Ƀơi mông jơnum, ƀing khua sang bruă, djru prăk man pơdong 1.200 boh sang kơ sang anŏ ƀun rin ƀơi tơring čar Sóc Trăng, rĭm boh sang dưi djru 50 klăk prăk man pơdong boh sang hăng pong bơbung. Ding jum kông an jao kơ Anom bruă tơhan pơlih rơnuk rơnua bơwih ƀong huă hrom hăng kông an tơring čar Sóc Trăng ngă hrom tong ten laih anun pơlir hơbit hăng gong gai kơnuk kơna tơring čar, pioh man pơdong djop 1.200 boh sang kơ mơnuih ƀun rin khom giong hlâo kơ lơ 2/9/2023.

Ƀrô hơdor glăi tal 78 thun hrơi akŏ pơdong Kơnuk kơna lŏn ia lơ 2/9 amra pơƀut glăi bruă mă, jao sang dŏ kơ hơdôm sang anŏ tơnap tap amăng tơring čar. 5 thun rơgao, tơring čar Sóc Trăng hơmâo jak iâu pơčruh man pơdong sang kơ mơnuih ƀun rin, hơmâo 5.200 boh sang, jao kơ sang anŏ hơmâo djru lŏn ia, sang anŏ ƀun rin aka ƀu hơmâo sang dŏ hơđong. Khă tui anun, đơ đam tơring čar ăt dŏ 15.000 boh sang anŏ ƀun rin, rơbêh 26.000 boh sang giăm ƀun rin; biă mă ñu hơmâo giăm 7000 boh sang anŏ tơnap tap kơƀah sang dŏ.