Mơng anun, bruă pơlar mơnuih ping gah ƀơi tơring čar hmâo yak pơplih klă, djru pơđĭ tui bôh thâo git gai mơng Ping gah amăng pơđĭ kyar bơwih ƀong mơnuih mơnam, pơhlôm pơgang rơnuk rơnua plơi pla ƀơi tơring čar.

Lăi pơthâo kơ bruă hrưn đĭ kiăng dŏng amăng khul mơnuih Ping gah, ping gah hlăk ai H’ Lăič Niê, gah Grŭp ping gah plơi Tân Thịnh, să Tân Lập, tơring glông Krông Ƀuk brơi thâo, dưi hmâo gưl Ping gah, grŭp ping gah plơi đăo gơnang, mơnuih amăng khul hlăk ai, tơdăm dra đăo gơnang jao bruă ngă Kơ-iăng Khua plơi Tân Thịnh, hơdôm thun rơgao, ñu gir run na nao ngă giong klă hơdôm bruă jao. Biă ñu hơdôm bruă khul hăng bruă hlăk ai tơdăm dra, tơdăm ngek dra muai čơđai muai ƀơi plơi pla. Rơnuč thun 2022, amai H’ Lăič Niê ư-ang dưi mut ping gah. Anai lĕ pran pơtrut prong pioh ñu lăng yôm pran jua gơgrong, tuh rơyuh pran hlăk ai djru pơdŏng Ping gah kơjăp kơtang, plơi pla klă hiam.

 “Tơdơi kơ hơdôm hrơi ƀu pơdơi hrưn đĭ kâo sit nik dŏng hăng khul Ping gah, kâo mơ-ak hăng ƀuăn mă pô amra hrưn đĭ hrăm tui, gir run pơhrăm, hrăm dong pioh jing sa čô mơnuih ping gah ba gru hlâo, hrom hăng khul grŭp lăi pơhing, pơsur pơdŏng plơi pla jai hrơi pơđĭ kyar”.

Amai H’ Lăič Niê lĕ sa amăng 5 čô mơnuih ping gah hlăk ai ƀơi hơdôm bôh plơi dưi hmâo Ping gah să Tân Lập, tơring glông Krông Ƀuk pơmut ñu mut ping gah amăng thun 2022. Anai lĕ sa tơlơi gir run prong mơng plơi pla amăng pơtô juăt, pơlar mơnuih phrâo mut ping gah lom lu tơdăm dra ƀơi hơdôm bôh plơi hyu mă bruă pơ̆ anih ataih, mơnuih ƀôn sang amăng plơi ƀu khin gum hrom hơdôm bruă khul, kơƀah tơlơi hrưn đĭ. Khă hnun hai, kiăng hmâo mơnuih tô̆ tui kơ Ping gah, Grŭp apăn bruă Ping gah să Tân Lập, tơring glông Krông Ƀuk hmâo đing nao git gai, črâo ba bruă pel ĕp, pơmut mơnuih Ping gah pơhlôm rơđah rơđông, djơ̆ phiăn, pơdah rơđah, pran pơsit ƀu ruah mơnuih ping gah tui pran pô kiăng ƀudah đuăi tui bôh tơhnal dưi ngă. Biă ñu đing nao truh mơnuih hlăk ai, khul mơnuih amăng khul, hmâo pran jua hrưn đĭ, hmâo pran jua gơgrong pơdŏng khul hăng tơlơi kiăng abih bang hơdôm khul grŭp, hơdôm grŭp khom pơhrăm na nao kơ mơnuih mut ping gah. Ơi Trần Ngọc Sơn, Kơ-iăng Khua hlăk ai tơdăm dra să Tân Lập brơi thâo:

 “Gah khul hlăk ai să ăt pơsur mơn hơdôm mơnuih amăng khul hlăk ai, tơdăm dra mơbruă, ngă tui đut hlah bôh thâo mơng mơnuih amăng khul pioh pơmut amăng ping gah hăng hmâo lu bruă mă pioh kơ ƀing tơdăm dra, hlăk ai gum hrom hơdôm bruă kơđi čar ăt kah hăng bruă mă mơnuih mơnam”.

Ping gah să Tân Lập, tơring glông Krông Ƀuk ăt pơsit mơn bruă pơlar mơnuih ping gah ƀơi plơi pla jing bruă yôm phăn, djru pơđĭ tui bôh thâo git gai, pran hrưn đĭ mơng khul ping gah. Hloh kơ anun hơdôm mơnuih ping gah dô̆ jing jơlan tô nao rai amăng pơđĭ kyar bơwih ƀong mơnuih mơnam, pơhlôm pơgang lŏn ia rơnuk rơnua plơi pla amăng să. Yua anun, hăng hơdôm anih anom hmâo tơhnal kah hăng: anih hmâo lu mơnuih djuai ania ƀiă hơđăp dô̆ hơdip mơda, hơdôm grŭp ping gah lu thun ƀu hmâo pơmut mơnuih phrâo mut ping gah, Ping gah să hmâo pơdŏng laih kơčăo bruă pơlar mơnuih ping gah, jao mrô pơkă rơđah kơ hơdôm grŭp ping gah, hơdôm khul grŭp, lăng anai lĕ sa amăng hơdôm tơhnal pơkă yôm phăn pioh pơsit, dưm dăp rim thun. Hrom hăng anun, Ping gah să pơpha mơnuih amăng ping gah nao pơhmư̆ mông jơnum ping gah ƀơi grŭp ping gah plơi pla, mơng anun thâo tơlơi, hmao pơtlaih hơdôm tơlơi tơnap amăng bruă pơlar mơnuih ping gah lăi ha jăn ăt kah hăng bruă pơdŏng Ping gah lăi hrom. Yă Cao Thị Thuý Nga, Khua git gai Ping gah să Tân Lập, tơring glông Krông Ƀuk brơi thâo:

 “Dong mơng akô̆ thun 2023 ping gah hmâo pơpha bruă mă kơ mơnuih amăng khul ping gah bruă mă lĕ hrom hăng bruă pơlar mơnuih ping gah pơdŏng hơdôm grŭp ping gah lĕ amra lăng tui hơdôm anih anom kơjăp abih bang djop mơta gah pơđĭ kyar bơwih ƀong mơnuih mơnam amăng plơi pla hăng bôh tơhnal rơnuč thun mơng hơdôm bôh plơi pla amra jing phun than pioh pơsit mơnuih apăn bruă yua kơ să jao ƀơi hơdôm bôh plơi pla”.

Pơ̆ anăp anai, Ping gah să Tân Lập, tơring glông Krông Ƀuk amra kơtư̆n git gai, črâo ba kiăng ngă tui ba glăi bôh tơhnal hloh dong bruă pơlar mơnuih ping gah ƀơi hơdôm grŭp gah plơi pla, pơhlôm tơhnal tŭ mă hăng tơlơi pơlar na nao mơng Ping gah. Hrom hăng anun, djru pơđĭ tui bôh thâo git gai hăng pran hrưn đĭ mơng khul Ping gah hăng mơnuih amăng ping gah djơ̆ tui tơlơi kiăng bruă jao amăng rơnuk phrâo./.