Jơnum min mơnuih ƀôn sang tơring čar Dak Lak phrâo pơphun Jơnum pơsit tơlơi pok pơhai ngă tui hơdôm jơlan hơdră pơkă mơ̆ng dêh čar rơwang mơ̆ng thun 2021-2023, jơlan pơsir, bruă mă phun rơwang mơ̆ng thun 2023-2025 hăng pơsit jơlan gah pok pơhai amăng rơwang 2026-2030. Ngă tui 3 jơlan hơdră pơkă mơng dêh čar (plơi pla phrâo, hrŏ trun ƀun rin kơjăp hăng pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng), Dak Lak dưi jao giăm truh 2.320 klai prăk. Amăng anun, Jơlan hơdră pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng hmâo lu hloh, hăng mrô ngăn rơnoh rơbêh 1.000 klai prăk; Jơlan hơdră hrŏ trun ƀun rin hmâo jao laih rơbêh kơ 382 klai prăk; Jơlan hơdră pơdŏng plơi pla phrâo hmâo jao laih rơbêh kơ 927 klai prăk. Rơngiao kơ ngăn drăp kơnuk kơna, Dak Lak hmâo iâu pơhrui laih, pơsur hmâo năng ai ñu 1.542 klai prăk amăng 3 thun 2021-2023 pioh ngă tui jơlan hơdră pơkă mơng dêh čar pơdŏng plơi pla phrâo.

Ơi Phạm Ngọc Nghị, Khua Jơnum min mơnuih ƀôn sang tơring čar, Khua grŭp črâo ba hơdôm Jơlan hơdră pơkă mơ̆ng dêh čar tơring čar Dak Lak pơtŏng sit, pơ̆ anăp anai, tơring čar amra gir run pơtlaih hơdôm tơlơi tơnap ƀu gal, kiăng hơdôm jơlan hơdră ngă tui ba glăi bôh tơhnal dlông hloh. Amăng anun, tơlơi lŏn dô̆ lŏn ngă đang hmua amăng kual djuai ania ƀiă amra dưi đing nao hlâo pơsir, pơhlôm kơ neh wa djuai ania ƀiă hơđong tơlơi hơdip mơda:

 “Ră anai tui hăng tơlơi lăi pơthâo glăi lĕ năng ai ñu 23% mrô neh wa djuai ania ƀiă dô̆ ƀun rin amăng abih bang mrô neh wa djuai ania biă, samơ̆ 65% mrô neh wa djuai ania ƀiă amăng mrô ƀun rin mơ̆ng tơring čar, sa dua mrô dô̆ glăi lu biă. Ƀun rin lĕ dô̆ lu yua kơ blung hlâo arăng ăt lăi kơƀah lŏn ngă đang hmua, lŏn dô̆, kơƀah hơdôm tơlơi kiăng pioh neh wa pơphun bruă ngă đang hmua bơwih ƀong huă. Ƀing ta glăk đing nao kơ jơlan hơdră djuai ania kual čư̆ siăng lĕ đing nao hlâo blung a mơ̆ng tơring čar, Jơnum min ăt lĕ lŏn ngă đang hmua, lŏn dô̆ kơ neh wa. Ƀing ta hmâo ngă laih lu bruă pơkon mơ̆ neh wa ăt kơƀah lŏn ngă đang hmua, kơƀah lon dô̆ mơn, kơƀah hơdôm gơnam mă yua pioh ngă đang hmua pioh hơdip jing ƀu hmâo bôh tŭ yua hơgĕt ôh”.

Phrâo tom adih anai, ƀơi plơi prong Plei Ku, ăt pơphun mơn Jơnum pơsit bôh tơhnal ngă tui Tơlơi črâo ba mơng Grŭp apăn bruă Ping gah tơring čar Gia Lai kơ kơtưn tơlơi git gai mơng hơdôm gưl ping gah kơ pơdŏng plơi pla phrâo amăng neh wa djuai ania ƀiă. Tui tơlơi lăi pơthâo glăi, 5 thun rơgao, hơdôm tơring glông, plơi prong amăng tơring čar hmâo iâo pơhrui laih rơbêh kơ 1.500 klai prăk pioh pok pơhai pơdŏng plơi pla phrâo amăng kual neh wa djuai ania ƀiă. Amăng anun ngăn drăp kơnuk kơna giăm truh 1.300 klai prăk, prăk mơ̆ng anom bơwih ƀong giăm truh 24 klai prăk, prăk mơnuih ƀôn sang gum pơčruh rơbêh kơ 153 klai prăk, prăk čan 43,5 klai prăk. Tơdơi kơ 5 thun, ră anai đơ đam tơring čar hmâo 110 bôh plơi pla neh wa djuai ania ƀiă djơ̆ hăng plơi pla phrâo, tơlơi hơdip mơda neh wa jai hrơi jai dưi pơđĭ tui.

Khă hnun hai bruă ngă tui 3 jơlan pơkă mơ̆ng dêh čar ƀơi hơdôm bôh tơring čar Dap Kơdư ăt dô̆ lu tơnap mơn; sa dua rơwang bruă, bôh yôm akă dưi pok pơhai hăng pơsir prăk mă yua yua kơ akă hmâo tơlơi pơtô ba djop mơ̆ng dêh čar. Bruă pel ĕp, pơsit tơhnal pơkă puang pơpha, pơsit anăn păn rơwang bruă tuh pơplai dô̆ lu luk puk. Ơi Trương Thế Vinh, mơnuih apăn bruă mă bruă djuai ania ƀơi tơring glông Ia Grai, tơring čar Gia Lai lăi lĕ, mơnuih apăn bruă glăk sit nik bưp tơlơi tơnap lom pok pơhai jơlan hơdră.

 “Hmâo lu hră pơ-ar mơng tơring čar akă hmao bơhmu hăng lom pok pơhai jơlan hơdră, biă ñu ƀơi plơi pla akă hmâo tơlơi pơtô ba rơđah. Biă ñu Rơwang bruă 1 mrô djru sang dô̆, lŏn dô̆, lŏn ngă đang hmua tui tơlơi pơsit mrô 4 mơng Khua dêh čar lĕ djru lŏn dô̆ hăng rơbêh 44 klăk prăk sa sang anô̆ tơnap biă pok pơhai. Lŏn ngă đang hmua kơ neh wa lĕ nua lu, hăng mrô prăk djru kah hăng anun hăng prăk brơi čan tui anun neh wa ƀu dưi blơi djop lŏn pioh ngă đang hmua, pơdŏng sang ôh”.

Ƀơi tơring čar Kon Tum, phrâo anai, rơbêh kơ 1.000 čô mơnuih amăng khul hlăk ai tơring čar Kon Tum hmâo gum hrŏm Jơlan hơdră pơbưp nao rai, bơkơtuai hăng Khul Jơnum min mơnuih ƀôn sang tơring čar, hăng anăn ñu “Ngă tui bruă mơng hlăk ai amăng ngă tui hơdôm Jơlan hơdră pơkă mơng dêh čar ƀơi tơring čar Kon Tum”. Khua Jơnum min mơnuih ƀôn sang tơring čar Kon Tum Lê Ngọc Tuấn pơtŏng sit, anai lĕ hơdôm bôh yôm pơsit jơlan gah kơ hlăk ai amăng bruă gum hrŏm hơdôm jơlan hơdră phun djru ngă truh kih bruă bơwih ƀong – mơnuih mơnam thun 2023 mơng tơring čar. Kiăng hlăk ai Kon Tum gum hơgôp lu hloh dong amăng ngă tui Jơlan hơdră pơkă mơng dêh čar, Khua Jơnum min mơnuih ƀôn sang tơring čar Kon Tum Lê Ngọc Tuấn, lăi pơthâo brơi:

 “Grŭp apăn bruă Khul hlăk ai tơring čar, hơdôm Khul hlăk ai tơring glông, Khul hlăk ai plơi prong pok pơhai klă hơdôm bruă mă hơkrŭ  pơhlôm tơhnal lar hyu djop, tơhnal pơsit jơlan gah, tơhnal tŭ yua, tơhnal kơjăp, tơhnal pơčeh phrâo. Amăng anun đing nao tơlơi kah hăng lăi pơhing pơdŏng plơi pla phrâo, hrŏ trun mrô sang anô̆ hlăk ai ƀun rin, gum hrŏm pơdŏng pơkra glăi jơlan nao rai kah hăng tơdrông toa hăng jơlan nao rai amăng plơi pla. Pơdŏng hơdôm hơdră pơlir nao rai gum hrom pơđĭ kyar bơwih ƀong mơ̆ng hlăk ai”./.