Hơdôm hrơi amăng plah wah blan 10 anai, ƀơi anih hrăm blah ngă, pơnah phao biă mơ̆ng anom bruă khua tơhan blah ngă tơring čar Dak Lak či să Krông Na, tơring glông Ƀuôn Đôn, adai hơjan brik brik, tơrơhñai sui hrơi ưt rah, hơjan rah. Hạ sỹ tơhan phrâo mut Ngô Văn Trọng hrŏm hăng ƀing gơ̆p ñu ƀing tơhan pơnah kơnông gah Khul ling tơhan Đại đội bộ binh 2, mơgăt rơdêh kuăi lŏn, čuk tuah pơtâo, bư̆ akŏ tli, hŭi ia blai ling nao amăng luh gơñu hrăm blah ngă, ngă pơkjăp glăi atur pơdong tơmeh hlă hnăl ngă rup pơnah đam. Dŏ amăng krah ia hơjan sui mông, drơi jăn mơsah hmrih hmrah, sum ao hlŭ lŏn soh. Hạ sỹ Ngô Văn Trọng brơi thâo, ñu hrŏm hăng ƀing gơ̆p tơhan gơñu ƀu pơdơi ôh pơtop hrăm drơi jăn, kiăng kơtang, pơđĭ tui tơlơi khin hơtai, tơlơi pơmin bruă kơđi čar, pơtrut pran jua pơtop hrăm kiăng thâo, beč bal hmar tơlơi blah ngă, mơneč prăp lui či kơsung blah.

“Đại đội hlăk prăp lui hrăm hơdôm tơlơi kơsung blah hơdeč grup ƀiă mơnuih, kơsung nao pơ anăp, hăng khul tơhan man ƀrô pơhlôm gah klôn hăng khul tơhan khul lu mơnuih gah đại đội kơsung blah sua mă puih kơđông ayăt ngă mă. Đại đội pơhrăm na nao rim hrơi, hăng pran jua prăp lui blah ngă kơtang biă mă, amra kơsung blah mơtam kiăng pơgang Lŏn ia tơdah hơmâo tơlơi rung răng”.

Đại đội bộ binh 2 dưi akŏ pơjing lơ 01/01/1991, jing khul tơhan blung a Đại đội bộ binh 2, gah Tiểu đoàn 697 mơ̆ng sang bruă khua tơhan blah ngă tơring čar Dak Lak. Sa amăng dua khul ling tơhan đại đội bộ binh gah anom bruă khua tơhan blah ngă tơring čar hơmâo pơdong puih kơđông ƀơi giăm guai dêh čar, Đại đội bộ binh 2, jing tơhan phun pơgang guai dêh čar ƀơi tơring glông Ea Sup. Amăng anih dŏ ayuh hyiăng lŏn mơnai glai klô h’uh hang pơ-iă lu, sit hơjan lĕ ia ling dăo lu hrơi mơ̆n amăng thun, bơyan pơ-iă phang hang kơtang tit ƀơi guai dêh čar, lu tơlơi kơƀah tơnap tap biă mă samơ̆ đại đội ăt djă hnơ̆ng đôč bruă ngă, mrô tơhan pơhrăm drơi jăn pran jua kiăng găng añrăng kơtang blah ngă. Amăng hơdôm thun 2020 truh 2023, đại đội hơmâo tŭ mă tơlơi apah bơni puih kơđông Kơtưn khut khăt khom dưi, klah čun tơlơi bơni khom dưi lu thun na nao mơtam laih anun anom bruă tơpă rơgoh hơđong hlom bom, ƀu hơmâo tơhan pơpă, pô hlơi ngă soh glăi ôh. Ră anai, ƀing khua mua, ling tơhan amăng đại đội pơtum kơ bruă pơhrăm blah ngă, gir run kơtưn pơplông mă bruă, ngă giong bruă jao, mă bruă khom hơmâo boh tơhnal anăp nao hơdor glăi tal 80 thun hrơi akŏ pơjing khul ling tơhan mơnuih ƀôn sang Việt Nam lơ 22/12. Trung úy Tô Viết Sỹ, apăn bruă kơđi čar đại đội lăi:

"Ƀing gơmơi ĕp lăng bruă pơnah boh phao sit nik hăng črăn bruă đại đội bộ binh pơtrut bruă kơsung blah, mơ̆ng anun, akŏ pơdong bruă mă kơ khua mua, ling tơhan hơmâo pran jua khin hơtai, beč bal, glăm ba bruă mă ăt kah hăng tơlơi thâo rơgơi mơneč blah ngă sit hơmâo tơlơi rung răng”.

Dưi akŏ pơjing lơ 06/05/1995, Đại đội bộ binh 5 hơmâo bruă mă pơtô pơhrăm blah ngă, prăp lui pran jua či kơsung blah mơtam hăng amra ngă bruă tui hnơ̆ng pơkă A2, pơgang tơring glông Ƀuôn Đôn. Rim thun puih kơđông pơphun pơtŏp hrăm kiăng pơđĭ tui tơlơi kơtang blah ngă kơ ƀing tơhan phrâo mut, djop anih amăng tơring čar mơ-it nao pơhrăm; ngă klă bruă jak iâu pơtô lăi ană plơi pla, kơtưn mă bruă ngă rah hmua pla pơjing kiăng pơđĭ tui mơnong ƀong huă kơ ƀing tơhan hăng ƀing khua mua tơhan dŏ mă bruă amăng puih kơđông, dŏ tơguan, prăp lui na nao sit hơmâo tơlơi pơtrun mơ̆ng dlông, tơgŭ ngă bruă hmao kru. Thượng úy Nguyễn Thành Phước, apăn bruă kơđi čar Đại đội bộ binh 5 brơi thâo:

“Rơngiao kơ bruă mă prăp lui blah ngă, Đại đội bộ binh 5 dŏ hơmâo bruă mă djru pơklaih mơnuih mơnam amăng mông ječ ameč, djru mơnuih ƀôn sang amăng anih giăm puih kơđông ngă klă bruă pơtô lăi, jak iâu mơnuih ƀôn sang ngă djơ̆ tơlơi phiăn kơnuk kơna. Ngă hrŏm hăng gong gai kơnuk kơna amăng tơring glông, man pơdong sang dŏ, sang gum pơgôp, djru mơnuih ƀôn sang hơpuă yuă pơdai, pơhrui boh čroh mơ̆ng đang hmua, man pơkra hăng djru rơmet agaih hnoh ia, king hmua ia rô; pok pơhai ngă tui hơbô̆ bơwih ƀong huă čem rông hlô mơnong, ngă hmua pla pơjing, djru ană plơi pla pơđĭ kyar bơwih ƀong huă klă hloh”.

Ƀuôn Đôn hăng Ea Sup lĕ dua boh tơring glông ƀơi guai dêh čar tơring čar Dak Lak. Amăng kual hơmâo 11 rơbâo boh sang anŏ, hăng 25 rơbâo čô mơnuih, 29 djuai ania dŏ hrŏm. Anai lĕ lŏn mơnai glai klô ayuh hyiăng tơnap hloh, lŏn bơyan phang pơ-iă thu, bơyan hơjan hlim ia ling dăo djrưh kơtang, tơlơi truh lŏn adai ngă hơmâo na nao đôč. Tơlơi hơdip mơda mơnuih ƀôn sang dŏ lu tơlơi tơnap tap, gleh glar. Tha plơi ơi Y Thưng Kđoh, dŏ ƀơi Ƀôn Trí, să Krông Na, tơring glông Ƀuôn Đôn brơi thâo, hơdôm thun rơgao, khul ling tơhan Đại đội bộ binh 5 mă bruă hur har biă mă, djru ba ană plơi pla amăng bruă ngă hơđong tơlơi hơdip mơda, djru pơklaih mơnuih amăng mông ječ ameč truh. Tha plơi ơiY Thưng Kđoh lăi:

“Tơlơi truh lŏn adai ngă hơmâo na nao sit hơjan rơbŭ kơthel, hlim kơtang, hơmâo tơhan Đại đội bộ binh 5 mơ-it rai tơhan, khua mua tơhan djru ba mơnuih ƀôn sang, kah hăng: djru yuă pơdai hmua ia, pơdong sang, tăm bơbung sang, pơdŭ brơi gơnam mơnuih ƀôn sang hăng pơhlôm pơgang tơlơi truh ia ling dăo ngă. Ƀing tơhan dŏ djru ba ană rơmô, ană bê ngă djuai brơi mơnuih ƀôn sang rông, djru pơjeh kơphê pla, tiu či pơtem hăng pơjeh phun boh čroh či pla. Ƀing tơhan djru ană plơi pla lu biă mă. Mơnuih ƀôn sang kơnang kơ tơhan, tơhan djru ană plơi, tơlơi khăp bơlang ba tơdruă ană plơi pla hăng ling tơhan jai hrơi kjăp hloh”.

Găn rơgao rơbêh 1/3 rơnuk thu  akŏ pơdong, blah ngă, đĭ prong tui, hơdôm khul ling tơhan đại đội bộ binh gah sang bruă khua tơhan blah ngă tơring čar Dak Lak jing ƀing ling tơhan gơgrong phun pơgang hơđong ƀơi anih giăm guai dêh čar, akŏ pơdong anih blah ngă tong ten kjăp amăng pran jua ană plơi pla, anun yơh bruă phun aliăng mơ̆ng ƀing tơhan đại đội bộ binh kơtang khăng hrup pơsơi ƀơi guai dêh čar tơring čar Dak Lak.