Hơdôm hrơi rơnuč thun 2022, amai Kpă Xê Ra, tơkeng thun 1993, plơi Ia Mua, să Bầu Cạn, tơring glông Čư̆ Prông ăt hmâo pơkra giong mơn sang phrâo čơkă Tết. Sang dăp tal 4, kual lŏn kơnong kơ 60 met kơ rê, samơ̆ ñu ăt mơ-ak pran jua mơn. Yua kơ čơkă thun phrâo 2023, hmâo sang phrâo, ăt lĕ mông sang anô̆ ñu tơtlaih mơng sang anô̆ ƀun rin. Yôm phăn hloh, bruă dưi pơdŏng sang dô̆ brơi ƀuh sang anô̆ ñu thâo laih hơdră mă yua prăk čan ba glăi bôh tơhnal. Amai Xê Ra mơ-ak pran jua:

 “Thun anai lĕ thun blung a sang anô̆ kâo dưi tơtlaih mơng ƀun rin. Anai lĕ bôh tơhnal mă bruă mơng 2 rơkơi bơnai, hăng tơlơi gum djru mơng ngăn rơnoh hơdră bruă gum djru. Kâo ƀu hmâo tla mơtăm ôh mơ̆, tla tui ƀơƀrư̆, anun amra tuh pơplai bơwih brơi phun kơ phê, pơđĭ tui bruă bơwih ƀong huă. Kâo mơ-ak biă”.

 Thâo hơdră mă yua prăk čan, ayong Rmah Pya, tơkeng thun 1972, ƀơi grŭp 6 tơring kual Čư̆ Prong, tơring glông Čư̆ Prong ăt mơ-ak laih tơtlaih mơng ƀun rin. Ñu brơi thâo, tal blung a ñu khin čan prăk lĕ amăng thun 2008, hăng mrô prăk kơnong kơ djop blơi 1 drơi rơmô. Ƀuh rông hlô hmâo kơmlai, tal čan tô̆ tui, Rmah Pya khin hơtai čan 30 klăk prăk, laih anun 50 klăk prăk pioh tuh pơplai bơwih brơi kơ phê, pơjing pŭ be. Ră anai, lăng glăi rơbêh kơ 10 thun mă yua prăk čan, ñu ƀuh tơlơi khin hơtai mơng pô thun hơpă ba glăi laih bôh tơhnal klă:

 “Kâo čan prăk gah hơdră bruă lu thun laih. Blung a lĕ biă, tơdơi kơ anun lu tui, yua kơ pô ƀuh ngăn rơnoh tŭ yua kơ sang anô̆ ƀun rin kah hăng kâo biă. Hơdôm thun rơgao, gơnang kơ ngăn rơnoh čan, kâo dưi pơdŏng sang, rông rơmô, be hăng blơi prăp gơnam mă yua amăng sang”.

  Tui mrô yap mơng Sang prăk gah hơdră bruă mơnuih mơnam tơring čar Gialai, tơdơi 20 thun mă bruă, sang prăk hmâo pok pơhai lu anih ngă hră brơi čan prăk truh pơ̆ rơbêh kơ 220 bôh să, amăng abih bang 17 bôh tơring glông, plơi prong amăng tơring čar Gialai. Hrom hăng anun lĕ, rơbêh kơ 3.300 grŭp pơkrem hăng čan prăk. Hăng jơlan gah lăi pơhing dơlăm, lăng juăt, hơdôm hơdră grŭp pơkrem prăk lĕ jơlan tô hyu djru ngăn rơnoh čan mă kơmlai ƀiă mơng kơnuk kơna truh tơl tơngan mơnuih ƀun rin. Hluai tui 17 jơlan hơdră brơi čan prăk prong, anom bruă pok pơhai brơi rơbêh kơ 225.000 wot bôh sang anô̆ ƀun rin, ƀun rin ƀơƀiă rơbêh kơ 16.800 klai prăk. Khua Sang prăk gah hơdră bruă mơnuih mơnam tơring čar Gialai Lê Văn Chí brơi thâo, ră anai, sang prăk glăk gir run đing nao ba prăk ngăn drăp tơring čar jao tui hluai tui Sang prăk gah hơdră bruă mơnuih mơnam pioh brơi čan sang anô̆ ƀun rin hăng hơdôm mơnuih gah hơdră bruă:

 “Sang prăk gah Hơdră bruă mơnuih mơnam tơring čar Gialai iâu pơhrui djop ngăn rơnoh pioh pok prong brơi čan hơdôm sang anô̆ ƀun rin, hơdôm mơnuih gah hơdră bruă pơkon amăng tơring čar. Anom ăt amra gum hrom mơn hăng hơdôm gơnong bruă, anom bruă, hơdôm khul grŭp kơđi čar mơnuih mơnam pioh ba ngăn rơnoh čan truh djơ̆ mơnuih dưi čan. Wai lăng ngăn rơnoh čan, pơtô brơi, pơsur sang anô̆ čan khin hơtai čan bơwih ƀong huă kiăng pơđĭ kyar bơwih ƀong huă. Pơtô brơi sang anô̆ čan mă yua djơ̆ bôh than, ba glăi bôh tơhnal, djru brơi mơnuih ƀun rin hăng hơdôm mơnuih gah hơdră bruă pơkon pơđĭ kyar bơwih ƀong huă, hơđong tơlơi hơdip mơda hăng hrưn đĭ tơtlaih mơng ƀun rin kơjăp phik”.

Dưi pơtŏng sit lĕ, amăng hơdôm thun rơgao, ngăn rơnoh gah hơdră bruă brơi čan prăk hmâo ngă tui ba glăi laih bôh tơhnal bruă mă, pơjing rai hơdôm tơlơi pơplih klă hăng tơlơi hơdip mơda bơwih ƀong – mơnuih mơnam ƀơi Gialai, biă ñu amăng kual djuai ania ƀiă. Pơ̆ anăp anai, anai ăt amra jing mơn sa amăng hơdôm anih gơnang pioh tơring čar pok pơhai ba glăi bôh tơhnal hơdôm hơdră bruă hrŏ trun ƀun rin, pơdŏng plơi pla phrâo; hrom hăng anun lĕ pô gum hrom mơng mơnuih ƀun rin, djru gơñu hrưn đĭ amăng tơlơi hơdip mơda, pơjing kơ pơgi kơdih anai trơi pơđao, yâu mơ-ak hloh./.