Tui ơi Y Biêr Niê, Kơ-iăng Khua git gai Ping gah tơring čar, Khua khul git gai mrô 1017 tơring čar Dak Lak, tui mrô jŭ yap phrâo anai hloh brơi ƀuh, đơ đam tơring čar ăt dŏ rơbêh 11.300 boh sang anŏ ƀun rin hăng giăm ƀun rin aka ƀu tŭ mă hơdôm tơlơi gum djru Tết mơng gong gai djop gưl. Ba truh tơlơi anai lĕ yua hơnong pơkă mơnuih ƀun rin, giăm ƀun rin pơplih yua anun mrô sang anŏ ƀun rin, giăm ƀun rin amăng tơring čar lu tui pơhmu hăng thun hlâo anun, lơ̆m anun rơboh prăk djru mơnuih mơnam ƀu pơplih.

Kiăng pơhlôm ƀu brơi hlơi ôh dŏ glăi gah tlôn amăng bơyan čơkă thun phrâo Quý Mão 2023, Ping gah tơring čar Dak Lak hơmâo tŭ ư tơlơi rơkâo pơhrua ngăn drăp dŏ glăi rơbêh 600 klăk prăk brơi hơdôm tơring glông tơnap tap kiăng djru brơi sang anŏ ƀun rin, giăm ƀun rin. Laih dong rơkâo hơdôm boh ƀon lan, gơnong bruă, anom bruă kơtưn amăng bruă jak iâu gum pơgôp.