Kơdư čư̆ dlông hăng adai pơ-iă kơtang bơyan pơdơi prong ƀu ngă kơ abih bang tơdu hĭ tơlơi kơdok kơdor bruă mă amăng lŏn hmua đang boh mận mơnuih ƀôn sang hăng ling tơhan mơ̆ng ayong Tếnh Ngọc Thái, să Chiềng Tương, tơring glông Yên Châu, tơring čar Sơn La. Anai lĕ, anăn juăt iâu mơ̆ ayong Thái ăt kah hăng mơnuih ƀôn sang amăng plơi lăi nao sit lăi pơthâo hmua boh mận dưi hơmâo khua mua, ling tơhan puih kơđông pơgang guai dêh čar Chiềng Tương djru:

“Hlâo adih, ta pla kơtor, lŏn kơdư čư̆ đơi anun yơh kơtor pơboh ƀu jor ôh. Tơdơi kơ anun dưi hơmâo ƀing khua mua tơhan pơgang guai dêh čar Chiềng Tương djru pla phun boh mận, truh ră anai hơmâo pĕ 3 bơyan laih. Pla boh mận pơboh lu, rơnoh sĭ pơmă hloh kơ pla kơtor, sang anŏ hơmâo hmăi prăk tuh pơ alin bruă ngă hmua, pơdong sang. Thun hlâo, sang anŏ hơmâo pơhrui glăi 150 klăk prăk, thun anai boh mận pơboh ƀu djơ̆ bơyan dưi sĭ hơmâo 20 klăk prăk laih”.

Hơdôm bơyan pĕ boh mận mih mơ̆ng hmua đang yua tơhan pơgang guai dêh čar puih kơđông Chiềng Tương pok pơhai hơdră djru kơ mơnuih ƀôn sang pơblih pơjeh phun pla ƀơi lŏn kơdư čư̆, pla boh mận pơhrua kơ đang kơtor amăng lŏn khăng khăi hơđăp. Ƀu kơnong ruah pơjeh pla đôč ôh, ƀing tơhan pơgang guai dêh čar hơmâo ngă hrom hăng mơnuih ngă hmua pla pơjing truh pĕ boh. Đại uý Vì Văn Lun, Grup tơhan hyu jak iâu mơnuih ƀôn sang, Puih kơđông tơhan pơgang guai dêh čar Chiềng Tương brơi thâo:

“Ƀing gơmơi hơmâo nao tơl rĭm sang, ĕp lăng ƀơi djop đang hmua, ƀơk pơpha pơjeh phun pla kơ mơnuih ƀôn sang, pla hăng pơtô brơi mơnuih ƀôn sang wai lăng phun pla. Kâo hok mơak yua ƀuh mơnuih ƀôn sang pơđĭ kyar bơwih ƀong huă, tơlơi hơdip mơda hơđong tui”.

Ƀing tơhan pơgang guai dêh čar ăt jing ƀing ama, ƀing ayong djru ba, kơ lu gưl čơđai sang hră ƀơi 2 boh să guai dêh čar puih kơđông Chiềng Tương hăng Lóng Phiêng, tơring glông Yên Châu, Sơn La. Sang anŏ ƀun rin, hơmâo 3 čô ană, amăng anun ană tơlŭi ayong Vì Văn Tuyền, să Lóng Phiêng, tơring glông Yên Châu ƀu klă drơi jăn, anun tơlơi hơdip tơnap tap biă, tơlơi hơdip sang anŏ jai kraih tơnap tap. Nao sang hră ƀu truh tơl ôh, ană đah kơmơi tal dua hơmâo hĭ tơhan puih kơđông Chiềng Tương tŭ jum djru ba hăng hơdră “Yong tơkai adơi nao sang hră”. Ayong Vì Văn Tuyền lăi:

“Sang anŏ tơnap tap biă mă, mơak mơ̆n hơmâo tơhan pơgang guai dêh čar djru ba mô̆ ană gơmơi, laih anun sang anŏ hơmâo ƀiă prăk brơi ană nao hrăm hră, prăk yua lơ̆m mô̆ nao hrăm hră, dưi hơmâo asơi huă, eng ao buh”.

Rơbêh kơ 7 thun hăng anai, hơdră anăn “Yong tơkai adơi nao sang hră” dưi hơmâo ƀing khua mua, ling tơhan puih kơđông tơhan pơgang guai dêh čar Chiềng Tương ha pran jua ngă tui. Rĭm blan, khua mua, ling tơhan pơgang guai dêh čar djru hăng prăk blan ƀing gơñu laih anun pơtruh brơi hăng mơnuih pơdrong sah čơmah pran jua djru kơ 7 čô čơđai sang hră hăng rơnoh prăk 500.000 prăk sa blan sa čô, tơl gơñu hrăm abih anih 12. Rơngiao kơ anun, puih kơđông iâu pơthưr ling tơhan ngă tui hơdră ling tơhan djru hrom yong tơkai adơi nao sang hră, hơmâo djru ba 14 čô čơđai sang hră hăng rơnoh prăk 1, 2 klăk prăk sa blan sa čô. Yă Phạm Thị Dinh, Kơ-iăng khua sang hră gưl sa Lóng Phiêng A, tơring glông Yên Châu brơi thâo, hơbô̆ bruă anai yôm biă mă, djru sa črăn jak iâu čơđai sang hră gir run hrăm hră, huăi tơbiă sang hră, pơtrut pran jua kiăng gir run găn rơgao hĭ tơlơi tơnap tap ƀơi kual giăm guai dêh čar:

“Sang hră gơmơi hơmâo 8 čô čơđai sang hră dưi djru ba. Mơ̆ng hrơi hơmâo khua mua, ling tơhan pơgang guai dêh čar djru, lu sang anŏ hơmâo hmăi anŏ gêh găl brơi ană bă hrăm hră; ƀing čơđai ăt gir run hloh mơ̆n, hor hrăm hră. Lu čơđai hrăm thâo, ngă giong bruă jao kơ sa thun, khua sang hră hơmâo hră apah bơni”.

Puih kơđông lĕ sang, guai dêh čar lĕ plơi pla, mơnuih ƀôn sang djop djuai ania adơi ayong pơmin sa bruă, ngă hrom ĕp hơdră pơtrut pran jua djru gum, yua mơ̆ng khua mua, ling tơhan puih kơđông Chiềng Tương gir run hrom kiăng ngă giong bruă jao, pơgang jơlan guai dêh čar, tơmeh gong pơkă guai dêh čar; laih dơ̆ng, lir hơbit, giăm ană plơi, thâo hluh tơlơi ană plơi kiăng, djru kơ ană plơi pla.

Tui hăng thiếu ta Nguyễn Công Lưu, khua apăn bruă kơđi čar puih tơhan pơgang guai dêh čar Chiềng Tương, rĭm kơ hơbô̆ bruă, črăn bruă yôm djru pok pơhai lêng kơ lir hơbit hăng bruă ngă tui Hră pơčrâo mrô 05 mơ̆ng Ding jum kơđi čar kơ “Pơtrut kơtang bruă hrăm hăng hla tui tơlơi pơmin, pran jua hăng tơlơi dŏ dong ƀong huă mơ̆ng Hồ Chí Minh”:

“Ping gah, khua mua puih kơđông pok pơhai brơi sem glăi tơlơi pơhing amăng kual, akŏ pơjing hơbô̆ bruă hrăm hăng hla tui wa djơ̆ găl hloh, tŭ yua amăng 2 să guai dêh čar Lóng Phiêng, Chiềng Tương. Ƀing gơmơi pơkra hơdră lir hơbit hăng lu ring bruă či ngă rĭm hrơi, rĭm rơwang hrơi tơjuh, kơtưn ngă giong klă bruă mă pơgang tơlơi rơnuk rơnua ƀơi guai dêh čar”.

Hơdôm bruă mă hơdră ngă tui, tơlơi tŭ yua hơmâo ba glăi tơlơi đăo kơnang kơ mơnuih ƀôn sang djop djuai ania amăng kual guai dêh čar hăng ƀing ling tơhan akă grat mơtah; jing sa tơlơi pơtrut pran jua tơhan pơgang guai dêh čar ngă giong bruă jao pơgang tơlơi rơnuk rơnua hơđong guai lŏn ia, gum pran hrom man pơdong plơi pla dêh čar amăng kual guai lŏn ia kjăp kơtang hloh.