Mơng Keh prăk djru mơnuih ngă đang hmua, hơdôm gưl Khul mơnuih ngă đang hmua tơring čar Daklak hmâo laih giăm truh 2.500 bôh sang anô̆ čan rơbêh kơ 52 klai prăk pioh yua pơđĭ kyar bơwih ƀong sang anô̆.

Hrom hăng anun, Khul gum hrom hăng Sang prăk gah hơdră bruă mơnuih mơnam, Sang prăk gah bruă đang hmua pok pơhai brơi rơbêh kơ 15 rơbâo bôh sang anô̆ mơnuih ngă đang hmua čan prăk hăng mrô prăk čan rơbêh kơ 600 klai prăk. Hrom hăng anun ngă tui bruă brơi čan hăng hơdôm bôh anom bơwih ƀong djru mơnuih ngă đang hmua blơi hơdôm pluh rơbâo tơn kơmok pruai, pơjeh pla, gơnam ƀong kơ hlô rông tui jơlan gah tla tui ƀơƀrư̆, hăng abih bang nua ñu rơbêh kơ 70 klai prăk.

Kiăng ngă tui ba glăi bôh tơhnal prăk čan, amăng thun 2022, khul mơnuih ngă đang hmua Daklak gum hrom dong hăng neh wa lom ngă đang hmua, rông hlô mơnong, pok pơhai klă hơdôm bruă djru mơnuih ngă đang hmua ngă juăt hăng bôh thâo phrâo, hơdră phrâo; lăi pơhư̆č, blơi gơnam./.