Hơdôm hrơi rơnuč rơwang hrơi tơjuh, tha plơi Điểu Xem, djuai ania Bơnông, ling tơhan hơđăp, mơnuih hmâo arăng đăo kơnang ƀơi plơi pla Dak Blao, tơring kual Kiến Đức, tơring glông Dak R’lấp, tơring čar Dak Nông glăi gum hrŏm hăng grŭp wai lăng mă pô hyu čuă rim sang anô̆ ƀun rin amăng ƀon. Tha plơi brơi thâo, rim sang sa tơlơi hơdip phara, hmâo jê̆ giăm, lăng tui nao pơ̆ rim bôh sang anô̆ anun kah mơ̆ng dưi ngă tui ngăn rơnoh gum djru mơ̆ng kơnuk kơna truh hăng mơnuih ƀôn sang. Hơdôm bôh sang anô̆ ƀun rin dưi djă tơngan, črâo bruă, dưi djru gah gơnam tam kah hăng phun pla hlô rông, pơhrăm bôh thâo phrâo, laih anun pơsur rah pran jua pioh hrưn đĭ. Tui hăng tha plơi Điểu Xem, pran jua gum hrŏm djru plơi pla hơđong na nao hăng jai hrơi jai pơđĭ kyar.

“Neh wa plơi pla gum hrŏm hơbit na nao, pơkĕ hrŏm, pơsur tơdruă gir run bơwih ƀong huă, pơđĭ kyar bơwih ƀong. Plơi pla hơđong laih anun dưi hmâo tơlơi lăng ba, gum djru mơ̆ng Ping gah, Kơnuk kơna tuh pơplai anih anom mă yua, đing nao ngăn rơnoh kơ neh wa bơwih ƀong anun tơlơi hơdip mơda jai hrơi đĭ kyar”.

Ƀơi să guai dêh čar Quảng Trực, tơring glông Tuy Đức, tơring čar Dak Nông, bruă mă mơ̆ng tha plơi, mơnuih hmâo arăng đăo kơnang ăt glăk dưi ngă tui klă mơn amăng bruă djă pioh hơđong kual guai dêh čar hăng pơđĭ kyar bơwih ƀong. Tha plơi Điểu Đi, ƀon Bu Prăng 2, să Quảng Trực, brơi thâo, sa pran jua tui Ping gah, tui ngă hơkrŭ, tơlơi hơdip mơda mơnuih ƀôn sang jai hrơi trơi pơđao, guai dêh čar pơplih phrâo rim hrơi.

“Rơnuk blah ngă lĕ rơnuk gơmơi gum hrŏm blah ayăt, pơgang lŏn ia hăng pơgang kual guai dêh čar anai. Ră anai rơnuk rơnua, rơngai ƀing ping gah, ling tơhan hơđăp jai khom ngă gru ba jơlan hlâo hăng pơsur neh wa ngă tui pran jua gum hrŏm hơbit, gir run bơwih ƀong huă, pơđĭ kyar tơlơi hơdip mơda hăng pơgang kơjăp kual guai dêh čar anai”.

Pơsit khul mơnuih tha plơi, mơnuih hmâo arăng đăo kơnang hmâo bruă mă yôm phăn, mơ̆ng thun 2013, Ping gah tơring čar Dak Nông hmâo mă yua laih Akô̆ bruă 05 kơ pơdŏng khul mơnuih apăn bruă phun amăng kual djuai ania ƀiă. Truh ră anai, mrô anai hmâo giăm truh 500 čô mơnuih, dưi prăp brơi bôh thâo gah hơdră bruă mơ̆ng Ping gah, tơlơi phiăn mơ̆ng Kơnuk kơna, bôh thâo pơsur mơnuih ƀôn sang amăng rơnuk phrâo. Mơ̆ng anun, gơñu gơgrong hlâo, ngă klă bruă thâo tơlơi pơmin, tơlơi čang rơmang mơ̆ng neh wa, lăi pơthâo glăi hmao tlôn hơdôm bruă ƀuh rơđah mơ̆ng plơi pla pioh hmâo jơlan gah pơsir.

Ăt hluai tui kơ tơlơi pơsur klă mơ̆ng mơnuih hmâo arăng đăo kơnang hmâo djru laih mơnuih ƀôn sang lăng yôm pran jua kơđiăng, hrưn đĭ, pơgăn ba glăi bôh tơhnal hơdôm tơlơi pơčeh ča, yua tŭ tơlơi djuai ania, tơlơi đăo pioh ngă bruă soh phiăn. Lu kơđi tơlơi hmâo, tơlơi bơrơsua dưi pơsir, pơsir dong mơ̆ng plơi pla mơtăm. Hrŏm hăng anun, hơdôm mơnuih anai hmâo gum hrŏm klă pơdŏng hơdôm bruă pơphun bơkơtưn khăp kơ lŏn ia, hơdôm bruă pơsur ƀơi plơi pla kah hăng abih bang mơnuih ƀôn sang gum hrŏm hơbit pơdŏng plơi pla phrâo, hrŏ trun rin rơpa kơjăp sui thun.

Ơi Hồ Văn Mười, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Dak Nông pơtŏng sit, ngă tui bruă mă mơ̆ng mơnuih ping gah, mơnuih hmâo arăng đăo kơnang amăng djuai ania ƀiă lĕ bruă jao yôm phăn mơ̆ng hơdôm gưl, hơdôm gơnong bruă pioh tơring čar pơđĭ kyar.

“Hơdôm gưl ping gah, gong gai plơi pla gơgrong klă pơphun hơdôm bruă mă kiăng ngă tui pran jua mơnuih hmâo arăng đăo kơnang, khul apăn bruă phun, pơdŏng dong, hơkrŭ đĭ, ngă giong bruă mơnuih hmâo arăng đăo kơnang amăng kual djuai ania ƀiă; pơdŏng hăng pok prong dong hơdôm gru ba jơlan hlâo, pơplih phrâo amăng lu bruă pioh djru pơđĭ kyar bơwih ƀong, bôh thâo mơnuih mơnam, rơnuk rơnua pơgang lŏn ia ƀơi hơdôm anih anom, djru pơdŏng plơi pla Dak Nông jai hrơi jai pơdrŏng asah klă hiam”.

Pơsit djơ̆ bruă mă mơ̆ng mơnuih hmâo arăng đăo kơnang amăng djuai ania ƀiă, hmâo hơdră bruă lăp djơ̆ pioh dưi ngă tui đut hlah bruă mă “hơdôm phun hrăi mơ̆ng plơi pla” hmâo djru laih tơring čar Dak Nông djă bŏng kơjăp hơđong bruă kơđi čar, hmâo lu bôh than amăng bruă pơđĭ kyar bơwih ƀong, hmâo tơtlaih mơ̆ng ƀô̆ mơta tơring čar ƀun rin hăng glăk hrưn đĭ jing tơring čar đĭ kyar amăng kual Dap Kơdư./.