơng mơnuih ping gah djuai ania ƀiă, ngă tŭ yua hơdôm jơlan hơdră yua să iâu pơthưr, tơlơi bơwih ƀong huă mơnuih mơnam să Dạ Nhim pơplih rơđah biă, jai hrơi đĭ kyar hloh dong./.