Lu tơlơi gum pơhiăp kơ jao lŏn, brơi apah lŏn, pơplih bôh than mă yua lŏn, mă glăi lŏn, pơ ala glăi, djru pơdŏng glăi anih dô̆ phrâo hơđong lom kơnuk kơna mă lŏn hmâo laih ƀing khua pơ ala lăi tơbiă. Tui hăng ƀing khua pơ ala, bôh nik amăng tơlơi pơkă mă lŏn hmâo tơlơi tơnap mơn, tơlơi akă gal ba truh hơdôm tơlơi ƀom kiơng tơnap, lu mơnuih, lu ñu lĕ yua kơ akă pơkă rơđah hơdră pơ ala glăi djru gum, akă hmâo tơlơi ha amăng plĕ amăng gum hrom ngă tui.

Yua anun, akô̆ tlôn, hră pơ-ar pơ ala glăi, djru, pơdŏng glăi anih dô̆, mă yua lŏn khom tơpă, rơđah, djơ̆ hăng gơgrong lăi pơblang, pơhlôm djơ̆ bôh yua kơ kơnuk kơna, anom bơwih ƀong hăng mơnuih ƀôn sang. Gum pơhiăp kơ pơđĭ kyar anih mă yua pơkom lui lŏn ngă đang hmua, đang kyâu tui bruă brơi apah hăng sĭ lŏn, ƀing khua pơ ala pơsit anai lĕ bôh yôm phrâo ngă gal amăng ngă tui pơhư prong, lŏn ngă đang hmua. Khă hnun hai tơlơi phiăn kiăng pơkă rơđah hloh kơ hơdôm mơnuih dưi brơi apah lŏn ƀudah sĭ lŏn. Amăng mông bơkơtuai, ƀing khua pơ ala ăt đing nao mơn gum pơhiăp kơ pơphun ngă tui tơlơi pơkă kual, kơčăo bruă mă yua lŏn; hơdôm tơlơi pơkă bơdjơ̆ nao truh pơđĭ kyar pơlar kual lŏn; gah ngă hră lŏn drŏn, pơsit hră tŭ yap hăng hơdôm mơta hră pơ-ar, mrô djă pioh, tơlơi pơhing lăi nao lŏn mơnai./.