Tui hăng rơnoh jao wai lăng 10.000 ha glai ƀơi să Ia Mơr, tơring glông Čư̆ Prong, Khul wai lăng glai rưng pơgang plơi Ia Meur, kiăng hơmâo 17 čô mơnuih mă bruă kah djop. Samơ̆, amăng lu thun rơgao, anom bruă anai kơnong hơmâo 12 čô mơnuih mă bruă đôč. Mă bruă wơ̆t hrơi, mlam amăng anih dŏ hŭi rơhyưt, tơnap tap, yua arăng ngă soh glăi bruă pơgang glai rưng jai hrơi kơtang amăng tơring čar, samơ̆ rơnoh prăk blan ƀiă đơi, ƀing khua mua hăng mơnuih mă bruă, prăk blan sa čô mơ̆ng 5-7 klăk sa blan. Ơi Đinh Văn Khẩn-Khua khul wai lăng glai rưng pơgang plơi Ia Meur, 1 amăng 5 čô mơnuih amăng khul, čih hră rơkâo pơdơi bruă thun 2022, samơ̆ aka ƀu pơsir brơi ôh, ñu brơi thâo:

“Bruă mă pơgang glai rưng tơnap tap biă mă, ƀơi anih khul wai lăng glai Ia Meur lĕ jai tơnap hloh, giăm bơnư̆ pơkong ia Ia Mơr. Hơmâo klâo hnoh ia arăng pơđoh treng glai, mơnuih ƀôn sang ƀuh tui anun yơh kiăng hơmâo lŏnči  ngă hmua, pla pơjing. 2 čô mơnuih pơdơi baih. Ră anai, hơmâo mơnuih ngă hră rơkâo pơdơi dơ̆ng ƀu hơmâo mơnuih mă bruă dơ̆ng tah kơñ pơgi”.

Tơnap lĕ, tui anun, prăk blan lĕ ƀiă, mơnuih mă bruă pơgang glai rưng dŏ bưp lu tơlơi lông lăng pơ anăp anŏ hŭi rơhyưt. Ơi Đinh Mạnh Phong-Khua wai lăng glai klô pơgang plơi tơring glông Čư̆ Sê brơi thâo, ră anai, sa čô mơnuih ngă bruă pơgang sa blah kual lŏn glai truh 1000 ha. Glai klô čư̆ čan ataih mơ̆ng plơi pla mơnuih ƀôn sang dŏ, jơlan nao rai tơnap tap. Ƀing klĕ dŏp uă kyâo, jah drôm glai amra ngă sat glăi kơ mơnuih mă bruă tơdah ƀuh gơñu, samơ̆ tơhan pơgang glai jing mơnuih ƀiă, tơdu hloh kơ ƀing klĕ dŏp:

“Hơdôm čô adơi ayong ruă nuă yua ƀing dŏp uă kyâo taih, ngă sat anun bơbeč truh tơlơi pơmin mă bruă ƀu hơđong. Tơlơi dưi mơ̆ng khul ngă bruă aset đơi, kơnong tơdah ƀuh lĕ lăi pơthâo đôč. Kah hăng anom bruă gơmơi, tui hăng tơlơi pơkă khom hơmâo sum ao tơhan pơgang glai, hơmâo phao kơtuang, gơnam yua mă bruă pơgang drơi pô, prăk apah mă bruă, prăk blan ƀiă đơi, tơnap biă mă”.

Ƀơi tơring čar Gia Lai ră anai hơmâo 22 khul wai lăng glai rưng, hăng 500 čô tơhan pơgang glai samơ̆ rơnoh jao pơgang glai kiăng khom hơmâo dơ̆ng 200 čô kah djop. Mơnuih ngă bruă kơƀah, samơ̆ 2 thun rơgao, hơmâo rơbêh 20 čô mơnuih rơkâo pơdơi bruă, hơdôm hơpluh čô pơkŏn ăt hlăk ngă hră rơkâo pơdơi bruă mơ̆n.

Ơi Nguyễn Văn Hoan-Kơ-iăng Khua Gơnong bruă Đang hmua hăng pơđĭ kyar plơi pla tơring čar brơi thâo, anom bruă anai hơmâo pok pơhai lu hơdră kiăng pơkong glăi ƀing ngă bruă, tơhan pơgang glai klô, samơ̆ ăt kơnong juh alum, pơtrut pơsur pran jua đôč mơ̆n hăng tui hluai anŏ gêh găl:

“Ƀơi anăp mơta, ƀing gơmơi hơmâo pơtrut pơsur mơnuih mă bruă khăp kơ bruă đôč, gir run gơgrong dŏ glăi pioh pơgang glai klô, laih dơ̆ng ngă gêh găl pơblih nao rai anih mă bruă mơ̆ng khua mua, mơnuih mă bruă nao pơ ataih hăng glăi pơ anih giăm sang anŏ, djru nao rai tơdruă kiăng plai ƀiă nao rai pơ ataih, ngă gêh găl kơ ƀing adơi ayong dưi tŭ mă hơdră djru phrâo, hnun kah ƀing adơi ayong hơđong pran jua mă bruă”.

Ră anai, Gơnong bruă Đang hmua hăng pơđĭ kyar plơi pla hơmâo lăi pơthâo hăng Jơnum min mơnuih ƀôn sang tơring čar, rơkâo đĭ hăng gơnong dlông sem lăng, čih pơkra glăi tơlơi pơtrun djru ba, pơblih phrâo hnong djru mă bruă kơ ƀing tơhan pơgang glai rưng.