Anăp nao tơhnal pơkă mơnuih ƀôn sang kơnong kơ lăi pơhing sa wot hăng ƀirô Kơnuk kơna amăng ngă tui hơdôm mơta hră pơ-ar. Yua anun, hơdôm hrơi rơgao, tơring čar Dak Lak hmâo kơtưn tơlơi git gai mơ̆ng Ping gah, amăng pơtrut kơtang ngă tui Akô̆ bruă 06 mơ̆ng Gong gai dêh čar, rơgao kơ anun pơjing tơlơi ha amăng plĕ, ba glăi bôh tơhnal lom ngă tui.

Ơi Huỳnh Văn Ánh, să Phú Lộc, tơring glông Krông Năng, tơring čar Dak Lak lăng djơ̆ pran biă lơ̆m ngă  hră pơ-ar mơ̆ng ataih ƀơi anom sa bah amăng mơ̆ng să gêh gal. Ƀu kơnong kơ nô̆p hră amăng glông pơdah ôh mơ̆ ñu dô̆ ruah jơlan gah pơsir prăk tañ tui hơdôm sang prăk hăng măi mok dong. Ơi Huỳnh Văn Ánh brơi thâo:

 “Kâo ƀu kiăng nao ngă hră pơ-ar pơsit hră pơgang ƀudah ƀu kiăng nao ngă hră rơkâo mrô pơsit anăn păn ƀơi Kông ang ôh. Gơñu pơtă hrơi hơpă lĕ pô nao hrơi anun mă hơdôm bôh tơhnal sa amăng 3 mơta sa wot. Bơ̆ tla prăk lĕ tui anun mơn, kâo hmâo mrô kâo pơčrang mă ƀudah brơi rai gah anai ƀu tơnap ôh hăng tañ dong”.

 Bơ̆ ơi Nguyễn Ngọc Anh, să Hòa An, tơring glông Krông Pač, tơring čar Dak Lak tơdơi kơ dưi hmâo ƀing gŏp amăng grŭp Akô̆ bruă mrô 06 mơ̆ng să lăi pơhing, ñu dưi lăng ƀuh bôh tŭ yua mă yua mrô amăng pơsit anăn ƀơi măi kah hăng: Pơkrem hrơi mông, prăk nao rai yua ƀu kiăng lăi pơthâo lu mơta hră pơ-ar, hrŏ trun lu biă bruă ngă hră pơ-ar lom ngă bruă hơgĕt, amra dưi pơ ala kơ hră CCCD hăng djop mơta djuai hră pơ-ar lom pơhing ruah mă amăng măi pơsit anăn păn mơ̆ng lŏn ia kah hăng: hră mơgăt rơdêh, hră pơgang gah ia jrao...ơi Nguyễn Ngọc Anh ƀu djư̆ng djư ngă hră:

 “Pơplih mrô, dưm anăn păn pơsit amăng măi anai lĕ tơlơi tŭ yua prong biă kơ mơnuih ƀôn sang, anun dưi hmâo hơdôm grŭp, gơnong bruă abih bang khul mơ̆ng să, tơring glông đing nao truh rim bôh sang anô̆ djru gum mơnuih ƀôn sang ƀing gơmơi thâo hluh hiưm ñu dưm anăn pơsit amăng măi jing gêh gal biă, ba glăi bôh tŭ yua kơ mơnuih ƀôn sang amăng bruă mă ăt kah hăng bruă ngă hră pơ-ar anun mơnuih ƀôn sang ƀing gơmơi mơ-ak biă”.

Akô̆ bruă mrô 06 mơ̆ng Gong gai dêh čar ta hmâo rơwang pơkă hăng tơhnal bơdjơ̆ nao prong rơhaih, djru pơđĭ tui bôh tơhnal wai lăng kơnuk kơna amăng lu bruă. Hăng bruă phun amăng ngă tui Akô̆ bruă mrô 06, hơdôm hrơi rơgao, khul kông ang tơring čar Dak Lak hmâo gir run laih pok pơhai ngă tui, pơphun tŭ mă pơsir hră pơ-ar mă yua, pơsur, pơtô brơi mơnuih ƀôn sang ngă hră pơsit hră CCCD, kơtưn hơdôm bruă pơsir pơhlôm ngă giong hơdôm tơhnal pơkă ngă agaih mrô djă pioh. Trung tá Trần Văn Dũng, kông ang să Hòa An, tơring glông Krông Pač, tơring čar Dak Lak brơi thâo:

  “Kông ang să gum hrŏm hăng hơdôm grŭp gơnong bruă nao truh pơ̆ hơdôm bôh plơi pla pơphun dưm anăn pơsit amăng măi rơnoh sa kơ mơnuih ƀôn sang hăng ăt gum hrŏm mơn hăng grŭp wai lăng hră pơ-ar pơphun dưm anăn păn pơsit amăng măi rơnoh 2. Rơgao kơ ngă tui, mơnuih ƀôn sang dŏng yua klă kơ dưm anăn păn pơsit amăng măi pioh kơ rim mơnuih”.

 Kiăng pơđĭ tui bruă mă, bruă gơgrong mơ̆ng gưl ping gah hơdôm gưl amăng pok pơhai ngă tui Akô̆ bruă mrô 06, lơ 20/3/2023, Grup apăn bruă Ping gah tơring čar Dak Lak mă yua Tơlơi črâo ba mrô 33 kơ kơtưn tơlơi git gai mơng hơdôm gưl ping gah amăng pơtrut kơtang pok pơhai Akô̆ bruă pơđĭ kyar mă yua mrô mơnuih ƀôn sang dô̆, pơsit anăn păn hăng pơsit amăng măi yua pơplih mrô lŏn ia rơwang 2022-2025, tơhnal lăng nao truh thun 2030 ƀơi tơring čar. Mơ̆ng tơlơi črâo ba anai, Jơnum min mơnuih ƀôn sang tơring čar Dak Lak mă yua lu kơčăo bruă pioh pok pơhai Akô̆ bruă. Hrŏm hăng anun hmâo črâo ba hơdôm gơnong bruă plơi pla pơdŏng giăm truh 2.400 grŭp hyu mă bruă pok pơhai Akô̆ bruă 06 mơ̆ng tơring čar truh pơ̆ plơi pla, grŭp mơnuih ƀôn sang. Truh ră anai, tơring čar Dak Lak hmâo ngă giong laih tŭ mă rơbêh kơ 2 klăk 1 rơbâo tơlơi pơhing mơnuih ba mut amăng măi djă pioh lŏn ia ta kơ anih anom mơnuih ƀôn sang dô̆, djă pioh hăng mă yua ba glăi bôh tơhnal djru kơnuk kơna gah bruă wai lăng tơlơi rơnuk rơnua hơđong ƀơi plơi pla. Hrŏm hăng anun, hmâo pơsit brơi rơbêh kơ 1 klăk 600 rơbâo pok hră căn cước công dân hmâo hlă chíp điện tử kơ rim mơnuih, pơhrui tŭ mă rơbêh kơ 500 rơbâo mrô pơsit anăn păn điện tử ƀơi rơnoh sa, rơnoh 2. Glông jơlan pơsir hră pơ-ar mơng tơring čar ăt dưi tô nao rai mơn hăng anih anom răk pioh hră pơ-ar anih mơnuih ƀôn sang dô̆, pok pơhai bruă mă lăng nao rai mơng ataih ƀơi rơnoh 3, rơnoh 4 dưi đing nao pơtrut kơtang, biă ñu 25 mơta bruă mă phun gah Akô̆ bruă 06 djru pơđĭ tui bôh tơhnal wai lăng hră pơ-ar bơwih brơi kơ mơnuih ƀôn sang. Thiếu tướng Lê Vinh Quy, Khua Kông ang tơring car Dak Lak, Kơ-iăng Khua Grŭp hyu mă bruă Akô̆ bruă 06 gưl tơring čar brơi thâo:

“Anai lĕ akô̆ bruă mơng gong gai dêh čar ta bruă pok pơhai ngă tui khom hmâo tơlơi gum mơ̆ng hơdôm gưl hơdôm gơnong bruă tơlơi dŏng yua mơng abih bang mơnuih ƀôn sang. Amăng anun, khul kông ang lĕ phun ñu, jing na nao, hơkrŭ pơsir tơlơi pơmin mă hơbit, ƀu lăi abih tơlơi pơhing. Abih bang khom anăp nao bôh tŭ yua hrŏm lĕ ngă gal brơi hloh kơ mơnuih ƀôn sang hăng anom bơwih ƀong. Dua lĕ lăi pơhing klă kiăng mơnuih ƀôn sang hăng anom bơwih ƀong ƀuh bôh tŭ yua mơng Akô̆ bruă 06 amăng ƀrư̆ pơjing bôh thâo mơnuih mrô, mơnuih mơnam mrô”.

 Hăng tơlơi črâo ba mơng gưl ping gah, tơlơi khut khăt amăng ngă tui mơng hơdôm gưl gong gai, hơdôm bôh tơhnal yak blung a amăng bruă pok pơhai ngă tui Akô̆ bruă 06 ƀơi tơring čar Dak Lak jing laih gru than djơ̆ phiăn kơ bruă kơtưn ba glăi bôh tơhnal pơsir bruă ngă hră mơ̆ng ataih. Mơ̆ng anun djru pơđĭ tui bôh tŭ yua wai lăng kơnuk kơna ngă gal brơi kơ mơnuih ƀôn sang hăng anom bơwih ƀong amăng pơđĭ kyar bơwih ƀong mơnuih mơnam djru bruă pơplih mrô lŏn ia./.