Hơdôm gưl hơdôm gơnong bruă ƀơi tơring čar Gia Lai glăk kơtưn lăi pơhing kơ hơdră bruă hră pơgang gah ia jrao, hrưn đĭ truh rơnuč thun 2023 mrô mơnuih blơi yua hră hmâo 90%. Tui hăng Anom bruă wai lăng hră pơgang mơnuih mơnam tơring čar Gia Lai, yap truh blan 7/2023, đơ đam tơring čar Gia Lai hmâo năng ai ñu 1 klăk 290 rơbâo čô mơnuih (90% mrô mơnuih ƀôn sang) blơi hră pơgang gah ia jrao, đĭ rơbêh kơ 5% bơhmu hăng thun hlâo, Amăng anun, mrô mơnuih djuai ania ƀiă hmâo rơbêh kơ 75%.

Kiăng đĭ tui mrô mơnuih blơi yua hră pơgang, Khul Khua pơ ala mơnuih ƀôn sang tơring čar Gia Lai hmâo mă yua Tơlơi pơtrun pơsit 48 kơ djru mơnuih ƀôn sang blơi hră pơgang gah ia jrao hăng sa dua čô mơnuih ƀơi tơring čar rơwang mơng thun 2023-2025. Kiăo tui anun, mơng akô̆ thun truh ră anai, tơring čar Gia Lai hmâo rơbêh kơ 170 rơbâo čô mơnuih hăng čơđai sang hră djuai ania ƀiă dưi djru prăk blơi hră pơgang gah ia jrao. Hrom hăng anun, hơdôm gưl, hơdôm gơnong bruă kơtưn lăi pơhing truh ƀơi kual asuek, ataih, kual djuai ania ƀiă kiăng mơnuih ƀôn sang thâo rơđah bôh tŭ yua lơm blơi hră pơgang gah ia jrao./.