Kiăng dưi ngă bruă anai, khom hơmâo tơlơi djru hrom sa amăng plĕ, khut khăt mơ̆ng djop gưl, djop anom bruă pơdjơ̆ nao, laih dơ̆ng, mơnuih ƀôn sang ăt kiăng prăp lui amăng bruă hơduah ĕp tơlơi pơhing tŭ yua kơ tơlơi hơdip mơda ăt kah hăng bruă mă.

Ƀơi mông jơnum tơđar mơ̆ng plơi Khung Nhung, să Quản Bạ, Khua plơi ruah mă amăng mông gêh găl, lơ̆m 7 mông 30 mơnit či tlam mơmŏt hăng boh pơhiăp mă yua  jơnum pơčrông sai lĕ, tơlơi pơhiăp djuai ania pô. Anun yơh hơdră klă hloh, pioh kơ gong gai kơnuk kơna dưi pơtum djop mơnuih ƀôn sang amăng plơi nao pơtum jơnum laih anun pôr pơthâo tơlơi pơhing, laih dơ̆ng anai jing hơdră pioh đing hmư̆ hơdôm tơlơi pơgôp hiăp, lăi pơthâo mơ̆ng mơnuih ƀôn sang truh pơ gong gai kơnuk kơna djop gưl.

Yă Cư Thị Sông, mơnuih ƀôn sang plơi Khung Nhung, să Quản Bạ nao jơnum brơi thâo: Yua jơnum plơi, djop mơnuih lêng kơ thâo tơlơi djơ̆, tơlơi tơpă jơlan hơdră, tơlơi pơtrun mơ̆ng Kơnuk kơna pioh ngă tui. Ăt yua nao pơhmư̆ tơlơi arăng pơtô lăi, ta mơ̆ng thâo hluh kơ bruă bơwih ƀong huă sĭ mơdrô pioh akŏ pơdong sang anŏ rơnuk rơnua trơi pơđao.

Ăt kah hăng lu mơnuih djuai ƀiă pơkŏn plơi Khung Nhung, mah dŏ kơƀah tơlơi thâo pơhiăp djuai lar laih anun tơlơi hrăm hră pơar dŏ ƀiă, samơ̆ hăng tơlơi kiăng mă bruă bơwih ƀong huă pơđĭ kyar, tơdơi kơ lu wơ̆t jơnum hmư̆ tơlơi pơtô mơ̆ng khua plơi, kơ-iăng khua plơi lăi brơi hơdră ngă pơdrong kơ sang anŏ, ayong Lý Tà Bâu, plơi Trúc Sơn, să Quản Bạ, khin nao pơ sang să pioh tơña kơ bruă mă, hơdră arăng bơwih ƀong huă kiăng pơklaih mơ̆ng ƀun rin.

Ƀơi să, ayong Bâu, hmư̆ khua mua apăn bruă lăi pơthâo, pơčrâo brơi mut ĕp lăng tơlơi pơhing lơ̆m Internet, brơi ñu thâo boh pơhiăp kơtit nao kiăng tañ ƀuh, hơdôm boh yôm phun tơlơi pơtô, anŏ ñu kiăng thâo, tơdơi kơ sư̆ rơbư̆ blung a, ayong Bâu hok mơak yơh thâo ĕp mă tơlơi pơhing, hơduah ĕp hơbô̆ bruă arăng pơtô bơwih ƀong huă đĭ gŏ amŏ kah hăng bruă rông bê, tui internet arăng pơtô brơi.

“Sang anŏ gơmơi kiăng pơđĭ kyar bơwih ƀong huă rông bê. Kâo hmư̆ gơyut gơyâo ieo gah lăi pơ să anun hơmâo hơbô̆ bruă rông bê, arăng pơtô amăng măi komputer anun, laih anun kâo nao tơña pơ să mơtam gơñu brơi ĕp lăng ƀuh tŭ yua biă mă anun kâo mơak kiăng ĕp lăng hrăm tui, pioh glăi pơphun pơ sang anŏ rông bê bơwih ƀong huă kah hăng amăng măi komputer pơtô brơi anun”.

Tui hăng ayong Lệnh Thế Tú, mơnuih apăn bruă wai lăng man pơdong plơi pla phrâo să Quản Bạ, tơring glông Quản Bạ, tơring čar Hà Giang, dơ̆ng mơ̆ng hrơi ñu glăi mă bruă ƀơi să, ñu ƀuh na nao mơnuih ƀôn sang tơña kơ ñu, brơi ĕp lăng hơbô̆ čem rông hlô mơnong, tui tơlơi pơtô amăng măi komputer. Ayong Tú ƀuh mơnuih ƀôn sang djuai ƀiă amăng să mah ƀiă thâo hră, pơhiăp tơlơi yuan dŏ sư̆ rơbư̆ đôč samơ̆ gơñu hur har kiăng hơduah ĕp hơdră hrưn đĭ pơklaih mơ̆ng ư̆ rơpa. Yua kơ anun, sit hơmâo mơnuih pơpă kiăng ĕp lăng, brơi ñu pok măi komputer, ñu hur har pok brơi, pơtô brơi hơdră pok ĕp lăng, kiăng mơnuih ƀôn sang thâo hơdră mă yua, mut ĕp tơlơi pơhing Internet.

Hà Giang lĕ sa amăng hơdôm tơring čar ƀun rin hloh amăng dêh čar ta, laih dơ̆ng ăt jing tơring čar hơmâo truh 22 djuai ania hăng giăm 800 rơbâo čô mơnuih, amăng anun 90% mrô mơnuih djuai ƀiă soh, dŏ amăng rơbêh 2000 boh plơi pla. Hăng lŏn mơnai glai klô čư̆ siăng, anih dŏ raih daih, tơlơi phiăn juăt đưm djuai ania phara soh, dŏ amăng plơi pla treng tơkai čư̆ siăng, kriăng pơtâo, anun yơh bruă ba hyu tơlơi pơhing tơnap tap biă mă hăng ƀing apăn bruă ƀơi kual plơi pla. Ơi Thào Thái Tâm, khua pơ ala mơ̆ng jơnum min mơnuih ƀôn sang să Quản Bạ brơi thâo:

“Amăng hơdôm thun rơgao, bruă mă pơtô pơblang brơi mơnuih ƀôn sang să Quản Bạ dưi đing nao biă, boh nik ñu hăng lu hơdră hyu pơtô pơblang truh ƀơi anăp mơta. Hơdră anai, gơmơi pơpha djop khul grup mơnuih, anom bruă ngă hrom khua wai lăng djop djuai ania mơnuih mơnam să pơtô pơblang tơl plơi pla, sang anŏ mơnuih ƀôn sang. Bơ hăng hơdră pơtô mơ̆ng ataih lĕ, gơmơi pơtô pơhiăp pôr amăng mikrô să pơmong nao pơ hơdôm boh plơi brơi hmư̆”.

Hơdră pơtô ba tơlơi pơhing phara biă mă tui hluai tơring tơrang, mă yua boh pơhiăp plơi pla ta pô, kơnang tơlơi thâo hluh tơlơi phiăn juăt, ruah mă hơdră či pơtô lăi, kiăng pơblih tơlơi pơmin mơ̆ng mơnuih ƀôn sang djuai ƀiă ƀun rin dŏ pơ čư̆ siăng kriăng pơtâo. Samơ̆, kiăng ƀing ngă bruă hyu pơtô lăi anun hơmâo djop tơlơi pơhing, tơlơi pơtô djơ̆ tong ten, hmao kru, anun lĕ tơlơi glăm ba, gơgrong phun mơ̆ng sang bruă kơnuk kơna git gai wai lăng mơnuih ƀôn sang djop gưl tơring čar Hà Giang. Ơi Nguyễn Văn Hưng, Kơ-iăng khua anom pơtô bruă ping gah tơring čar Hà Giang brơi thâo:

“Tơring čar Hà Giang hlăk tuh pơ alin djru kơ kual plơi pla, ngă hiư̆m pă bruă pơtô lăi ƀơi plơi pla tŭ yua hloh hăng rơkâo kơnuk kơna dêh čar, kơnuk kơna lŏn ia ăt đing nao kơ tơring čar Hà Giang tuh pơ alin brơi kơ plơi pla, kiăng ba bruă hyu pơtô pơblang pôr tơlơi pơhing ƀơi plơi pla ăt kah hăng bruă pôr tơlơi pơhing ƀơi plơi pla ba glăi boh tŭ yua lu hloh”.

Kiăng pơsir hơdôm tơlơi tơnap tap, gong gai kơnuk kơna djop gưl, biă mă ñu djop anom bruă tơlơi pơhing amăng tơring čar Hà Giang ăt hneč mă djop hơdră, kơnang kơ ƀing mă bruă, blơi prăp gơnam yua mă bruă djop hăng lu mơta, lu tơlơi pơhing tui hluai anŏ gêh găl phara ƀơi plơi pla pôr pơthâo kơ mơnuih ƀôn sang. Hrom hăng anun, sa hơdră dơ̆ng ăt dưi hơmâo tơring čar Hà Giang lăng yôm, anun lĕ bruă ngă hrom ling tơhan blah ngă dŏ amăng tơring čar, biă mă ñu tơhan pơgang guai dêh čar hơmâo puih kơđông ƀơi tơring čar pioh djru ba tơlơi pơhing hmar, djơ̆ tañ truh pơ mơnuih ƀôn sang thâo hăng ngă tui.