Mơng tơlơi pơplih ƀơi plơi guai dêh čar Nậm Sò, să Bản Phiệt, tơring glông Bảo Thắng, tơring čar Lào Cai hmâo gru pơđom pioh mơng đah kơmơi ping gah Đặng Thị Dẩn – pô ba jơlan hlâo pok đang hmua, ba jơlan tơtlaih ƀun rin kơ kual lŏn anai. Yă Dẩn pơmin: hrăm hăng ngă tui Wa nao hrom hăng bruă pơđĭ kyar bơwih ƀong ƀơi plơi pla, djru mơnuih ƀôn sang hrŏ trun ƀun rin lĕ bruă mă sit nik hloh.

Ƀrô krep 20 thun hlâo adih, yă Đặng Thị Dẩn lĕ sa amăng hơdôm bôh sang anô̆ blung a ba jơlan hlâo kual lŏn Nậm Sò tui hơdră pơtrun rit đuăi mơnuih ƀôn sang nao pơ̆ guai dêh čar. Hrơi anun, ƀơi anai ăt lĕ sa ruăi lŏn lui lơi hong, jơlan nao rai tơnap, kơƀah lŏn ngă đang hmua. Phiăn juăt, bruă ngă đang hmua sô hơđăp ngă rơmon rơpa ƀu tlaih, kiăo tui na nao rim sang anô̆ djuai ania Mông, djuai ania Dao. Ƀu bơngot kơ tơnap, dlêh glar, hăng bruă mă lĕ khua plơi hăng yă Dẩn pơsit pran jua ngă tui bruă hơkrŭ kiăng pơplih tơlơi pơmin rim mơnuih ƀôn sang. Yă Dẩn hơdor glăi:

 “Blung a neh wa ƀơi anai hlơi hlơi leng kơ kiăng tơkeng lu ană, neh wa lăi sang hmâo lu ană klă hloh, samơ̆ lom dưi lăi pơthâo hăng ƀuh lŏn drŏn ƀu lu anun lom dưi kơnuk kơna pơpha brơi lŏn laih, hơđong laih neh wa ăt kơnong kơ tơkeng mơng 1-2 čô ană đôč. Gah bruă djă kông pơdô̆ rơkơi bơnai lĕ neh wa ƀu hmâo pŭ pơnŭ dong tah, brơi dô̆ rơkơi bơnai lom djop 18 thun kah mơng brơi dô̆ hăng ngă tui klă tơlơi phiăn mơng kơnuk kơna”.

Lom mơnuih ƀôn sang ƀơƀrư̆ sut lui phiăn juăt ƀu tŭ yua, pơphun “hơđong anih dô̆”, yă Dẩn hmâo hyu djop laih anih anom ba hơdôm hơdră klă, phun pla hmâo nua nao pơ̆ Nậm Sò. Đah kơmơi ping gah anai hmâo pơsur laih mơnuih ƀôn sang ba phun črik, phun quế, pơtơi glăi pla, tơdơi kơ anun pok prong bruă rông hlô, akan hơdang. Lăi pơthâo bôh tơhnal tơdơi kơ 10 thun gir run dô̆ gơgrong ƀơi guai dêh čar pơđĭ kyar bơwih ƀong hăng tơlơi gum djru abih pran jua mơng đah kơmơi Khua plơi Đặng Thị Dẩn, yă Tẩn Thị tích mơnuih ƀôn sang plơi Nậm Sò, să Bản Phiệt, tơring glông Bảo Thắng, tơring čar Lào Cai lăi:

 “Tơlơi tơnap lĕ amai Dẩn pơtô brơi kơ pô bơwih ƀong huă. Pơtô pla phun pla, pla phun quế, pla čik sĭ hmâo ƀơƀiă prăk ƀơƀrư̆ sang anô̆ pơdrŏng đĭ ƀiă. Đưm hlâo pơphun rai pơ̆ anai tơnap tap biă ƀu hmâo hơget ôh".

Tơdơi kơ 20 thun pok phun, Nậm Sò ră anai glăk pơplih phrâo ƀơƀrư̆. Hơdôm bôh sang lu tal ƀlu ñŭp gah tlôn hơdôm blah dlai tlô klă hiam; hơdôm ară jơlan pơkra hăng ƀê tông agaih hiam, sa gru hơdip phrâo glăk hmâo ƀơi plơi pla kual guai dêh čar anai hmâo gum hơgôp ƀu net mơng đah kơmơi ping gah ba jơlan hlâo kah hăng yă Dẩn.

64 thun, 23 thun ping gah, hơdôm tơlơi tuh rơyuh mơng đah kơmơi ping gah djuai ania Dao Đặng Thị Dẩn hmâo djru pran laih, pran đăo gơnang kơ neh wa mơnuih ƀôn sang plơi pla kual guai dêh čar. Hmư̆ tui hăng tui Ping gah, Wa Hồ, rim mơnuih ƀôn sang Nậm Sò hmâo hăng glăk hmâo pran jua gir run pơkra jơlan guai rơnuk rơnua, hơđong hăng pơđĭ kyar. Pô ping gah Đặng Thị Dẩn lăi:

 “Tơlơi hơget pô nao hlâo, pô lăi lĕ ngă. Ƀu dưi ngă lĕ ƀu lăi ôh. Lăi djơ̆ kah mơng hmư̆. Mơnuih ƀôn sang ngă tui klă lĕ pran pơtrut kơ pô mă bruă ƀu thâo glêh glar. Dŏng hăng dlông adih lăng truh kah hăng plơi prong anet ƀơi kual klung hup anai. Mơnuih ƀôn sang gum hrom hơbit, kâo gir run hloh".

Tơlơi hrưn đĭ jing “gru rơđah” amăng pơđĭ kyar bơwih ƀong mơng Nậm Sò ră anai lĕ bôh tơhnal mơng hơdôm tơlơi gir run ƀu pơdơi pơdă, ƀu dlêh glar, abih bang yua kơ mơnuih ƀôn sang mơng pô đah kơmơi djuai ania Dao Đặng Thị Dẩn./.