Pơwot glăi sang tơdơi kơ 5 hrơi nao pơdơi pơdă ƀơi Anom bơwih brơi kơ mơnuih djru ngă hơkrŭ đưm tơring čar Dak Lak, pô ruă Y Siêng Niê, ƀuôn Chiêng Kao, să Dăk Phơi, tơring glông Lak ăt bă kơ pran jua ol kơdol mơn:

 “Hyu ngui mơ-ak biă, ƀong mơñum tâ̆o klă, bơwih brơi klă biă. Tơring čar Nghệ An ăt hmâo mơn, tơring čar Sóc Trăng ăt hmâo mơn, tơring glông Ea Kar, tơring glông Buôn Đôn, tơring glông Ea Sup yơh, tơring glông Čư̆ Kuiñ yơh gum hrŏm adôh “5 anh em trên một chiếc xe tăng”, laih anun “Nổi lửa lên em”, mơ-ak biă, mlăm hơpă leng kơ adôh soh, ră ruai tơlơi đưm, ƀơi anai kâo blah, ƀơi adih kâo blah. Tơhrơi lĕ hyu ngui jum dar plơi prong Buôn Ma Thuột”.

Amăng sang phrâo pơdŏng, ayong Y Mực Liêng, ană đah rơkơi Y Hiên Ông, ƀơi ƀuôn Sruông, să Bông Krang, tơring glông Lak brơi thâo, ƀu dô̆ bơngot kơ hơjan pơ-iă, anun pran jua hăng tơlơi suaih pral mơng ama ñu klă hloh lu biă, sang anô̆ ăt hơđong mơn bơwih ƀong huă, pơđĭ kyar bơwih ƀong huă:

 “Ama kâo djru ngă hơkrŭ đưm hăng ñu dưi djru sa blan 3 klăk prăk hăng kơnuk kơna djru dong 50 klăk prăk, sang anô̆ čan dong pioh pơkra sang kơ ama kâo. Gơnang kơ hmâo kơnuk kơna djru prăk pioh bơwih brơi kơ ñu hăng pioh ƀong huă rim hrơi ăt djru plai ƀiă mơn bơwih brơi tơlơi suaih pral klă hloh. Kâo rơkâo bơni kơ gong gai plơi pla hmâo rai čuă tơña bla hăng ƀơk gơnam tam kơ ñu".

Tui hăng yă Phạm Thị Lệ Vân, ƀơi Anom wai lăng mơnuih mă bruă, tơhan rơka ruă hăng mơnuih mơnam tơring glông Lak, kah hăng abih bang 1489 čô mơnuih mơ̆ng sang anô̆ gah hơdră bruă, hmâo mơnuih ngă hơkrŭ ƀơi tơring glông leng kơ dưi bơwih brơi tŏng ten hăng hmâo rơnoh hơdip dưm kơnar hăng dlông hloh hơnong pơkă hrŏm. Ră anai tơring dlông glăk đing nai djru gum pioh huăi hmâo sang anô̆ hơpă hơdip amăng tơlơi tơnap tap.

 “Hăng tơring glông Lak lĕ bruă lăi pơhing hăng prăk djru kơ mơnuih gah hơdră bruă lĕ tŏng ten hmao tlôn, samơ̆ ăt dô̆ mơn 12 bôh sang anô̆ hmâo ding kơna dŏng amăng sang anô̆ ƀun rin. Kiăng gir run brơi kơ 12 bôh sang anô̆ anun tơtlaih mơng ƀun rin lĕ ăt ngă hră lăi pơthâo glăi mơn kơ Gơnong bruă wai lăng mơnuih mă bruă lĕ kiăng hmâo kơčao bruă mơn tui hluai kơ tơlơi gal mơng rim sang anô̆ gum djru sang dô̆, tơdah hmâo sang laih lĕ djru rơmô ƀudah pơjeh pla ƀudah djru hră pơkrem prăk".

Tui Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Dak Lak, ră anai đơ đam tơring čar hmâo rơbêh kơ 45.000 čô mơnuih djru ngă hơkrŭ đưm, amăng anun rơbêh kơ 10.000 čô mơnuih glăk čơkă mă prăk djru rim blan. Amăng hơdôm thun rơgao, hơdôm bruă bơwih brơi kơ mơnuih djru ngă hơkrŭ đưm hăng sang anô̆ gah hơdră bruă dưi hmâo tơring čar Dak Lak lăng ba na nao djơ̆ rơnoh. Kơnong amăng thun anai, tơring čar hmâo pơphun lu tal hăng giăm truh 400 čô mơnuih djru ngă hơkrŭ đưm nao hơduah lăng tơlơi duam ruă hơbit, hyu čuă lăng; ngă tui bruă hyu čuă, ƀơk gơnam tam kơ mơnuih djru ngă hơkrŭ đưm hăng abih bang prăk mă yua rơbêh kơ 15 klai prăk. Tal 27/7 thun anai, tơring čar ăt pioh mơn rơbêh kơ 6 klai prăk pioh bơwih brơi kơ mơnuih djru ngă hơkrŭ đưm hăng sang anô̆ gah hơdră bruă.

Khă tui anun, ơi Nguyễn Quang Thuân, Kơ-iăng Khua Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Dak Lak brơi thâo, yap truh rơnuč thun 2022, tơring čar ăt dô̆ mơn rơbêh kơ 900 bôh sang anô̆ gah hơdră bruă ƀun rin tui tơhnal pơkă lu bơnah, rơbêh kơ 600 bôh sang anô̆ dô̆ tơnap tap gah sang dô̆.  Pơ̆ anăp anai, tơring čar amra đing nao djop ngăn rơnoh pioh huăi dô̆ sang anô̆ ƀun rin amăng sang anô̆ gah hơdră bruă hăng mơnuih djru ngă hơkrŭ đưm.

“Hrưn đĭ truh abih thun 2024 amra phun ñu pơsir brơi kơ mơnuih gah hơdră bruă gum djru ră anai glăk tơnap tap kơ sang dô̆, dua lĕ ba tơbiă mơ̆ng ƀun rin. Tơtlaih mơng ƀun rin ƀơi anai lĕ lu bôh than ba truh, bôh than ba truh lu bơnah lĕ hmâo lu tơhnal pơkă amra gum hrom hăng hơdôm gơnong bruă, anom bruă mơ̆ng hơdôm bruă mă gah Gơnong bruă anun gơgrong kiăng hmâo bruă gơgrong pơsir hăng bơ̆ sang anô̆ ƀu dô̆ hnưr thun mă bruă ƀudah ƀu hmâo gơnam pioh ngă đang hmua lĕ rơkâo ba mut gum djru mơnuih mơnam rim blan hăng ba tơbiă mơ̆ng hră čih anăn sang anô̆ ƀun rin. Tơring čar amra hmâo hơdôm jơlan gah pơsir phun hloh pioh pơsir djru hơdôm bôh sang anô̆ gah hơdră bruă”./.