-Ơ ơi, bruă mă ruah mơnuih, pioh iâu mut ngă tơhan thun 2023 ƀơi tơring čar Dak Lak hơmâo tơlơi phrâo hơgĕt mơ̆n ?

Bruă iâu mut tơhan thun 2023, tơ tă anai ăt hlăk ngă tui Tơlơi phiăn mut ngă tơhan thun 2015. Khă tui anun, bruă mă ruah mơnuih, pioh iâu mơnuih ƀôn sang djop thun mut tơhan thun 2023 hơmâo mơ̆n hơdôm tơlơi phrâo kah hăng, Kơnuk kơna ngă hră pơtrun mrô 37 lơ 6/6/2022 čih pơhrua glăi hơdôm mơta tơlơi amăng Hră pơtrun 120 lơ 9/10/2013 pơkă, amra bơtơhmal tơlơi soh  laih anun đŭ prăk yua ngă soh glăi bruă ling tơhan, iâu pơtum tơhan. Tui hăng anun, hnong đŭ prăk bơtơhmal hăng tơlơi soh glăi amăng bruă ruah mơnuih, iâu mut tơhan đĭ lu biă mă. Laih anun, anai ăt jing sa amăng hơdôm hơdră kiăng pơgăn, plai ƀiă tơlơi arăng bĕ hăng dơneh ƀu gưt nao ngă tơhan blah ngă.

Laih anun hơmâo pơƀuh rơđah, hăng boh tơhnal, thun 2022, mrô mơnuih ƀu gưt nao pel ĕp tơlơi suaih pral hŭi djơ̆ anăn ngă tơhan lĕ 103 čô, samơ̆ thun 2023 anai mrô mơnuih ƀu nao pơkă lăng tơlơi suaih pral kơnong 2 čô đôč. Anun yơh sa tơlơi phrâo, tơlơi ƀuh rơđah amăng bruă ruah mơnuih, pioh iâu mut ngă tơhan amăng thun 2023.

-Bruă ruah mơnuih, iâu pơmut tơhan thun 2023 mơ̆ng tơring čar Dak Lak hơmâo hơdôm tơlơi gêh găl hăng tơnap hơgĕt mơ̆n, ơ ơi ?

Bruă mă ruah mơnuih, jak iâu mut tơhan thun 2023 ƀơi tơring čar gêh găl mơ̆n yua hơmâo tơlơi djru hrom mơ̆ng khua mua, git gai phun lĕ anom bruă ping gah, jơnum min pơ ala mơnuih ƀôn sang, jơnum min mơnuih ƀôn sang tơring čar, biă mă djop sang bruă, gơnong bruă gum hrom soh, truh pơ tơring glông, să, plơi pla, ƀôn ƀut djru hrom. Mơ̆ng anun, pơđĭ tui tơlơi thâo hluh mơ̆ng djop gưl mơnuih ƀôn sang, biă mă ñu mơnuih ƀôn sang, ƀing tơdăm dra djơ̆ thun mut ngă tơhan. Pơtong rơđah tơlơi glăm ba, bruă khom ngă, tơlơi mơak hing ang mơ̆ng rĭm čô mơnuih ƀôn sang dêh čar lơ̆m mut ngă tơhan ăt kah hăng ngă hrom mut ngă tơhan kông an jăng jai.

Khă tui anun, ăt hơmâo mơ̆n tơlơi tơnap tap, mơta sa rĭm čô mơnuih ƀôn sang hlăk pơtum kơ bruă ngă hmua, pơkra ming bơwih ƀong huă, lu mơnuih ƀôn sang nao mă bruă pơ ataih, nao mă bruă amăng anih tuh tia pơkra ming sa ƀut. Yua kơ anun, bruă iâu mut tơhan pơkă lăng tơlơi suaih pral, ngă tui bruă jao mơ̆ng anom bruă ping gah, gong gai kơnuk kơna djop gưl pơtrun dŏ gun tơnap biă mă. Dua lĕ, tơlơi suaih pral mơ̆ng mơnuih ƀôn sang ƀing hlăk ai ră anai trun kơtang biă mă, yua lu mơnuih ruă mơta lăng ƀu rơđah, ruă drah nur, ruă arăt hơtai boh jai hrơi lu hăng thun hlăk ai. Biă mă ñu, hơmâo mơ̆n sa dua čô tơdăm pơhmao mă bruă yua ia jrao ngă măt, laih anun mơñum ia jrao ngă rung răng hơtai boh, drah nur, drah đuăi čơtăng, kiăng kơ ƀing nai ia jrao pơkă lăng pơsit tong ten tơnap biă mă.

-Hnun hă, ƀơi tơring čar Dak Lak hơmâo bruă prăp lui hiư̆m pă kơ jơnum jao tơhan hăng tŭ jum tơhan amăng thun 2023?

Tơhnal pơtrun mơ̆ng Kơnuk kơna jao kơ tơring čar Dak Lak thun 2023 lĕ khom ruah djop 2.68 čô mơnuih ƀôn sang mut ngă tơhan. Amăng anun, hơmâo ngă, iâu anăn mut ngă tơhan blah ngă lĕ 2.502  čô, amăng anun 2 čô đah kơmơi. Laih anun 466 čô mơnuih ƀôn sang hlăk ai ngă tơhan kông an mơnuih ƀôn sang, hơmâo sa čô đah kơmơi. Kiăng dưi ngă klă bruă jao tơhan ƀơi djop plơi pla, anom bruă khua git gai ling tơhan tơring čar, hơmâo lăi pơthâo hăng Khul khua mua pơphun iâu pơmut tơhan git gai 15 boh tơring glông, plơi prong kơtưn sem lăng boh tŭ yua, wai lăng mrô tơhan, ĕp mơnuih djop thun brơi mut tơhan.

Pơtô brơi djop tơring glông, khul khua mua tơhan tơring glông, plơi prong prăp lui, hrăm  hlâo boh yôm phun kiăng ngă tui tŭ jum, jao tơhan djơ̆, tơpă, khut khăt, jing hrơi mơak jao tơhan mơnuih ƀôn sang djop djuai ania amăng tơring čar. Laih dơ̆ng, git gai djop gưl anom bruă ping gah, ling tơhan, khul djru bruă čem rông tơhan, biă mă ñu khua mua apăn bruă amăng plơi pla hyu čuă jơmư trư găn tơña bla, juh alum pran pơtrut ai hơtai ƀing tơdăm djơ̆ anăn nao ngă tơhan, kiăng gơñu hơđong tơlơi pơmin pran jua, hur har nao ngă tơhan amăng thun 2023.

-Hai, bơni kơ ih Đại tá Lê Văn Hùng.