Rơbêh 3 blan anai, lơ̆m truh 6 mông tlam mơmŏt mơng hrơi sa truh pơ hrơi rơma rĭm thun, anih pơtô đok-čih ƀơi sang hră gưl I Ngô Quyền (phường Chi Lăng, plơi prong Pleiku jă bang apui kơđen hăng hmư̆ arăng hrăm pơđok. Anih pơtô hơmâo 30 čô mơnuih hrăm ƀơi plơi Ia lang, phường Chi Lăng, plơi prong Pleiku. Tơdơi hrăm čih tui hơdôm boh hră nai črâo brơi hăng kơƀang, amai H’Thiếu, ñu lĕ amĭ 3 čô ană laih glăk kiăo tui hrăm, ñu brơi thâo:

“Hlâo anun, sang anŏ gơmơi tơnap tap biă mă, ama kâo rơngiă sui laih, sang anŏ rin rơpa yua anun ƀu dưi nao sang hră ôh, ƀu thâo boh hră. Phrâo anai, hơmâo khua plơi, phường hăng gah sang hră nao pơ alum pran jua, kâo gir run kiăo tui hrăm. Samơ̆ hơdôm hrơi blung a hrăm čih glêh tơnap biă mă mơn, samơ̆ kâo hor hrăm đok, hrăm čih, yua anun amra gir run kiăo tui hrăm”.

Ƀơi anih pơtô hrăm, yă H’Lung (57 thun, dŏ ƀơi plơi Ia Lang, phường Chi Lăng) ăt glăk dŏ hrăm čih boh hră. Yă H’Lung brơi thâo, yua thun tha laih, yua anun ñu hrăm kaih ƀiă pơhmu hăng ƀing dŏ hlăk ai, samơ̆ hăng pran gir run, khŏm kiăng thâo boh hră, ñu gir kơtir kiăo tui hrăm rĭm hrơi. Ră anai ñu thâo đok, thâo čih anăn ñu pô laih.

“Kâo ƀu thâo čih, ƀu thâo jŭ yap hơget ôh, ră anai dưi hrăm boh hră, thâo čih anăn pô, kâo hok mơ-ak biă mă, bơni kơ ƀing nai hơmâo pơtô brơi kơ kâo hăng abih bang”.

Tui nai Dương Thị Kiếu - Sang hră gưl I Ngô Quyền, phường Chi Lăng, plơi prong Pleiku, tui hơduah ĕp jang jai mơng sang hră brơi ƀuh, plơi Ia Lang hơmâo giăm 100 čô mơnuih aka ƀu thâo boh hră. Lơ̆m pơtrut pơsur pran jua tơl hơdôm anih pơtô hrăm brơi lu mơnuih dŏ hŭi, mlâo yua thun tha laih, sa, dua čô pơkŏn ăt dŏ hŭi yua hrăm kaih. Samơ̆, tơdơi kơ kiăo tui hrăm, abih bang mơnuih lêng kơ hor soh, ƀơƀrư̆ ƀuh lu dong mơnuih kiăo tui hrăm.

“Anih pơtô hrăm lu hloh lĕ ƀing mơnuih tha, sang anŏ tơnap tap yua dưi nao hrăm hră, lơ̆m nao hrăm ƀing gơñu ăt tơnap mơn samơ̆ hlơi hlơi lêng kơ gir kơtir mah yang hrơi rơ-ŏt rơ-ơ̆, ƀudah hơjan hlim, hlơi hlơi lêng kơ nao hrăm hră soh. Ră anai abih bang lêng kơ thâo čih soh, bơ pơđok mơnuih thâo đok rơbêh ha mơkrah yơh”.

Kar kăi tui anun mơn, Sang hră gưl I Lê Lai (să Chư Á, plơi prong Pleiku) lĕ 1 amăng 7 boh sang hră amăng plơi prong hơmâo ruah ngă tui bruă jao pơtô đok hăng čih brơi mơnuih djuai ania ƀiă tui jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng kual čư̆ siăng rơwang thun 2021-2030.

Nai Lê Minh Tùng - Khua sang hră gưl I Lê Lai brơi thâo, sang hră hơmâo gum hrŏm hăng Jơnum min mơnuih ƀon sang să Chư Á hăng hơdôm plơi pla pel ĕp glăi mrô mơnuih djuai ania ƀiă aka ƀu thâo đok, thâo čih mơng 15 truh truh 60 thun, kiăng pơtrut pơsur neh met wa nao hrăm.

“Sang hră ăt hơmâo akŏ pơjing grup hyu pơtrut pơsur ƀing mơnuih mơng 15 thun truh 60 thun nao hrăm hăng truh ră anai lĕ hơmâo 23 čô mơnuih nao hrăm. Jơlan hơdră pơtô brơi boh hră hơmâo pơpha jing 2 rơwang, rơwang tal sa hơmâo 3 tal, dưm dưm hăng hrăm anih 4 hăng anih 5 amra pơgiong jơlan hơdră anai”.

Kơnong amăng thun anai, gơnong bruă pơtô pơjuăt tơring čar Gia Lai amra gum hrŏm hăng Anom bruă djuai ania hăng hơdôm anom bruă bơdjơ̆ nao pơphô bruă brơi Jơnum min mơnuih ƀon sang tơring čar kah pha prăk kak brơi hơdôm boh ƀon lan kiăng kơ pok 217 anih pơtô hrăm brơi 6.500 čô. Ơi Nguyễn Văn Đông - Khua anom bruă pơtô pơjuăt sang hră gưl I, sang hră čơđai muai, Gơnong bruă pơtô pơjuăt tơring čar Gia Lai brơi thâo:

“Anai lĕ jơlan hơdră ngă tơlơi hơdip kơ mơnuih djuai ania ƀiă lăi phara hăng tơring čar Gia Lai hnun mơn dưi hrưn đĭ tơlơi thâo thăi mơng anun amra pơklaih mơng ƀun rin, hrưn đĭ tơlơi hơdip mơda brơi ƀing gơñu. Ră anai jơlan hơdră anai hơmâo jao brơi hơdôm boh tơring glông, plơi prong, sa, dua anom bruă hơmâo pơƀut glăi mơnuih kiăng juăt hrăm tui jơlan hơdră. Pơ anăp anai jơlan hơdră amra pok prong hăng pok pơhai djop anih ƀơi hơdôm boh ƀon lan”.

Tui hăng akŏ bruă ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă - mơnuih mơnam kual mơnuih djuai ania ƀiă hăng kual čư̆ siăng rơwang thun 2021-2025, tơring čar Gia Lai pơphun 735 anih pơtô đok-čih brơi giăm 23.500 čô mơnuih ƀơi 176 boh să.