Thun 2022, Keh prăk djru čơđai muai tơring čar Dak Lak hơmâo jak iâu pơčruh 8 klai prăk, hăng hơmâo djru brơi rơbêh 9000 wơ̆t čơđai muai tơnap tap. Hơdôm bruă mă djru kah hăng: Wai lăng ba tơlơi suaih pral hăng djru gơnam ƀong huă đĭ pran kơ čơđai muai, hơmâo hơdră pơkă lăng laih anun ruah pioh brač tơlơi ruă hơtai boh mơ̆ng anet, pơkă pơkă lăng tơlơi ruă mơta hăng ƀơk ia jrao pơjrao. Bruă mă djru pơtô hrăm, man pơdong sang hră, anih hrăm hăng ƀơk gơnam yua hrăm hră, man pơdong anih ngui ngor kơ čơđai sang hră kual ataih, ƀơk prăk hrăm hră kơ čơđai tơnap tap samơ̆ hor hrăm hră, ƀơk rơdêh dang rơwang hăng gơnam yua hrăm hră;

Bruă mă pơgang ba čơđai muai kah hăng: djru čơđai muai hơmâo tơlơi truh sat, ƀlung a, arăng kơtư̆ juă taih amang, čơđai hơmâo tơlơi ruă ƀu thâo pơjrao, čơđai ană drit druai djai amĭ hăng ama; čơđai muai hơmâo amĭ ama djai tal klin covid 19 ngă laih anun man pơdong sang khăp pap kơ čơđai tơnap tap, ană drit druai....Ƀrô tal anai, khua mua tơring čar Dak Lak rơkâo djop gưl anom bruă ăt ngă hrom anom bruă Keh prăk djru čơđai muai amăng tơring čar kiăng lăi pơthâo kơ djop anom bruă khul mơnuih djru ba mơnuih mơnam tơnap tap, mơnuih čơmah djru prăk kăk, gơnam tam wơ̆t anom bruă gah rơngiao kơnuk kơna kiăng hơmâo gơnam djru ba ƀing čơđai muai tơnap tap.