Lơ 17/7, Grŭp lăng tui akô̆ bruă (Grŭp hyu mă bruă mrô 2) hmâo bruă mă hăng Jơnum min mơnuih ƀôn sang tơring čar Sóc Trăng “Bruă pok pơhai ngă tui hơdôm tơlơi pơtrun pơsit mơng Khua pơ ala mơnuih ƀôn sang kơ hơdôm Jơlan hơdră pơkă mơ̆ng lŏn ia pơdŏng plơi pla phrâo, rơwang mơ̆ng thun 2021-2025, hrŏ trun ƀun rin kơjăp rơwang 2021-2025, pơđĭ kyar bơwih ƀong – mơnuih mơnam kual neh wa djuai aniă ƀiă hăng kual čư̆ siăng rơwang 2021 -2030”.

Yap truh rơnuč thun hlâo, tơring čar Sóc Trăng hmâo 64/80 mrô să djơ̆ hăng plơi pla phrâo, 16 bôh să djơ̆ hăng plơi pla phrâo pơđĭ dlông, hmâo 3 bôh anom gưl tơring glông djơ̆ hăng tơhnal pơkă ngă giong bruă pơdŏng plơi pla phrâo. Pơhrui glăi hơnong ñu sa akô̆ mơnuih kual plơi pla đĭ 43,4 klăk prăk sa thun (đĭ 1,1 wot bơhmu hăng thun 2020). Pơhiăp klah čun amăng mông lăng tui, grŭp pơsit yôm bôh tơhnal pok pơhai hơdôm jơlan hơdră pơkă mơ̆ng dêh čar mơ̆ tơring čar Sóc Trăng hmâo gir run hăng dưi ngă. Hrŏm hăng anun rơkâo Sóc Trăng ngă giong dong tơlơi lăi pơthâo, tŭ mă tum djop tơlơi gum pơhiăp mơng Grŭp hyu mă bruă, hăng hơdôm tơlơi gum pơhiăp ƀu tŭ mă khom hmâo tơlơi gum pơhiăp pơblang pioh pơhrua nao amăng tơlơi lăi pơthâo glăi hăng mơ-ĭt kơ Grŭp lăng tui. Amăng anun, čih anăn hơdôm bôh yôm dô̆ tơnap, dô̆ gun, hơdôm tơlơi gum pơhiăp rơđah pioh kơ Gong gai dêh čar, hơdôm ding jum, gơnong bruă dêh čar kơ rim Jơlan hơdră, hơdôm rơwang bruă, rơwang bruă anet./.