Phrâo  anai, Khul wai lăng mơnuih djơ̆ jrao hret dioxin tơring čar Kon Tum ngă hrom  kông ty sĭ mơdrô lu mơta gơnam Kon Tum pơphun tao nao ƀơk 400 anung gơnam têt hăng rơnoh 146 klăk prăk kơ mơnuih ƀu klă drơi jăn jing mơnuih djơ̆ jrao hret truh klâo rơnuk ƀơi hơdôm tơring glông: Đak Hà, Kon Braih, Ngọc Hồi hăng plơi prong Kon Tum. Hrom hăng anun, Khul wai lăng mơnuih djơ̆ jrao hret dioxin tơring čar Kon Tum ăt mă yua prăk Keh prăk djru mơnuih djơ̆ jrao hret dioxin rơbêh 137 klăk prăk brơi kơ 846 čô mơnuih hơmâo tơlơi ruă amăng tơring čar.

Hlâo kơ anun, anom bruă mơnuih tơpuôl amăng Anih tuh tia pơkra pơjing-lơ̆m kual bơwih ƀong huă tơring čar Kon Tum ngă hrom anom bruă mơnuih tơpuôl tơring čar pơphun Hơdră anăn Têt dŏ jơngum hrom-bơyan bơnga thun 2022. Ƀơi hơdră anai, hơmâo 360 čô mơnuih mut phung, jing ƀing mă bruă apah ƀong prăk blan samơ̆ anŏ tơnap tap arăng ƀơk brơi gơnam hăng rơnoh prăk mơ̆ng 500 rơbâo truh 1 klăk. Rơngiao kơ anun, anom bruă mơnuih tơpuôl amăng anih tuh tia pơkra pơjing-anih bơwih ƀong huă tơring čar Kon Tum ăt ƀơk gơnam 200 anung gơnam brơi kơ mơnuih mă bruă mut phung.

Ayong Trần Duy Hưng, mă bruă ƀơi kông ty Tuh pơ alin pơđĭ kyar jơlan glông  Kual bơwih ƀong huă tơring čar Kon Tum hơmâo dua čô ană ruă nuă, sang anŏ tơnap tap biă mă brơi thâo:

“Thun 2022, anih mă bruă ăt ngă gêh găl djru ba djop mơ̆n jơlan hơdră pioh kơ mơnuih mă bruă. Kâo bơni kơ djop khul grup mơnuih tơpuôl, biă mă ñu anom bruă mơnuih tơpuôl hơmâo djru kơ mơnuih mă bruă sang anŏ tơnap tap. Sang anŏ kâo hơmâo dua čô ană duam ruă ăt hơmâo laih gơnam pơphun ƀong têt ƀiă tui tơđar hăng trơi pơđao yâo mơak hrom hơbit”.

Ngă tui bruă ngă djru ba bơyan têt Qúy Mão thun 2023, hlăk ai tơring čar Dak Lak pok pơhai ngă tui lu hơdră phrâo, anăp nao kơ lu khul grup mơnuih hơmâo tơlơi truh phara amăng sang anŏ. Djă hla hră djru gơnam hăng rơnoh 500 rơbâo prăk, amai H’No Kƀuôr, dŏ pơ ƀôn Kmrơ̆ng Prong A, să Ea Tu, plơi prong Ƀuôn Ma Thuôt, đing nao ƀing hyu djru arăng lăi pơthâo gơnam sĭ mơdrô amăng anih lăi siêu thị anet pioh ruah mă gơnam kiăng blơi či yua. Ñu lăi:

“Hơmâo tơlơi djru mơ̆ng khua khul mơnuih bum mơta kah hăng ƀing hơmâo pran jua čơmah djru ba, ƀrô djơ̆ bơyan ƀong têt  hơmâo grup djru tơlơi khăp pap djru kâo gơmơi hơmâo tŭ mă soh gơnam djru gơñu brơi kơ gơmơi. Kâo ƀuh hơdră anai yôm biă mă, mơak hăng trơi pơđao, djru gơmơi hăng ding kơna pơkŏn, sa črăn juh alum pran jua kah hăng sa tơlơi mơak ƀiă mơ̆ng drơi jăn gơmơi”.

Hăng rĭm hla hră rơnoh prăk 500 rơbâo, mơnuih tŭ mă gơnam djru ruah mă gơnam blơi ƀong mơñum hơmâo dưm laih amăng siêu thị anet kah hăng: sik, ia tơsâo rơmô, braih huă, boh mơnŭ, mì tôm, ƀañ kĕo...Thun anai, hơdră anai pioh djru ba 700 pok hră blơi gơnam, ƀơk mơnuih ƀun rin ƀơi plơi prong Ƀuôn Ma Thuôt hăng plơi prong Ƀuôn Hô.

H’Giang Niê, Khua git gai hlăk tơdăm dra mut phung tơring čar Dak Lak brơi thâo, hrom hăng siêu thị anet têt zero prăk, ră anai hơmâo 22 anom bruă khul grup mơnuih tơpuôl amăng tơring čar lêng pơphun bruă mă anăp nao djru mơnuih ƀun rin, phun ñu: pơkă lăng tơlơi duăm ruă hăng ƀơk ia jrao soh sel đôč, ƀơk mơnong ƀong huă, man pơdong sang hơdor tơngia, jao rơdêh tang rơwang, prăk hrăm hră....Anai lĕ, hơdôm bruă mă yôm biă djru hrom tơring čar kiăng gum ba mơnuih ƀun rin đah mơ̆ng hơmâo gơnam ƀong têt, čơkă thun phrâo.

“Gơmơi đing nao hlâo hloh anun lĕ mơnuih mă bruă, ƀun rin hăng biă mă ñu ƀing čơđai muai sang anŏ tơnap tap. Thun anai gơmơi pơtong lăng hơmâo dơ̆ng khul mơnuih lĕ tơhan hơđăp tơdơi kơ tơbiă mơ̆ng tơhan. Ƀing anai yơh kiăng ngă klă bruă djru ba, kiăng gơñu kjăp pơtrut ba ƀing tơhan dŏ mă bruă. Ƀing tơhan abih thun mă bruă, glăi dŏ amăng plơi pla khom đing nao kơ ƀing gơñu, ngă hiư̆m pă ƀuh glông bruă kơđi čar hăng abih bang mơnuih mă bruă hơmâo tơlơi djru ba mơ̆ng djop anom bruă ping gah, pơtrut pran jua amăng thun 2023 ăt gir run amăng bruă bơwih ƀong huă ăt kah hăng ngă hrom amăng bruă mă khul grup tơdăm dra hlăk ai amăng tơring čar”.

Anom bruă mơnuih tơpuôl tơring čar Dak Lak ăt pơphun lu Hơdră Têt jơngum hrom mơak thun 2023 hăng akŏ ñu  “Têt jơngum hrom mơak-Bơyan bơnga lir hơbit”. Mơ̆ng anun, pơdah rai tơlơi khăp pap, tơlơi djru ba đing nao mơ̆ng djop anom bruă mơnuih tơpuôl hăng mơnuih mut phung, mă bruă apah sang anŏ tơnap tap, mơnuih hơmâo tơlơi ruă kraih, hơmâo tơlơi truh lơ̆m mă bruă....kiăng kah pơpha ƀiă tơlơi tơnap kơƀah mơnong ƀong huă čơkă têt thun phrâo Qúy Mão 2023 mơak mơai trơi pơđao. Ƀơi hơdră, ƀing mă bruă apah mut phung, dưi lăng hơdră adoh suang mơak Ping gah, mơak bơyan phang, bưp ră ruai, mă mrô djơ̆ tơlơi apah bơni ngui ngor, tŭ mă gơnam. Ƀrô djơ̆ tal anai, anom bruă mơnuih tơpuôl tơring čar Dak Lak jao 5 boh sang mơnuih tơpuôl djru , sa boh sang 50 klăk prăk brơi sang anŏ tơnap tap ƀun rin aka ƀu hơmâo sang dŏ hăng ƀơk 500 anung gơnam brơi kơ mơnuih mă bruă apah mut phung mơnuih tơpuôl.