Amăng tơlơi pơhing akô̆ thun 2022, Khua git gai wai lăng pơ ala mơnuih ƀôn sang dêh čar ta Vương Đình Huệ lăi: Khua pơ ala mơnuih ƀôn sang, Jơnum min apăn bruă Khua pơ ala mơnuih ƀôn sang dêh čar ta amra gơgrong hlâo hloh dong, gum hrom kơjăp hloh dong hăng Gong gai dêh čar, hơdôm ƀirô kơnuk kơna kiăng hmao pel ĕp, tơlơi pơsit hơdôm tơlơi gah pô dưi. Lăi nao hrom hăng bruă mă, tơdơi kơ 1 thun pok pơhai Jơlan hơdră čih pơkra tơlơi phiăn rơwang bruă Khua pơ ala mơnuih ƀôn sang dêh čar ta tal 15, hơdôm bôh ƀirô mơng Khua pơ ala mơnuih ƀôn sang, Gong gai dêh čar hăng hơdôm bôh ƀirô bơdjơ̆ nao hmâo ngă giong laih 81/137 bruă čih pơkra tơlơi phiăn, ngă giong bruă kơsem min, pel ĕp ƀudah kơsem min, čih pơkra phrâo (hmâo rơbêh kơ 59% bruă mă mơng sa rơwang bruă bruă), pơjing gru tơlơi phiăn kiăng Gong gai dêh čar, gong gai tơring čar ƀôn prong mă yua hơdôm jơlan gah pơplih tañ, khut khăt, ba glăi bôh tơhnal amăng pơgang, pơgăn klin ruă, pơgang tơlơi hơdip mơda, tơlơi suaih pral hăng mơnuih ƀôn sang, djru anom bơwih ƀong, mơnuih mă bruă yak rơgao tơlơi tơnap hăng pơhlôm hơđong tơlơi hơdip mơda mơnuih mơnam; pơtrut hơkrŭ glăi hăng pơđĭ kyar bơwih ƀong mơnuih mơnam kơjăp phik tơdơi kơ klin Covid-19.

Biă ñu, hrom hăng 2 tal jơnum tui tơđar, dong mơng akô̆ thun, Khua pơ ala mơnuih ƀôn sang pơphun Tal Jơnum ƀu hmâo pơkă hlâo tal sa kiăng pel ĕp, pơsit lu bôh yôm prong, ječ, bơdjơ̆ nao ƀơi anăp tơlơi hơkrŭ glăi, pơđĭ kyar mơng lŏn ia amăng tơlơi “hơđong phrâo”. Bruă iâu pơƀut tal jơnum ƀu hmâo pơkă hlâo tal sa dưi lăng lĕ tơlơi pơsit gru grua mơng Khua pơ ala mơnuih ƀôn sang Việt Nam amăng 76 thun rơgao, pơtŏng sit pran gơgrong, pran pơsit bruă kơđi čar mơng ƀirô hmâo tơlơi dưi dlông hloh mơng Kơnuk kơna ăt kah hăng gir run pơplih phrâo, bruă mă yua kơ bôh tŭ yua mơnuih ƀôn sang.

Jơnum “ƀu hmâo pơkă hlâo” kiăng pơsir tơlơi kiăng ječ. Bôh nik brơi ƀuh tơdah Khua pơ ala mơnuih ƀôn sang ƀu gum hrom hăng Gong gai dêh čar hmâo hơdôm tơlơi pơsit djơ̆ tañ amra ngă rơngiă hĭ tơhnal gal mơng lŏn ia. Hơdôm bôh yôm bơkơtuai amăng Tal jơnum anai ƀu djơ̆ kơnong kơ djơ̆ tui tơlơi kiăng ƀơi anăp kơ thun 2022, thun 2023 ôh mơ̆, ñu dô̆ hmâo bôh tŭ yua yôm kơ sa rơwang bruă hăng hơdôm thun tô̆ tui. Abih bang hơdôm bruă prăp lui hăng pơphun tal jơnum leng kơ pơdah rơđah tơhnal lăng ataih, lăng dơlăm hăng tơlơi gum hrom prăp lui mơng tañ, mơng ataih.

Tơlơi kiăng lăi rơđah phun lĕ bruă Khua pơ ala mơnuih ƀôn sang pel ĕp Tơlơi pơtrun pơsit mrô 43/2022 lơ 11/1/2022 kơ hơdră bruă prăk kak, prăk dêh čar tač rơngiao hăng rơwang prong năng ai ñu 350.000 klai prăk, djơ̆ hăng rơbêh kơ 8% GDP pioh djru pok pơhai Jơlan hơdră hơkrŭ glăi hăng pơđĭ kyar bơwih ƀong – mơnuih mơnam, djru ngă brơi đĭ kyar GDP thun 2022 đĭ 8,02%, lu hloh amăng rơbêh kơ 10 thun rơgao, gah ƀut hơdôm bôh dêh čar hmâo rơnoh đĭ kyar ba jơlan hlâo rŏng lŏn tơnah.

Kah hăng tơlơi Khua čih pioh, Khua Anom bruă Khua pơ ala mơnuih ƀôn sang Bùi Văn Cường lăi pơthâo: Tơlơi pơtrun pơsit dưi mă yua amăng sa tal jơnum yôm phăn, akă hmâo mơng hlâo hăng lu pran tuh rơyuh prong mơng khua git gai Ping gah, Khua pơ ala mơnuih ƀôn sang, Gong gai dêh čar, hơdôm Ding jum, gơnong bruă, tơring čar ƀôn prong hăng khua pơ ala mơnuih ƀôn sang dêh čar. Hơdră bruă pơsit anun pok tơbiă jơlan gah yôm, amăng anun hmâo hơdôm bruă mă, hră pơ-ar dưi pơplih klă huăi tơnap, pơpha gưl kơjăp truh hăng rim ding jum, gơnong bruă tơring čar ƀôn prong mơ̆ sui hăng anai akă hmâo mă yua. Khua pơ ala mơnuih ƀôn sang dô̆ jao kơ Jơnum min apăn bruă Khua pơ ala mơnuih ƀôn sang tơlơi pơsit hơdôm tơlơi ba tơbiă, pha ra, ha jăn pơkon hăng tơlơi phiăn amăng hơdôm hrơi Khua pơ ala mơnuih ƀôn sang ƀu hmâo jơnum hmao tlôn gum hrom hăng Gong gai dêh čar. Pran jua hăng bôh tơhnal mơng tal jơnum ƀu hmâo pơkă hlâo lok sa, Khua pơ ala mơnuih ƀôn sang dêh car ta tal 15 hmâo pơjing laih tơhnal phrâo pran jua phrâo

Pơhrui ngăn drăp lu hloh, hloh lui lu biă hăng rơnoh pơkă hlâo; pơhrui glăi lu hloh rơnoh pơkă, hnưh dŏng bruă hrom amăng rơwang dưi wai lăng; GDP thun 2022 sa thun đĭ 8,02%, lu hloh amăng rơwang 2011-2022; hơdôm anô̆ ngă dưm kơnar prong dưi pơhlôm... Hơdôm tơlơi pơhing yôm phăn dưi lăi pơthâo amăng rơnuč thun djă ba lu gru nam klă, jing pran pơtruh yôm phăn kơ tơhnal pơkă kơčăo bruă 5 thun, jai yôm phăn hloh lom lŏn ia yak mut thun mơng rơwang bruă amăng ngă tui tơlơi pơsit Jơnum tal 13 mơng Ping gah.

Yôm hloh lĕ lom tơlơi pơplih phrâo kah hăng abih bang bruă hăng lu gru rơđah anun lom ƀing ta lăng glăi bruă amăng thun 2022 tơlơi rŏng lŏn tơnah pơplih glêh tơnap, akă hmâo mơng hlâo, tơnap tal hloh bơhmu hăng lom čih pơkra Kơčăo bruă pơđĭ kyar bơwih ƀong – mơnuih mơnam thun 2022. Hăng tơlơi pơplih ƀơi rŏng lŏn tơnah, tơlơi bơngot đĭ nua gơnam; nua ia xăng ia jâu, gơnam yua man pơdŏng pơplih lu, bơdjơ̆ nao prong truh lu gơnong bruă, bruă mă; lu tơlơi dô̆ đôm sui hrơi khom dưi pơsir; lom anun, klin ruă, ayuh hyiăng ƀu klă ngă, kơthel ia ling dăo ngă tơnap, ba truh tơlơi răm rai bruă bơwih ƀong huă sĭ mơdrô hăng tơlơi hơdip mơnuih ƀôn sang.

Tơdah hơdôm anô̆ bơdjơ̆ nao ƀu klă ƀơi ngŏ anai, kiăng ƀuh lĕ hơdôm bôh tơhnal ƀing ta dưi ngă lĕ yôm phăn biă. Tơlơi hơkrŭ glăi klă mơng bruă bơwih ƀong pơdah bôh tơhnal git gai mơng Gong gai dêh čar ăt kah hăng hơdôm ding jum, gơnong bruă; tơlơi gir run, pran pơsit mơng abih bang glông bruă kơđi čar, mơnuih ƀôn sang, mơng khul mơnuih bơwih ƀong sĭ mơdrô. Hăng biă ñu lĕ tơlơi gum hrom, djru hmao tlôn, ba glăi bôh tơhnal mơng Khua pơ ala mơnuih ƀôn sang rơgao hơdră pơsit “biă ñu, ba tơbiă, pha ra ha jăn”.

Tơlơi lông, tơlơi tơnap ăt dô̆ lu mơn, samơ̆ tơlơi đăo gơnang amăng bruă jơnum ƀuh rơđah, lom hmâo khua pơ ala mơnuih ƀôn sang pơdah pran jua: Rŏng lŏn tơnah glăk pơsit Việt Nam kah hăng sa gru ƀuh rơđah mơng hơdôm thun Covid-19 ngă hăng tơhnal ngă kơtang đĭ tơdơi kơ klin. Đăo gơnang lĕ, hăng tơlơi gum hrom hơbit, tŭ ư prong mơng glông bruă kơđi čar, tơlơi dŏng yua, anăp nao mơng abih bang mơnuih ƀôn sang hăng hơdôm bôh anom bơwih ƀong, hăng tơlơi git gai djơ̆, kơjăp mơng Ping gah, tơlơi gơgrong hlâo, gum hrom mơng Khua pơ ala mơnuih ƀôn sang hăng tơlơi git gai khut khăt, abih pran jua mơng Gong gai dêh čar, sit ñu ƀing ta amra ngă tui truh kih hơdôm tơhnal ba tơbiă ƀiă hrơi amăng thun 2023, ăt kah hăng tơhnal pơkă sui thun pơgi kơdih anai mơn./.