Ơi Nguyễn Chu Hồi, Khua pơ ala mơnuih ƀon sang ƀôn prong Hải Phòng brơi thâo bruă dưm dăp man pơdong đơ đam dêh čar hơmâo lu anŏ pơplih phrâo, hrŏm hăng dưm dăp man pơkra jơlan glông, amăng anun kiăng pơsir bruă kơƀah jơlan pơkuh nao rai ƀơi hơdôm boh tơring čar kual kơdư hăng tong krah. Ñu brơi thâo dong, bruă dưm dăp man pơdong hơmâo sem lăng anih bruă man pơkra anih anom pơkŏn kiăng lăp djơ̆ hăng thun blan bơwih ƀong mrô hăng wai pơgang ayuh hyiăng rơhuông adai hăng hơdôm anih wai pơgang đang glai kiăng hrưn đĭ kơtang amăng bruă bong glăi ayuh hyiăng pơplih sat.

“Jơlan glông pơkuh nao rai hơdôm kual ră anai ƀu djơ̆ kơnong brơi kơ rơdêh ôtô, rơdêh por đôč ôh mơ̆ ăt pơlir plang internet dong. Anih anom jơlan glông tal 3 lĕ bong glăi ayuh hyiăng pơplih sa, ră anai hơmâo anih anom tui hơđăp, khŏm pla glăi glai, hơmâo kual glai ter hang ia rơsĭ kiăng pla ƀiă hơdôm anŏ bơbeč sat mơng ayuh hyiăng rơhuông adai. Tơlơi anai pơdah bruă dưm dăp man pơdong đơ đam dêh čar lăp djơ̆ hăng tơlơi kiăng ră anai hăng glăk hơdai nao mă yua djop gơnam măi mok, hăng dưi mă yua boh thâo phrâo klă hloh”.

Hrŏm hăng anun ơi Bùi Hoài Sơn, Khua pơ ala mơnuih ƀon sang ƀôn prong Hà Nội brơi thâo, bruă dưm dăp man pơdong đơ đam dêh čar lĕ tơlơi đing nao kiăng pơlir hơbit kjăp phik hơdôm anih anom tui gru grua; đing nao pơsir hĭ lăp djơ̆ tơlơi rô nao rai kơplah wah bruă pơđĭ kyar hăng djă pioh, lăi pơthâo gru grua. Djă pioh, lăi pơthâo hơdôm anŏ yôm mơng gru grua djuai ania; pơđĭ kyar kơtang mă yua boh thâ măi mok pơjing rai gơnam tam, tơlơi bơwih bơwang hơmâo anăn apăn, tơlơi đăo gơnang hăng tơlơi bơdjơ̆ nao amăng kual hăng jar kmar, djơ̆ hăng tơlơi pơtrun mơng Jơnum Ping gah tal 13.

“Bruă dưm dăp man pơdong đơ đam dêh čar hơmâo hơdôm tơlơi yôm phăn amăng bruă gru grua hăng sit biă ñu ƀing ta hơmâo đing nao bruă dưm dăp man pơdong gah gru grua. Tơdah ƀing ta hơmâo anŏ dưm dăpman pơdong gah gru grua lăp djơ̆ anun lĕ hơdôm sang djă pioh, sang adôh suang, sang pơđok hră, pơdă prưng…anai lĕ akŏ phun kiăng ƀing ta pơphun hơdôm tơlơi ngui adôh suang djơ̆ hăng tơlơi pơđĭ kyar lŏn ia. Samơ̆ ăt kiăng hơmâo dong tơlơi pơgôp pơkŏn hăng ƀing ta hơmâo lu kual gru grua phara hơmâo hơdôm anŏ yôm phara. bruă dưm dăp man pơdong đơ đam dêh čar amra dưi ngă hăng lăp djơ̆ hăng anŏ yôm mơng dêh čar lơ̆m gơnang nao hơdôm rơnoh yôm mơng gru grua.”

Arăng brơi thâo bruă dưm dăp man pơdong đơ đam dêh čar rơwang thun 2021-2030, anăp nao truh thun 2050 lĕ sa amăng hơdôm boh tơhnal ječ bơdjơ̆ nao bruă dưm dăp man pơdong tui hluai kual, ƀon lan, ơi Lê Hữu Trí, Khua pơ ala mơnuih ƀon sang tơring čar Khánh Hòa lăi rơđah:

“Hluai tui hơdôm tơlơi phiăn dưm dăp man pơdong, sit biă ñu dưm dăp man pơdong đơ đam dêh čar kiăng pơtrun tañ biă kiăng ngă akŏ phun brơi hơdôm boh ƀon lan ba tơbiă hơdôm hơdră dưm dăp man pơdong gưl tơring čar, gah yŭ tơring čar. Samơ̆ yôm hloh lĕ bruă anai amra kaih ƀiă hơdôm yôm phăn biă ñu lĕ ngă klă, tơlơi pơmĭn hăng anăp nao sui thun kiăng lŏn ia pơđĭ kyar tañ amơ̆ hơđong amăng bơwih ƀong huă kah hăng pơđĭ kyar hơdôm mơta bruă hơđong kjăp amăng mơnuih mơnam, amăng rơwang anai hăng anăp nao truh thun 2050”.

Amăng jơnum ƀu tui tơđar lok 2 Khua pơ ala mơnuih ƀon sang dêh čar tal 15, pô pơ ala brơi Khua dêh čar, Khua ding jum kơčăo bruă hăng tuh pơ alin Nguyễn Chí Dũng lăi pơthâo hră mơ-it đĭ kơ bruă dưm dăp man pơdong đơ đam dêh čar rơwang thun 2021-2030, anăp nao truh thun 2050. Tui anun, bruă dưm dăp man pơdong đơ đam dêh čar rơwang thun 2021-2030, anăp nao truh thun 2050, ba tơbiă hơnong pơkă truh thun 2020 Việt Nam lĕ dêh čar glăk pơđĭ kyar hơmâo mă yua boh thâo măi mok phrâo, pơhrui rĭm akŏ mơnuih lu ƀiă, rơnoh pơđĭ kyar bơwih ƀong huă hluai tui bruă mă yua boh thâo phrâo, thâo pơčeh phrâo hăng pơplih mrô; hơbô̆ bruă pơphun anih anom pơđĭ kyar dêh čar tŭ yua, ha amăng plĕ, hơđong kjăp, pơjing hơdôm kual, anih anom bơwih ƀong, plơi prong ba jơlan hlâo, dưi pơlir hơbit kơplah wah djop kual, pơplih phrâo; pơhlôm bơkơnar, bong glăi ayuh hyiăng pơplih; tơlơi hơdip mơda kơ mơnuih ƀon sang hrưn đĭ, pơhlôm rơnuk rơnua, hơđong lŏn ia.