Hơdôm thun rơgao, tơring čar Gia Lai hmâo đing nao tuh pơplai bruă pơkra đing hnoh pơđoh ia yua plơi pla kiăng hmâo ia yua klă kơ mơnuih ƀôn sang, biă ñu kual djuai ania ƀiă. Truh ră anai tơring čar Gia Lai hmâo năng ai ñu 160 ring bruă pơđoh ia yua hơbit ƀơi hơdôm bôh plơi, plơi mă yua bă glăi tŭ yua. Hơdôm ring bruă anai djru pơđĭ tui tơlơi hơdip mơnuih ƀôn sang, biă ñu neh wa djuai ania ƀiă ƀơi kual asuek, ataih.

Kiăng ring bruă ia yua hơdjă ƀơi plơi pla ba glăi bôh tơhnal sui thun, tui hăng ơi Nguyễn Văn Danh, mơnuih gơgrong hơdôm rơwang bruă ia hơdjă yua gah Grŭp wai lăng hơdôm rơwang bruă tuh pơplai pơdŏng tơring čar Gia Lai brơi thâo: Anom pô tuh pơplai amra gum hrŏm kơjăp hăng gong gai plơi pla hăng hơdôm bôh anom wai lăng mă yua ring bruă; lăi pơthâo na nao, pơsur neh wa pơgang akô̆ ia, pel ĕp rơnăk măi mok hăng đing pơđoh ia kiăng huăi ƀruač ia, pioh ba glăi tu yua klă hloh./.