Ƀơi mông tŭ mă prăk, Khua Khul wai lăng djuai ania mơ̆ng Anom bruă khua pơ ala mơnuih ƀôn sang dêh čar, ơi Y Thanh Hà Niê Kdăm hrŏm hăng khua mua pơ ala hơdôm anom bruă djru ba nao mơ-it 300 klăk prăk kơ Keh prăk pioh djru mơnuih ƀun rin hăng 50 klăk prăk kơ Keh prăk hơdor tơngia tla pran tơring čar Dak Lak. Tŭ mă rơnoh prăk anun, Jơnum min djop djuai ania mơnuih mơnam Việt Nam tơring čar Dak Lak tŭ mă laih anun kah pơpha kơ 2 boh tơring glông Čư̆ Kuin hăng Čư̆ Mgar pok pơhai bruă nao djru ba sang anŏ ngă hơkrŭ tơnap tap laih anun man pơdong sang kơ mơnuih ƀun rin.

Jơnum min djop djuai ania mơnuih mơnam Việt Nam tơring čar Dak Lak brơi thâo: truh rơnuč thun 2023, tơring čar Dak Lak dŏ hơmâo giăm 45.100 boh sang anŏ ƀun rin hăng 34 rơbâo sang anŏ giăm ƀun rin, dưm dưm hăng 16% mrô sang anŏ ră anai. Tơ tă anai, sang dŏ kơ mơnuih ƀun rin hăng giăm ƀun rin dŏ lu sang tơ̆i rơ̆i, lơ̆m anun prăk mơ̆ng tơring čar djru kơ bruă anai dŏ kơƀah. Yua kơ anun, anom bruă djop djuai ania mơnuih mơnam ăt iâu pơthưr lu mơnuih hơmâo pran jua čơmah pơčruh hrŏm keh prăk pioh djru ba mơnuih ƀun rin.