Ƀrô djơ̆ tal hơdor glăi 78 thun Hrơi pơdŏng Khul ling tơhan mơnuih ƀôn sang dêh čar Việt Nam hăng 33 thun Hrơi Jơnum abih bang mơnuih ƀôn sang pơgang guai dêh čar, ƀing ta gum hrom hơduah ĕp lăng tơlơi gir run mơng mơnuih apăn bruă tơhan, ling tơhan pơgang guai dêh čar pơdŏng kual guai dêh čar kơjăp kơtang:

Mơmot rơnuč rơwang hrơi tơjuh, Thượng úy Y Biza Rya, Khua Grŭp pơsur mơnuih ƀôn sang Puih kơđông pơgang guai dêh čar ƀơi Ia Rvê, hrom hăng ƀing gŏp nao čuă tơña bla mơnuih ƀon sang thôn 1, să Ia Rvê. Thượng úy Y Biza Rya brơi thâo, lăi pơhing pơđĭ tui tơlơi thâo hluh tơlơi phiăn kơ mơnuih ƀôn sang lĕ sa hơdră kiăng neh wa thâo hluh hăng gum tơngan hrom djă pioh rơnuk rơnua hơđong kual guai dêh čar.

 “Puih kơđông pơgang guai dêh čar ăt kah hăng hơdôm bôh ƀirô, jơnum min, gơnong bruă plơi pla juăt gum hrom pơphun hyu lăi pơhing hơdôm tơlơi phiăn bơdjơ̆ nao neh wa mơnuih ƀôn sang hăng hơdră lĕ lăi pơhing plah nao rai amăng hơdôm mông jơnum plơi pla, jơnum grŭp ping gah ƀudah hơdôm mông jơnum ƀơi hơdôm anih anom plơi. Phun ñu lĕ neh wa mơnuih ƀôn sang lĕ thâo kơjăp, thâo rơđah hăng ngă tui djơ̆ hơdôm tơlơi pơkă amăng tơlơi phiăn”.

Amai Lâm Thị Hợp, ƀơi thôn 1, să Ia Rvê brơi thâo, giăm hmâo 17 thun pơpĕ đuăi mơng plơi pla pô pơ̆ Bến Tre nao dô̆ bơi tơring glông Ea Sup pơdŏng pưk sang đang hmua, gơnang kơ hmâo tơlơi lăng ba gum djru, bơwih brơi mơng gong gai hăng hơdôm khul mơnuih ƀơi tơring glông mơ̆ sang anô̆ thâo hluh hơdôm hơdră bruă gum djru mơng Ping gah, Kơnuk kơna, hơđong pran jua bơwih ƀong huă, thâo bruă djơ̆ ngă, bruă soh lĕ bĕ.

 “Ƀing ling tơhan pơgang guai dêh čar ăt đing nao, lăng ba mơnuih ƀôn sang ăt nao lăi pơhing kơ mơnuih ƀôn sang. Hluai tui hơdôm mông lăi pơhing lĕ kâo ăt thâo hluh mơn kơ tơlơi phiăn hăng ăt gum hrom mơn hăng hơdôm khul pơgang guai dêh čar”.

Să guai dêh čar ƀơi Ia Rvê, tơring glông Ea Sup, tơring čar Daklak ră anai hmâo rơbêh kơ 2.000 bôh sang anô̆ hăng rơbêh kơ 6.900 čô mơnuih gah 23 djuai ania dô̆ hơdip hrom. Amăng hơdôm thun rơgao, hrom hăng gong gai plơi pla, Puih kơđông pơgang guai dêh čar Ia Rvê ƀơi anăp dô̆ hrom, gum hrom pơsir hơdôm tơlơi rơnuk rơnua plơi pla, hơđong tơlơi rơnuk rơnua bruă kơđi čar, hơđong pơhlôm abih bang mơnuih mơnam. Thượng tá Nguyễn Xuân Sơn, Apăn bruă kơđi čar Puih kơđông pơgang guai dêh čar ƀơi Ia Rvê, brơi thâo: dô̆ hrom hăng mơnuih ƀôn sang, ƀong huă hrom hăng pơhiăp sa tơlơi pơhiăp mơng djuai ania, Ia Rvê dưi pơdŏng laih pran gơgrong mơng abih bang mơnuih ƀôn sang pơgang rơnuk rơnua guai dêh čar.

“Puih kơđông hmâo 17 čô mơnuih mă bruă ƀơi să. Rơngiao kơ bruă pô juăt mă, bruă hyu tir, pơgang hot jrao, pơsur mơnuih ƀôn sang lĕ ngă klă bruă lăi pơhing, pơsur neh wa mơnuih ƀôn sang ngă tui hơdră pơtrun, jơlan gah mơng Ping gah, hơdră bruă tơlơi phiăn mơng Kơnuk kơna, pơsur mơnuih ƀôn sang ngă tui klă tơlơi pơkă ƀơi guai dêh čar, ƀu ngă soh tơlơi pơkă phiăn, wai lăng rơnuk rơnua hơđong amăng plơi pla, să”.

Tui hăng Đại tá Đỗ Quang Thấm, Kơ-iăng Khua apăn bruă kơđi čar Ƀirô git gai Ling tơhan pơgang guai dêh čar tơring čar Daklak, hơdôm hrơi rơgao, hrom hăng bruă djru mơnuih ƀôn sang pơđĭ kyar bơwih ƀong, hơđong tơlơi hơdip mơda, khul pơgang guai dêh čar hmâo pơplih phrâo hơdôm hơdră lăi pơhing, lăi pơthâo, pơtô juăt tơlơi phiăn truh mơnuih ƀôn sang kual guai dêh čar. Mơng bruă lăi pơhing hluai tui glông jơlan loa pôr pơhing, loa ba hyu, jơnum ƀơi plơi pla, pha hyu hră pơhing, ƀudah ba truh rim sang anô̆, pơhrua hrom amăng hơdôm bruă djru ngă đang hmua... Thun 2022, ling tơhan pơgang guai dêh čar pơgang pơgăn klin, pơgang pơgăn djop djuai tơlơi ngă soh gah hot jrao, blơi sĭ mơnuih, găn rơgao ča guai dêh čar. Hrom hăng anun, pơdŏng hơdôm “Anih dưm hơdrôm hră tơlơi phiăn guai dêh čar”, gum hrom hăng plơi pla pơdŏng hơdôm grŭp lăi pơthâo tơlơi phiăn, khul gum hrom ngă tui tơlơi phiăn... Truh ră anai ƀơi Daklak hmâo laih 26 bôh kơtu dưm hơdrôm hră tơlơi phiăn hăng rơbêh kơ 20 rơbâo hơdrôm hră; 38 Grŭp wai lăng hơđong mă pô, wai lăng jơlan guai dêh čar... Đại tá Đỗ Quang Thấm brơi thâo dong:

“Sa amăng hơdôm hơdră ră anai ƀing gơmơi glăk pok pơhai gum hrom hăng anih anom, anun lĕ hơdră “Sang anô̆ đah kơmơi ƀu ngă soh tơlơi phiăn pơkă ƀơi guai dêh čar” hăng “Plơi ƀu hmâo hlăk ai ngă soh tơlơi phiăn” kiăng pơjing tơlơi lar hyu ăt kah hăng bruă lăi pơhing hyu djop. Hrom hăng anun lĕ ƀing gơmơi ăt ngă tui mơn bruă mă mơng tha plơi, khua plơi, mơnuih hmâo mơnuih ƀôn sang hmư̆ tui lu kiăng ngă klă bruă lăi pơhing, lăi pơthâo, pơtô juăt tơlơi phiăn kơ mơnuih ƀôn sang”.

Tơring čar Daklak hmâo 73 km jơlan guai dêh čar hăng tơring čar Mondulkiri, dêh čar Kur; hmâo 4 bôh să guai dêh čar gah 2 bôh tơring glông Ea Sup hăng Buôn Đôn. Hơdôm bruă mă bơwih brơi pơđĭ kyar bơwih ƀong, bơwih brơi tơlơi suaih pral hăng pơđĭ tui bôh thâo tơlơi phiăn kơ mơnuih ƀôn sang hmâo djru djă pioh kơjăp tơlơi rơnuk rơnua bruă kơđi čar, hơđong abih bang mơnuih mơnam, pơdŏng kual guai dêh čar jai hrơi jai hơđong pơđĭ kyar./.