Phrâo anai, Khul đah kơmơi Việt Nam pơphun “Hrơi đah kơmơi pơphun bơwih ƀong” hơmâo anăn “Đah kơmơi Dak Lăk pơphun bơwih ƀong pơčeh phrâo hăng pơtruh anom bơwih ƀong”. Hrơi jơnum hơmâo lu bruă kah hăng: pơƀuh gơnam ƀing đah kơmơi ba sĭ; pơplông tal rơnuč tơlơi pơčeh phrâo bơwih ƀong sĭ mơdrô thun 2023; jơnum Hơdră đĭ kyar sĭ mơdrô rơnuk 4.0; brơi prăk čan djru đah kơmơio bơwih ƀong blung a.

Anai jing hrơi mông kiăng adơi amai đah kơmơi amăng tơring čar bơbưp, lăi pơthâo bruă či bơwih ƀong, sĭ mơdrô, pơđĭ kyar bơwih ƀong; pơpŭ kơ ƀing đah kơmơi rơgơi sĭ mơdrô. Mut hrŏm hrơi jơnum anai, amai H’Chi Mlô, dŏ ƀơi să Ea Đar, tơring glông Ea Kar, tơring čar Dak Lăk lăi:

“Kâo nao jơnum hrŏm hăng Hrơi đah kơmơi pơphun bruă bơwih ƀong hăng tơlơi gơgrong ngă pô pơtruh nao rai djŏp mơta gơnam ba sĭ mơng ƀing adơi amai amăng plơi, ba rai pơ anai kiăng gêh gal ƀiă amăng bruă sĭ mơdrô, kiăng adơi amai amăng khul dưi ba djă gơnam gơñu pơkra pơƀuh brơi kơ mơnuih kiăng blơi, djru adơi amai hơmâo bruă mă, biă ñu lĕ adơi amai mơnuih djuai ƀiă”.

Amăng jơlan hơdră Hrơi đah kơmơi pơphun bơwih ƀong tơring čar Dak Lăk thun 2023, Khul đah kơmơi Việt Nam tơring čar Dak Lăk pơphun Jơnum hơdră sĭ mơdrô rơnuk 4.0 kiăng prăp lui tơlơi thâo hluh, hơdră sĭ mơdrô hăng djru ba đah kơmơi pơphun bơwih ƀong sĭ mơdrô.

Ƀơi mông jơnum, ƀing khua hơmâo hmư̆ mơnuih kơhnâo lăi pơthâo hơdôm akŏ bruă ba bơkơtuai kah hăng: Hơdôm hơdră sĭ mơdrô kiăng pơhưč tuai blơi gơnam rơnuk 4.0; bruă pơtrut pơsur sĭ mơdrô ƀơi Dak Lăk ră anai - hơdôm tơlơi gêh gal hăng lông lăng hăng đah kơmơi pơphun bơwih ƀong sĭ mơdrô blung a; pơplih klă hloh hơdră bơwih ƀong, pơplih mrô prăk pơhrui glăi - tơlơi dưi hăng aka ƀu dưi ngă hơmâo djă pioh lui. Lu adơi amai hơmâo tơlơi tơña kơ ƀing kơhnâo hơdôm bruă akŏ pơjing anăn gơnam, pơkra gơnam hăng ĕp anih sĭ gơnam. Amai Nguyễn Thị Ngọc Thắng, dŏ ƀơi phường Tân Lập, plơi prong Buôn Ma Thuột brơi thâo:

“Bruă ngă kâo hơdor hloh anun lĕ čih pơkra hơdră sĭ mơdrô tong ten hlâo či bơwih ƀong. Anun lĕ tơlơi mơ̆ anom bơwih ƀong kâo glăk kơƀah yua dah kâo lĕ mơnuih mă bruă bơwih brơi mơnuih tơpuôl mơn, kâo pơphun bơwih ƀong tui jơlan pơsir hơdôm bruă hơmâo amăng mơnuih mơnam yua hnun kâo aka ƀu čih pơkra hơbô̆ bruă sĭ mơdrô mơn. Yua hnun, hơdôm akŏ bruă tui anun kiăng biă mă, đah kâo mơng thâo rơđah jơlan bơwih ƀong hiư̆m pă”.

Hăng hơdôm tơlơi pơhing sit nik, jơnum bơkơtuai djru adơi amai thâo hluh lu mơta tơlơi amăng bruă bơwih ƀong, khin bơwih ƀong, sĭ mơdrô; mă yua boh thâo măi mok pơkra gơnam klă hloh, pơjing anăn gơnam hmư̆ hing, dưi bơkơtưn hăng pô pơkŏn. Ăt amăng hrơi mông anai mơn, Khul pơlir hơbit đah kơmơi Việt Nam hơmâo pơphun pơplông tal rơnuč pơčeh rơgơi bruă bơwih ƀong thun 2023. Tơlơi pơplông anai pơhưč 84 pok hră pơ-ar mơng khul đah kơmơi tơring čar mơ-it nao. Hơdôm kơčăo bruă ba pơplông hơmâo ƀơi abih bang bruă, pơƀut lu hloh ƀơi bruă ngă hmua hơmâo gơnam hmư̆ hing kah hăng kơphê, ka kao, eng ao mơñam, rơyă tơpai čeh. Amăng anun, “gơnam mơñum ƀong ngă hơmâo pran pơkra mơng pơjeh boh tia” hơmâo mă pri mrô sa. Yă Tô Thị Tâm, Khua khul đah kơmơi Việt Nam tơring čar Dak Lăk, khua pơphun pơplông brơi thâo:

“Mrô mơnuih nao pơplông thun anai lu biă laih anun prăp lui klă mơn, čih pơthâo rơđah biă, hơmâo gơnam pơkra mơng plơi pla či pơtrut tui hăng jing gơnam ba sĭ. Ƀing čŏm puang ăt mơ-it kơ ƀing čơđai pơhrua tui amăng kơčăo bruă mơng ƀing gơñu kiăng dưi ngă hăng dlăm hloh, biă ñu lăng yôm bruă marketing hăng anŏ klă mơng gơnam, hruh gơnam či pơƀuh hyu kiăng arăng thâo gơnam ta pơkra”.

Lăng ƀing đah kơmơi pơphun bơwih ƀong ƀu dŏ gah rơngiao jơlan hơdră pơplih phrâo mrô mơng lŏn ia ta ôh, hơdôm thun rơgao, Khul đah kơmơi Việt Nam hơmâo lu jơlan hơdră, bruă mă djru đah kơmơi mă yua măi mok bơwih ƀong hăng mrô. Rơngiao kơ hrơi pơtŏp brơi kiăng adơi amai thâo rơguăt bruă sĭ mơdrô, Khul ăt djru hơduah ĕp, mă yua anih mơdrô amăng plang điện tử, pơtruh nao rai hăng mơnuih pơphô brơi bruă bơwih ƀong ƀơi Khul sĭ mơdrô điện tử, mơng anun adơi amai hrăm sĭ mơdrô, pơƀuh gơnam ƀơi anih sĭ mơdrô điện tử. Yă Nguyễn Thị Minh Hương, Kơ-iăng khua Khul đah kơmơi Việt Nam brơi thâo:

“Tơlơi anai ƀuh rơđah hloh ƀơi hơdôm plơi pla, lơ̆m hơmâo jơnum ngui sang čơ, hrơi pơphun bơwih ƀong lêng hơmâo anom bruă kơnuk kơna hăng khul đah kơmơi Việt Nam gum ngă, djru ba adơi amai. Hrơi blan pơ anăp Khul ăt djru adơi amai pơphun bơwih ƀong jê̆ giăm hloh hăng anih sĭ mơdrô samơ̆ pơƀut amăng bruă sĭ mơdrô hrŏm hăng đah kơmơi bơwih ƀong amăng bruă mă yua măi mok yôm, djru pơđĭ kyar ngă hmua mơta hơdjă djơ̆ tui jơlan đĭ kyar mơtah hăng hơđong kơjăp ră anai./.