Ƀơi mông jơnum, ƀing khua hơmâo pơgôp hiăp lu tơlơi yôm kơ Tơlơi phiăn lŏn tơnah (pơkra glăi). Khua mua hơdôm boh tơring čar kual Dap Kơdư hăng tơring čar Ninh Thuận, Bình Thuận brơi thâo, tơdơi kơ hơmâo Tơlơi pơtrun mrô 671/NQ-UBTVQH15 lơ 23/12/2022 mơng Jơnum min khua gum bruă git gai pơ ala mơnuih ƀon sang dêh čar hăng Akŏ bruă mơng Kơnuk kơna kơ bruă mă tơlơi pơgôp hiăp mơng mơnuih ƀon sang hăng Tơlơi phiăn Lŏn tơnah (pơkra glăi), hơdôm boh tơring hơmâo pơphun lu tơlơi jơnum, hơmâo lu glông pôr pơhing, mă tơlơi pơgôp hiăp mơng lu mơnuih ƀon sang.

Hơdôm bruă yôm phun mơng Tơlơi phiăn kah hăng: Pơkă hơnong, hơdră mă yua lŏn, pơhrui glăi lŏn tơnah hăng hơdră duh lŏn, djru pơdong plơi phrâo; pơđĭ tui mrô lŏn pơđom lui, brơi arăng apah yua lŏn, pơplih bruă yua lŏn; čih anăn mă yua lŏn tơnah, brơi hră pơsit dưi mă yua hăng hră pơ-ar bơdjơ̆ nao lŏn tơnah; tơlơi phiăn, hơdră pơkă nua lŏn; hơdră wai lăng, mă yua djŏp mơta lŏnj tơnah; jao wai lăng tui rim gưl bruă; sang anŏ mă yua lŏn tơnah...hơmâo mông jơnum pơblang rơđah, pơgôp hiăp kiăo tui tơlơi hơmâo sit nik, kiăo tui lŏn tơnah ƀơi kual Dap Kơdư.

Hơdôm tơlơi pơgôp hiăp lăi, kual Dap Kơdư ñu phara, biă ñu gru grua mơng đưm hlâo, mơnuih ƀon sang đuăi hyu dŏ tui hluai, jing kual hơmâo lu mơnuih ƀon sang djuai ƀiă, lŏn glai yơh lu biă mă...Yua hnun,  khŏm pơkă rơđah, ƀu dưi pơrơkua nao rai hăng tơlơi phiăn pơkŏn ôh. Biă ñu lĕ wai lăng lŏn ngă hmua, đang glai, jơlan hơdră brơi lŏn kơ mơnuih ƀon sang djuai ƀiă, pơkă nua lŏn djơ̆ hăng nua ƀơi anih sĭ mơdrô....Ơi Nguyễn Ngọc Sâm, Kơ-iăng khua Jơnum min mơnuih ƀon sang tơring čar Kon Tum, lăi tui anai:

“Tơdơi kơ ngă tui Tơlơi pơtrun mrô 118 jing tơring čar Kon Tum hơmâo dưm dăp glăi mrô lŏn tơnah hơmâo arăng gô̆ mă, mrô lŏn mơng kông ti ƀu mă yua lĕ jao glăi kơ plơi pla wai lăng. Ră anai tơlơi tơnap hloh lĕ pơsir lŏn anai yua dah lu mơnuih mă yua lŏn amăng đơ đam lŏn anai, mă yua soh tơlơi kiăng. Tơdơi kơ hơmâo tơlơi phiăn lŏn tơnah pơkra phrâo kiăng hơmâo hơdră ngă bruă rơđah rơđông, kiăng hơmâo tơlơi phiăn pơsir bruă mơnuih mă yua lŏn tơnah anai, pô hlơi ƀu dưi mă yua, hrơi pơkă brơi apah mă yua lŏn, ƀudah brơi mă yua hlao hiư̆m pă”.

Pơhiăp ƀơi mông mă bruă, Kơ-iăng khua Ding jum Kông ngăn lŏn tơnah hăng Ayuh hyiăng Lê Minh Ngân brơi thâo, truh mông anai, hơdôm boh tơring čar ƀon prong amăng dêh čar hơmâo pơtrun laih Akŏ bruă pơphun mă tơlơi pơgôp hiăp mơnuih ƀon sang hăng Tơlơi phiăn Lŏn tơnah (pơkra glăi). Lu tơring čar hơmâo pok pơhai truh pơ să.

Tui hăng ơi Lê Minh Ngân, Ding jum kông ngăn lŏn tơnah hăng Ayuh hyiăng amra tañ lăi pơthâo hră tum pơƀut glăi tơlơi pơgôp hiăp mơng  mơnuih ƀon sang kơ Tơlơi phiăn mơng hơdôm tơring čar, Ding jum anom bruă kơ Jơnum min Bơwih ƀong huă, Jơnum min Tơlơi phiăn mơng Ƀirô khua pơ ala mơnuih ƀon sang dêh čar. mơng anun, hơdôm anom bruă mơng Ƀirô khua pơ ala mơnuih ƀon sang dêh čar ăt krăo lăng mơn bruă pơhmư̆ tui, lăi pơthâo glăi tơlơi pơgôp hiăp mơng mơnuih ƀon sang mơng anom bruă čih pơkra tơlơi phiăn. Pơhlôm pơkra tơlơi phiăn lŏn tơnah djơ̆ hăng tơlơi kiăng pơđĭ kyar mơng lŏn ia, djơ̆ hăng tơlơi kiăng mơng mơnuih ƀon sang hăng bruă mơ̆ Tơlơi pơtrun mrô 18 - NQ/TW lơ 16.6.2022 kơ “Pơplih phrâo, ngă pơgiong djŏp tơlơi phiăn, hơdră djru, pơđĭ tui anŏ klă, boh tŭ yua wai lăng hăng mă yua lŏn tơnah, kiăng dêh čar ta jing dêh čar pơđĭ kyar hơmâo prăk pơhrui lu” tui hăng tơlơi ba tơbiă kiăng ngă. Ơi Lê Minh Ngân, Kơ-iăng khua Ding jum Kông ngăn lŏn tơnah hăng Ayuh hyiăng lăi:     

“Khŏm pơsit bruă mă tơlơi pơgôp hiăp mơng  mơnuih ƀon sang hăng tơlơi phiăn lŏn tơnah tal anai jing hrơi jơnum bruă kơđi čar, mơnuih mơnam prong amăng abih bang bruă. Mơng tơlơi ngă bruă hăng hơdôm tơring čar ƀơi mông jơnum hrơi anai, hơdôm boh tơring lăi pơthâo hơmâo lăi pơthâo truh pơ să, kiăng ƀing ta lăp ba dong hơdôm tơlơi phara phara mơng kual Dap Kơdư. Ding jum kông ngăn lŏn tơnah hăng ayuh hyiăng bơni kơ ƀing khua mua hơdôm boh tơring hơmâo jơnum hrơi anai, hăng pran jua gơgrong bruă prong, hơdôm tơlơi pơgôp hiăp hơmâo prăp lui klă, hơmâo tum pơƀut mơng lu bruă đah mơng pơgôp hiăp klă kơ anom bruă čih pơkra tơlơi phiăn anun lĕ Ding jum kông ngăn lŏn tơnah hăng ayuh hyiăng amăng bruă tum pơƀut tơlơi pơgôp hiăp mơng mơnuih ƀon sang hăng ngă hră lăi pơthâo glăi tơdơi anai”.