Ƀơi tơring čar Dak Nông, gong gai hăng mơnuih ƀôn sang glăk dô̆ čang kơ rơwang bruă hăng tơring čar ăt glăk prăp lui mơn pioh pok pơhai rơwang bruă lơm dưi pơsit.

 Ơi Nguyễn Quang Vinh, ƀơi grŭp mrô 1, thôn 3, să Nhân Cơ, tơring glông Dak R’Lấp, tơring čar Dak Nông mơ-ak biă lơm Rơwang bruă tuh pơplai pơkra jơlan đuăi hmar Kơdư – Dơnung gah yŭ črăn Gia Nghĩa (Dak Nông) – Chơn Thành (Bình Phước) dưi hmâo Jơnum min apăn bruă Khua pơ ala mơnuih ƀôn sang pơlir hơbit lăi pơthâo kơ Khua pơ ala mơnuih ƀôn sang dêh čar ta pel ĕp, pơsit hơdră pơtrun tuh pơplai amăng tal jơnum lok 7, blan 5 pơ̆ anăp. Ơi Vinh čang rơmang biă rơwang bruă jơlan nao rai anai amra tañ pơsit, pok pơhai, ngă giong pioh jơlan nao rai, jơlan rô nao rai sĭ mơdrô mơ̆ng mơnuih ƀôn sang Dak Nông lăi ha jăn, Dap Kơdư lăi hrŏm gêh gal hloh. Hơdôm mơta gơnam tam kah hăng kơphê, tiu, sầu riêng... mơ̆ mơnuih ngă đang hmua kah hăng ơi Vinh ngă rai, amra dưi sĭ gêh gal hloh, nua ñu klă hloh, ngă gal pioh bơwih ƀong, tơlơi hơdip mơda pơđĭ kyar.

“Kâo čang rơmang Khua pơ ala mơnuih ƀôn sang tañ pơsit rơwang bruă anai. Lơm hmâo jơlan đuăi tơpă thơ bruă dŭ pơgiăng ñu tañ hloh. Jơlan nao rai hluh gah thơ bruă bơwih ƀong, tơlơi hơdip mơda pơđĭ kyar kơtang hloh, bruă măi mok, bruă đang hmua, lăi hrŏm hơdôm mơta gơnam gêh gal hloh. Jơlan đuăi hmar anai amra ba glăi lu bôh tŭ yua kơ mơnuih ƀôn sang”.

Ơi Lê Văn Chiến, Ding kơna Grŭp apăn bruă Ping gah tơring čar, Kơ-iăng Khua Jơnum min mơnuih ƀôn sang tơring čar Dak Nông brơi thâo, Dak Nông lăi ha jăn, kual Dap Kơdư lăi hrŏm lĕ kual ngă rai gơnam mă mơ̆ng đang hmua prong biă pioh sĭ kơ dêh čar tač rơngiao hăng ngă đang hmua, pơkra gơnam. Anai ăt lĕ kual pla rai gơnam yôm phăn kơ sa dua mơta bruă măi mok, rơđah biă ñu lĕ bruă pơkra boxit – alumin – nhôm. Khă hnun hai, Dap Kơdư ăt dô̆ mơn kual klung hŭp gah pơđĭ kyar bơwih ƀong. Bôh than phun lĕ yua kơ jơlan nao rai akă gal. Ƀu hmâo tơdrun tum păn ia rơsĭ, ƀu hmâo jơlan rơdêh treng, đơ đam kual kiăng pơđĭ kyar kơnong kơ dô̆ tơguan kơ glông jơlan prăng dưi đing nao, tuh pơplai.

Ơi Lê Văn Chiến pơtŏng sit, Jơlan đuăi hmar Kơdư – Dơnung gah yŭ črăn Gia Nghĩa (Dak Nông) – Chơn Thành (Bình Phước) amra djru yôm phăn pơsir anô̆ dô̆ đôm gah jơlan nao rai. Anăp nao gah Dơnung, jơlan đuăi hmar anai amra tô mut jơlan đuăi hmar Chơn Thành - Ƀôn prong Hồ Chí Minh. Kơđai glăi nao gah Kơdư, anai amra anih pok phun pioh pơjing jơlan đuăi hmar hluh gah Dap Kơdư, mơ̆ng Dak Nông găn Dak Lak, Gia Lai, Kon Tum, tô nao rai hăng kual Tŏng Krah dêh čar hăng tô mut jơlan đuăi hmar Kơdư - Dơnung. Tô nao rai ha amăng plĕ kual amra pơjing anih anom pơđĭ kyar phrâo, pran pơtrut pơđĭ kyar bơwih ƀong - mơnuih mơnam, kơ Dak Nông hăng kual Dap Kơdư. Hăng tơhnal yôm phăn tui anun, tơring čar Dak Nông hmâo prăp lui tŏng laih, amra prăp lui tơlơi kiăng pioh pok pơhai rơwang bruă.

 “Tơring čar ƀing ta ăt pok pơhai mơn hơdôm yak kiăng hloh pioh prăp lui ngă tui rơwang bruă. Ƀing ta hmâo ngă laih hơdôm mơta hră pơ-ar djơ̆ phiăn hăng prăp lui ngăn rơnoh tui tơlơi črâo ba mơ̆ng Gong gai dêh čar lĕ tơring čar Dak Nông gum hơgôp 1.000 klai prăk lĕ Dak Nông hmâo prăp lui laih. Kơnong bruă yôm phăn dong lĕ pơsir anih anom pioh pơkra jơlan, ƀing gơmơi ăt prăp lui laih mơn”.

Tui tơlơi pơkă kual jơlan đuăi hmar Gia Nghĩa – Chơn Thành hmâo rơwang pơkă 6 glông jơlan rơdêh đuăi. Rơwang pơpha tal tuh pơplai hăng rơwang ataih 128,8 km, pơkă 4 glông jơlan rơdêh đuăi, pơsir anih anom pioh pơkra jơlan sa wot 6 glông jơlan rơdêh đuăi. Yap ƀơƀiă abih bang rơnoh tuh pơplai rơwang bruă năng ai ñu 25.540 klai prăk, amăng anun ha mơkrah lĕ prăk kơnuk kơna, dô̆ glăi lĕ yua pô tuh pơplai dưm dăp.

 Kơnong ƀơi tơring čar Dak Nông, jơlan đuăi hmar găn nao hmâo rơwang ataih 27,8km (biă ñu găn tơring glông Dak R’Lấp), abih bang kual lŏn mă yua năng ai ñu 526 ektar, kiăng pơpha anih pơdŏng plơi phrâo hơđong brơi kơ 252 bôh sang anô̆. Ơi Phan Anh Tuấn, Khua git gai Ping gah tơring glông Dak R’Lấp, tơring čar Dak Nông brơi thâo, ngă tui tơlơi črâo ba mơ̆ng Ping gah tơring čar, Jơnum min mơnuih ƀôn sang tơring čar, abih bang glông bruă kơđi čar mơ̆ng tơring glông hmâo pơphun laih pioh prăp lui kơ rơwang bruă. Hluai tui jơlan rơwang bruă, tơring glông hmâo pel ĕp glăi laih, pơkă kual 6 kual plơi pơdŏng phrâo hơđong, 10 bôh hlung gơnam, 8 bôh anih anom tuh djah. Tơring glông ăt hmâo črâo ba mơn hơdôm gơnong bruă, hơdôm bôh să gum hrŏm pel ĕp glăi, yap mă ƀơƀiă tơlơi lŏn drŏn, phun kyâo, đang hmua pơdai kơtor, kông ngăn amăng kual pơkra jơlan, prăp brơi kơ bruă pơsir anih anom pơkra jơlan.

 “Ngă tui tơlơi črâo ba mơ̆ng tơring čar lĕ ƀing gơmơi hmâo pơjing laih Grŭp pơsur, lăi pơhing hăng ăt pơdŏng mơn sa dua grŭp. Abih bang hơdôm anih anom, hơdôm Grŭp Ping gah să, phường, tơring kual, khul pơgang rơnuk rơnua, khul ling tơhan, laih anun jơnum min djop djuai ania mơnuih mơnam, khul grŭp pơkon leng kơ gum hrŏm. Anai lĕ bruă jao prong, abih bang glông bruă kơđi čar khom pơphun bruă, črâo ba khut khăt, ngă hiưm hơpă pơjing tơlơi tŭ ư hrŏm mơ̆ng mơnuih ƀôn sang".

Dak Nông hmâo gơgrong hlâo, prăp lui klă hơdôm tơlơi kiăng pioh lơm rơwang bruă jơlan đuăi hmar Gia Nghĩa – Chơn Thành dưi pơsit amra tañ pok pơhai. Bruă Dak Nông prăp lui kơ rơwang bruă brơi ƀuh tơlơi čang rơmang pơđĭ kyar bơwih ƀong mơnuih mơnam kơtang biă mơ̆ng tơring čar./.