Amăng mrô 22 per tơlang tơleh tơhan djai pơsăn drơi hơmâo pơƀut ba glăi amăng bơyan phang thun 2022-2023, hơmâo 8 per tơlang tơleh ĕp ƀuh ƀơi tơring čar Stung Treng. Ƀơi Ratanakiri hăng Preh Vihear, rĭm boh tơring čar ĕp ƀuh 7 per tơlang tơleh. Truh ră anai, grup K52 Gia Lai hơmâo ĕp ƀuh, klơi pơƀut, ba glăi 1.468 per tơlang tơleh tơhan, ƀing mơnuih djru bruă mơng Việt Nam djai pơsăn drơi amăng rơnuk blah wang.

Amăng mông ngă lơphet, khua mua tơring čar Gia Lai, djop gơnong bruă, anom bruă, khul grup, ƀing pơ ala brơi abih bang mơnuih ƀon sang, ling tơhan amăng tơring čar Gia Lai ol kơdol pran jua čơkă mă tơlang tơleh ling tơhan ba glăi dor. Amăng hrơi mông yôm phăn, ƀing khua mua hơmâo dưm guang bơnga, tŭi ñang, pơdah pran jua hơdor tơngia mơng mơnuih ƀon sang Việt Nam hăng hơdôm tơlơi gum pơgôp prong prin mơng ling tơhan djai pơsăn drơi yua kơ tơlơi rơngai kơplah wah dua boh dêh čar Việt Nam-Kur.