Tŭ mă gơnam nua ñu 1 klăk prăk hăng hră blơi gơnam 0 prăk yua Khul pơlir hơbit mơnuih mă bruă tơring čar Dak Lak, ayong Y Krich Êban, dŏ ƀơi să Ea Tul, tơring glông Čư̆ M’gar lĕ ding kơna amăng khul mơnuih mă bruă mut phung ƀơi anom bruă ia hơdjă hăng wai pơgang anih dŏ hơdip tơring čar Dak Lak brơi thâo, tơdơi kơ 2 thun bơbeč mơng klin Covid-19, ñu hăng lu mơnuih mă bruă pơkŏn bưp lu tơlơi tơnap. Gơnam ƀơk anai yôm phăn biă mă, djru brơi djop sang anŏ čơkă thun phrâo pơđao pran jua, hur har, yâo mơ-ak.

“Ƀu djơ̆ kơnong kâo đôč ôh abih bang mơnuih mă bruă lêng bưp tơnap tap, đa hơmâo mơnuih rơngiă bruă mă, kar hăng kâo anai bưng biă hơmâo gơnong bruă ngă hmua kĭ pơkôl mă bruă sui thun. Sang anŏ tơnap tap, lơ̆m tŭ mă gơnam arăng ƀơk, sang anŏ gơnam hok mơ-ak biă mă amăng bơyan thun phrâo anai”.

Hăng amon Y Hổ H’Mok dŏ ƀơi ƀuôn Com Leo, să Hoà Thắng, plơi prong Buôn Ma Thuột, rơdêh dang wang yua khul ia jrao kyâo bơrơkal mriah amăng plơi prong Buôn Ma Thuột pơtrut pơsur ƀing čơmah jao gơnam amăng bơyan čơkă thun phrâo, anai lĕ gơnam hơmâo nua hăng yôm phăn biă mă. Rơdêh dang wang anai ngă kơ ñu amăng thun phrâo anai ƀu kiăng tơgŭ mơng mơguah sing bring rơbat tơkai nao sang hră hăng tết thun anai Y Hổ amra pơgiăng adơi ñu hăng rơdêh dang wang phrâo hyu ngui hrŏm hăng gơyut gơyâo amăng plơi pla:

“Hlâo anun aka ƀu hơmâo rơdêh dang wang nao sang hră glêh glar biă mă, lơ̆m hơmâo arăng djru brơi kâo hok mơ-ak, kâo amra gir run hrăm hră kiăng ngă mơ-ak brơi ƀing mơnuih gum djru brơi kơ kâo.”

Dŏ amăng sang phrâo man pơdong prong rơhaih, ayong Trịnh Thế Hậu, dŏ ƀơi phường Thiện An, plơi prong BuônHồ brơi thâo, ñu hơmâo 23 thun mă bruă amăng gơnong bruă pơtô pơjuăt, amăng hơdôm thun laih rơgao yua sang anŏ tơnap tap, kâo pô lĕ mơnuih ruă hơtai pơjrao ăt rơngiă lu prăk kak yua anun aka ƀu dưi man pơdong sang phrâo mơ̆ dŏ hrŏm hăng amĭ ama. Thun 2001 ayong Hậu dô̆ bơnai laih anun ƀă ană bă, sang amĭ ama kơniă tui yơh. Ƀuh sang anŏ ayong Hậu tơnap tap, blan 10 thun 2022 khul mơnuih mă bruă mut phung gơnong bruă pơtô pơjuăt djru brơi ayong Hậu 50 klăk prăk kiăng man pơdong brơi sang. Ƀrô bơyan bơnga anai sang ñu man pơdong giong laih hăng mut nao dŏ yơh.

“Pơhmu hăng hơdôm thun hlâo anun, thun anai sang anŏ gơmơi hơmâo sang phrâo, ngă gơmơi hok mơ-ak hăng hơđong pran jua mă bruă. Čơkă thun phrâo hrŏm hăng tơlơi hok mơ-ak mơng sang anŏ dong lĕ bơnai kâo pi kian hăng kâo pô hơmâo bruă mă hơđong laih dong hơmâo tơlơi đing nao mơng kông nhơn, mơnuih mă bruă, ƀing gơmơi pơpŭ bơni biă mă”.

Tui ơi Nguyễn Quang Thuân, Kơ-iăng gơnong bruă mă, tơhan rơka hăng mơnuih mơnam tơring čar Dak Lak, bơyan čơkă thun phrâo Quý Mão 2023, Jơnum min mơnuih ƀon sang tơring čar Dak Lak pioh 76 klai prăk kiăng ƀơk gơnam brơi ƀing mơnuih, khul grup. Hơdôm pluh rơbêh anung gơnam djru brơi sang anŏ ƀun rin, giăm ƀun rin hăng mơnuih mă bruă tơnap tap ăt hơmâo hơdôm khul grup, anom bơwih ƀong sĭ mơdrô hăng ƀing mơnuih čơmah jao gơnam tơl mơnuih ƀon sang amăng bơyan anai.

“Thun anai tơring čar git gai hơdôm boh tơring glông, plơi prong; hơdôm boh să, phường, tơring kual amra pơphun hơdôm tal nao ƀơk gơnam brơi mơnuih ƀun rin amăng tơring čar, kơnong tơring čar amra akŏ pơjing 8 grup hyu tơña blan ƀing mơnuih tui hơdră djru hăng nao čuă ƀing djru wai lăng amăng bơyan tết. Hrŏm hăng anun rơnoh prăk mơng tơring čar gum djru, tơring čar ăt git gai Khul ia jrao kyâo bơrơkal mriah, Jơnum min djop djuai ania mơnuih mơnam hăng hơdôm khul grup pơkŏn gir run pơsur hơdôm anom bơwih ƀong sĭ mơdrô, khul gru, ƀing mơnuih amăng tơring čar bơwih brơi tết kơ mơnuih ƀun rin, anăm brơi hlơi ôh dŏ glăi gah tlôn.”

Hơdôm gơnam yôm phăn jao tơl tơngan sang anŏ tơnap tap amăng bơyan tết ngă pơđao pran jua, pơtrut pơsur kiăng ƀing gơñu hrưn đĭ amăng tơlơi hơdip mơda hăng tơlơi čang rơmang hơmâo lu tơlơi hok mơ-ak phrâo./.