Anai lĕ kơčăo bruă anăn Hrưn đĭ mă pô yua kơ Jơnum min mơnuih ƀôn sang plơi prong Ƀuôn Hô ngă hrom anom bruă djru tơlơi khăp pơgăn tơlơi ƀun rin hăng Anom bruă pơđĭ kyar plơi pla, kĭ pơkôl ngă hrom tlam lơ 9/2. Tui hăng boh tơhnal kĭ pơkôl, mơ̆ng ră anai truh abih blan 8/2024, kơčăo bruă amra djru kơ mơnuih ƀôn sang dua boh să Ea Drông hăng Čư̆ Bao, plơi prong Ƀuôn Hô, tơring čar Dak Lak.

Hơdôm boh yôm phun djru lĕ, pơđĭ tui tơlơi thâo ngă hmua, pơkra ming gơnam sĭ mơdrô kơ sang anŏ mơnuih ngă hmua, boh nik ñu sang anŏ ƀing đah kơmơi mơnuih djuai ƀiă, pioh gơñu hrăm ĕp tui hơdră bơwih ƀong huă kjăp hơđong; pơđĭ tui tơlơi thâo ĕp prăk čan hăng wai lăng rơnoh prăk čan tuh pơ alin kơ bruă mơnuă; djru ba, kơtưn hyu ĕp anih anom sĭ mơdrô blơi gơnam hăng sĭ gơnam đang hmua mơ̆ng djop sang anŏ. Mơ̆ng anun, djru pơblih hơdră mă bruă kiăng hơđong kjăp.