Sang anŏ ayong Hồ Văn Lách, dŏ amăng plơi Trung, să Trà Sơn, tơring glông Trà Bồng lĕ sang anŏ ƀun rin. Thun 2023, mơng jơlan hơdră tui hơnong pơkă dêh čar pơhrŏ trun ƀun rin hơđong kjăp, sang anŏ ayong Hồ Văn Lách hơmâo arăng djru brơi 2 drơi rơmô pioh rông. Dua rơkơi bơnai ñu hơmâo arăng pơtô brơi bruă pơkra drông war, pla rơk rông rơmô. Ayong Lách hơmâo khin hơtai čan 50 klăk prăk mơng sang bruă prăk djru mơnuih mơnam, hrŏm hăng mrô prăk djru man pơdrong sang mơng Jơlan hơdră tui hơnong pơkă dêh čar pơhrŏ trun ƀun rin, ñu dưi man pơdong sang prong rơhaih. Ayong Hồ Văn Lách hok mơ-ak lơm dua rơkơi bơnai ñu hơmâo bruă mă hơđong, dưi hrưn đĭ pơklaih mơng ƀun rin:

“Hơmâo rơmô rông jing klă biă mă, kâo ăt hơmâo arăng pơtô brơi bruă pơkra drông war brơi rơhaih, pla rơk pioh čem rơmô. Tơdah ƀu hơmâo bruă hơget kâo juăt hyu kiă, bơ tơdah lu bruă đơi, kâo nao yuă rơk. Yua hơmâo kơnuk kơna đing nao gum djru brơi, kâo pơpŭ bơni biă mă”.

Gong gai tơring glông Trà Bồng, tơring čar Quảng Ngãi pơphun lu anih pơtô hrăm brơi sang anŏ ƀun rin hăng mơnuih djuai ania ƀiă, črâo brơi neh met wa rông hlô, pla pơjing kiăng kơ ba glăi tŭ yua amăng bơwih ƀong, pơklaih mơng ƀun rin. Thun anai, să Trà Sơn, tơring glông Trà Bồng gir run djru brơi rơbêh 200 boh sang anŏ pơklaih mơng ƀun rin. Ơi Đinh Văn Phong, Khhua Jơnum min mơnuih ƀôn sang să Trà Sơn, tơring glông Trà Bồng brơi thâo, lu sang anŏ ƀun rin amăng să lĕ mơnuih djuai ania Cor, ƀing gơñu ƀu thâo phe pho ôh. Ƀing apăn bruă să hơmâo nao pel ĕp sit nik, hmư̆ tơlơi pơgôp hiăp mơng rĭm boh sang anŏ kiăng kơ thâo hơget gơñu kiăng djru, tơdơi anun kah pơpha brơi neh met wa. Ơi Đinh Văn Phong brơi thâo dong: gong gai rơkâo djop sang anŏ ƀun rin ƀuăn djru prăk djru brơi kơ djơ̆ hloh:

“Djop gơnong bruă, khul grup pơkiăo nao mơnuih mă tơlơi pơgôp hiăp mơng neh met wa mơ̆ ƀu ngă ča čot ôh. Pơhmutu pô anai kơƀah lŏn, pô adih sang tơ̆i rơ̆i, đa kiăng djru bơwih ƀong, kiăng rơmô rông ƀudah kiăng pơjeh phun pla, să amra sem lăng tong ten. Kiăng kơ kiăo tui tơlơi sit nik, neh met wa amra ruah mă ƀuăn gir run pơklaih mơng ƀun rin”.

Thun 2020, mrô sang anŏ ƀun rin amăng tơring glông Trà Bồng, tơring čar Quảng Ngãi dưm dưm rơbêh 42% truh rơnuč thun 2023 dŏ kơnong 29%. Yua kơ hơmâo rơnoh djru mơng jơlan hơdră tui hơnong pơkă dêh čar, truh ră anai, bruă bơwih ƀong huă mơng neh met wa pơplih yơh. Sit biă ñu, mơnuih djuai ania Cor ƀơi tơring glông Trà Bồng huăi đuăi hyu dŏ, ngă hmua tui hor dong tah, neh met wa arăng jao lŏn, jao glai kiăng bơwih ƀong huă, pơplih tơlơi hơdip mơda. Thun anai, tơring glông Trà Bồng gir run djru brơi 1.500 boh sang anŏ tui jơlan hơdră hơnong pơkă dêh čar pơklaih mơng ƀun rin hơđong kjăp. Ơi Nguyễn Văn Dũng, Khua git gai Ping gah tơring glông Trà Bồng brơi thâo: Ping gah tơring glông pơphun pel ĕp sit nik bruă pơhrŏ trun ƀun ron ƀơi 16 boh să amăng tơring glông, thâo rơđah tơlơi sit nik amăng plơi pla, hơdôm boh sang anŏ kiăng hơmâo hơdră git gai bruă pơhrŏ trun ƀun rin:

“Phrâo rơgao, Khua git gai Ping gah tơring glông ăt hơmâo nao pel ĕp ƀơi 16 boh să, ñu nao tơl hơdôm boh plơi pla sem lăng kơ bruă djru man pơdong sang, bruă bơwih ƀong huă hiưm pă hăng dŏ tơnap tap hơget thơ, kiăng lăng glăi tong ten hăng hơmâo tơlơi črâo ba tơl rĭm boh să, kiăng hơmâo hơdră phara brơi hơdôm anih. Ăt amăng sa boh să samơ̆ plơi pla hơmâo tơlơi gal phara mơn. Bruă git gai rơngiao kơ hơdră bruă hrŏm kiăng đing nao pơjeh phun pla, hlô rông, črâo brơi neh met wa ngă hiưm pă brơi kơ djơ̆ hăng tơlơi gal ƀơi rĭm boh plơi pla”./.