Prăk anai pioh bơwih ƀong, pơđĭ tui tơlơi hơdip kơ neh met wa pơ plơi pla tơnap tap. Tơring čar Gia Lai ră anai hơmâo rơbêh 38.500 boh sang anŏ rin, 90% amăng mrô anai lĕ mơnuih djuai ania ƀiă. Kiăng djru ba mơnuih ƀôn sang djuai ƀiă rin hơmâo tơlơi hơdip hơđong, tơring čar Gia Lai hơmâo pơphun lu jơlan hơdră brơi čan prăk mă kơmai ƀiă.

Amăng 6 blan thun 2023, Čơƀeng Sang bruă prăk djru mơnuih mơnam tơring čar Gia Lai hơmâo brơi čan 964 klai prăk hăng rơbêh 25.000 boh sang anŏ dưi čan, amăng anun mơnuih ƀôn sang djuai ƀiă rơbêh kơ 13.000 boh sang anŏ, mrô prăk čan giăm 500 klai prăk, dưm dưm hăng 52% mrô prăk čan. Giăm 1000 boh sang anŏ hơmâo djru brơi giăm 50 klai prăk pơplih bruă mă, lŏn dŏ, lŏn ngă hmua laih anun pơkra sang dŏ...Prăk brơi čan djru ba hơdôm boh sang anŏ rin, giăm rin hăng sang anŏ djuai ƀiă ƀơi Gia Lai pơsir hĭ tơlơi tơnap tap, pơđĭ kyar bơwih ƀong huă, pơđĭ tui tơlơi hơdip mơda hăng huăi rin rơpa.