Phun ñu, hơdôm bôh yôm pơplih pơkra, pơhrua nao amăng Hră čih pơkra tơlơi phiăn tal anai kiăng pok prong, đĭ dong bôh tŭ yua kơ mơnuih mă bruă, ngă pơhư̆č mơnuih mă bruă gum hrom hră pơgang gah mơnuih mơnam, pơhlôm hơdôm tơlơi dưi klă hloh kơ mơnuih mă bruă lom mă bruă ăt kah hăng lom pơdơi lơtret.

Tui tơlơi pơkă mơng Tơlơi phiăn hră pơgang gah mơnuih mơnam mă yua ră anai, mơnuih nô̆p prăk dưm amăng hră pơgang gah mơnuih mơnam mơ̆ rơbêh kơ 35 thun pioh kơ mơnuih mă bruă đah rơkơi hăng rơbêh kơ 30 thun pioh kơ đah kơmơi lĕ lom pơdơi lơtret, rơngiao kơ prăk blan pơdơi lơtret rim blan gơñu amra dưi čơkă mă prăk djru sa wot lom pơdơi lơtret brơi kơ hrơi nô̆p prăk amăng hră pơgang gah mơnuih mơnam mơ̆ rơgao kơ hrơi pơkă dưm dưm hăng mrô čơkă mă prăk pơdơi lơtret lu hloh 75%. Rơđah biă ñu, rơnoh prăk djru sa wot lĕ: Rim thun lu hloh, amra dưi yap dưm dưm hăng 0,5 prăk blan hơnong ñu. Ơi Nguyễn Duy Cường, Kơ-iăng Khua Anom bruă wai lăng hră pơgang gah mơnuih mơnam, Ding jum wai lăng mơnuih mă bruă tơhan rơka ruă hăng mơnuih mơnam brơi thâo:

 “Hăng tơlơi pơkă mă yua ră anai lĕ, bôh nik ƀơi sa dua bôh anom, sa dua bôh anom bơwih ƀong, lom mơnuih mă bruă truh thun pơdơi lơtret laih hăng mơnuih hmâo hrơi nô̆p prăk amăng hră pơgang gah mơnuih mơnam hmâo mrô lu hloh 75% laih lĕ, phun ñu gơñu amra pơđut, kiăng ngă hră pơsir prăk pơdơi lơtret hăng ƀirô wai lăng hră pơgang gah mơnuih mơnam. Tơdơi kơ anun, arăng mơng gum hrom dong, yua kơ gơñu pơgang blơi hră tui anun lu biă ñu 75% laih hăng ăt hmâo djop laih tơlơi kiăng čơkă mă prăk pơdơi lơtret. Yua anun, pơdơi lơtret tơdơi kơ anun mơng blơi yua dong hră pơkôl mă bruă. Anun lĕ, hăng tơlơi pơkă mă yua ră anai lĕ amăng hơdră bruă hră pơgang gah mơnuih mơnam ƀu hmâo tơlơi pơkă bơdjơ̆ nao truh bruă pơsur pioh kơ hơdôm mơnuih anun kiăng mơnuih mă bruă blơi yua hră dong, nô̆p prăk amăng hră pơgang dong”.

Gah tơlơi pơkă hrŏ trun pioh kơ mrô thun nô̆p prăk ƀiă biă mă ñu kiăng dưi hmâo mă prăk pơdơi lơtret mơng 20 thun trun 15 thun glăk dưi čơkă mă tơlơi lăng ba mơng mơnuih mơnam. Ơi Nguyễn Duy Cường brơi thâo, tơlơi pơkă anai kiăng ngă gal brơi kơ mơnuih blơi yua hră kaih (mơng 45-47 thun mơng pơphun blơi yua hră) ƀudah hơdôm mơnuih blơi yua hră ƀu na nao ba truh lom truh thun pơdơi lơtret ăt ƀu hmâo djop 20 thun mơn lĕ ăt dưi čơkă mă mơn prăk pơdơi lơtret rim blan. Tui anun, hơdôm mơnuih anai hlâo adih ƀu hmâo prăk pơdơi lơtret ôh, ră anai amra dưi čơkă mă prăk blan pơdơi lơtret rim blan; rim tal pơkă rơnoh prăk blan pơdơi lơtret amra dưi hmâo Kơnuk kơna pơplih pơkra hrom hăng anun amăng hơdôm hrơi ƀong prăk pơdơi lơtret amra dưi hmâo Keh prăk hră pơgang mơnuih mơnam blơi hră pơgang gah ia jrao.

Kiăng pơsur mơnuih mă bruă blơi yua dong hră pơgang gah mơnuih mơnam tơdơi kơ thun pơdơi lơtret, kiăng djru pơplih rah rơnoh prăk blan pơdơi lơtret, đĭ dong rah tơlơi dưi yua kơ mơnuih mă bruă, laih anun djru pơgang klă hloh kơ mơnuih mă bruă lom mă bruă, Hră čih pơkra Tơlơi phiăn hră pơgang gah mơnuih mơnam (pơplih pơkra) ba tơbiă rơkâo tơlơi gum pơhiăp, hăng 2 jơlan gah, hmâo pơplih pơkra, pơhrua nao tơlơi pơkă kơ pơsir  sa wot lom pơdơi lơtret kiăng pơsur mơnuih mă bruă nô̆p dong prăk blơi yua hră tơdơi kơ thun pơdơi lơtret. Jơlan gah sa pơkă: Rơnoh pơsir sa wot lom pơdơi lơtret dưi yap tui mrô thun nô̆p hră pơgang gah mơnuih mơnam lu hloh mrô thun tui anun hăng mrô čơkă mă prăk pơdơi lơtret 75%, rim thun nô̆p prăk lĕ dưi yap dưm dưm hăng 0,5 wot mơng rơnoh hơnong ñu prăk blan ngă phun than nô̆p prăk yua hră pơgang gah mơnuih mơnam.

Jơlan gah dua pơkă: Rơnoh pơsir sa wot lom pơdơi lơtret dưi yap tui mrô thun nô̆p hră pơgang gah mơnuih mơnam lu hloh mrô thun tui anun hăng mrô čơkă mă prăk pơdơi lơtret 75%, rim thun nô̆p lĕ dưi yap 0,5 wot mơng rơnoh hơnong ñu prăk blan ngă phun than nô̆p prăk. Hăng mơnuih mă bruă hmâo djop tơlơi pơkă kiăng čơkă mă prăk pơdơi lơtret tui tơlơi pơkă ƀơi Mơta tơlơi mrô 71 hăng Mơta tơlơi mrô 72 mơng Tơlơi phiăn anai mơ̆ nô̆p dong prăk kơ hră pơgang lĕ rim thun nô̆p tơdơi kơ thun pơdơi lơtret lu hloh kơ mrô thun tui anun, hăng mrô čơkă mă prăk pơdơi lơtret 75% lĕ dưi yap dưm dưm hăng 2 wot mơng rơnoh hơnong ñu prăk blan ngă phun than nô̆p prăk kơ hră pơgang. Ơi Nguyễn Duy Cường, Kơ-iăng Khua Anom wai lăng hră pơgang gah mơnuih mơnam, Ding jum wai lăng mơnuih mă bruă tơhan rơka ruă hăng mơnuih mơnam brơi thâo dong:

 “Amăng Hră čih pơkra Tơlơi phiăn pơgang gah mơnuih mơnam (pơplih pơkra) lĕ ba tơbiă mă tơlơi gum pơhiăp 2 jơlan gah. Amăng anun, hmâo pơhrua nao dong sa jơlan gah pơkă lĕ: Hăng hơdôm mơnuih mă bruă mă bruă dong tơdơi kơ thun pơdơi lơtret lĕ, hrơi nô̆p prăk tơdơi kơ thun pơdơi lơtret mơ̆ lu hloh kơ hrơi nô̆p prăk tui anun hăng mrô dưi čơkă mă lu hloh 75% anun lĕ, rim thun nô̆p hloh kơ anun amra yap lĕ 2 blan prăk blan pơ ala kơ 0,5 prăk blan kah hăng pơkă mă yua ră anai. Hăng tơlơi pơkă anai, kiăng kơ čang rơmang amra pơsur mơnuih mă bruă blơi yua dong hră pơgang gah mơnuih mơnam tơdơi kơ thun pơdơi lơtret. Bruă mơ̆ mơnuih mă yua blơi yua hră pơgang dong tơdơi kơ thun pơdơi lơtret lĕ: Tal sa amra pơhlôm klă tơlơi dưi yua kơ mơnuih blơi yua hră, yua kơ tơdơi anai hơdôm rơnoh prăk blan pơdơi lơtret amra lu hloh; Tal dua lĕ lom mă bruă tơdơi kơ thun pơdơi lơtret, yua kơ mơnuih mă bruă ăt blơi yua mơn lĕ, arăng amra dưi pơhlôm hơdôm tơlơi dưi yua pơkon, hơdôm tơlơi gum djru pơkon, bơhmutu ñu hơdôm tơlơi djru bơdjơ̆ nao lom duam ruă dưi pơhlôm klă hloh”./.