Khua ding jum wai lăng jơlan glông Nguyễn Văn Thắng lăi pơthâo klah čun kơ hră mơ-it mơng Kơnuk kơna kơ hơdră tuh pơ alin man pơkra jơlan rơdêh treng đuăi hmar Kơdư-Dơnung. Tui anun, jơlan rơdêh treng đuăi hmar pok blung mơng ƀôn prong Hà Nội hăng pơđut ƀơi ƀôn prong Hồ Chí Minh găn nao 20 boh tơring čar, ƀôn prong; glông rơbêh 1.540 km; abih tih prăk tuh pơ alin rơbêh 1 klăk 700 rơbâo klai prăk (giăm 67 klai đôlar Mi). Him lăng man pơkra mơng thun 2027; gir run pơgiong djop ară jơlan amăng thun 2035. Pơgôp hiăp kơ boh tơhnal anai, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Ding jum kơđi čar, khul git gai Ping gah đing nao biă mă jơlan rơdêh treng đuăi hmar Kơdư-Dơnung:

“Tơdah dưi man pơkra jơlan rơdêh treng đuăi hmar Kơdư-Dơnung anai hăng rơnoh prăk tuh pơ alin giăm 67 klai đôlar Mi, dêh čar ta amra hơmâo tơlơi gal kiăng pơđĭ kyar. Ƀu ngă mơtăm ôh mơ̆ kiăng pơgiong rơwang thun 2025, 2035. Tơdah dưi ngă tañ ăt klă mơn. Ră anai dêh čar tač rơngiao hơmâo hơdôm akŏ bruă pơprong hơdôm wŏt akŏ bruă anai mơ̆ arăng pok pơhai man pơkra aka truh 3 thun. Hăng ƀing ta anai, kâo pơmĭn, pơplih ngă hră pơ-ar kah hăng ta pô, ngă hră pơ-ar ăt yua ƀing ta mơn ba tơbiă. Yua anun ngă hiưm pă kiăng pơsir hĭ tơnap tap, gun găn”.

Tơdơi kơ hmư̆ lăi pơthâo tui sem lăng kah hăng hră lăi pơthâo mơng Kơnuk kơna, pơtong sit glăi boh tơhnal anai, Kơ-iăng Khua pơ ala mơnuih ƀôn sang dêh čar  Nguyễn Đức Hải brơi thâo, Jơnum min apăn bruă Khua pơ ala mơnuih ƀôn sang dêh čar tŭ ư mơ-it Khua pơ ala mơnuih ƀôn sang dêh čar sem lăng tơlơi pơtrun kơ hơdră tuh pơ alin man pơkra jơlan rơdêh treng đuăi hmar Kơdư-Dơnung amăng jơnum lok 8, Khua pơ ala mơnuih ƀôn sang dêh čar 15. Anai lĕ akŏ bruă prong aka hơmâo ôh hlâo anun ƀơi dêh čar ta. Yua anun, Jơnum min apăn bruă Khua pơ ala mơnuih ƀôn sang dêh čar rơkâo, Kơnuk kơna tŏ tui pel ĕp kiăng jŭ yap jang jai rơnoh prăk pơ alin hăng hơdră dưm dăp jang jai pơhlôm pơkrem, tŭ yua, pơhrua hơdôm jơlan gah pơhmutu hrŏm kiăng ngă rơđah bruă ruah glông jơlan mơng akŏ bruă anai.

Lơm pok pơhai akŏ bruă man pơkra jơlan rơdêh treng đuăi hmar Kơdư-Dơnung, kiăng sem lăng hmua ngă hmua pơdai, lŏn glai kiăng pơplih hăng hơdôm hơdră kiăng pơhlôm djơ̆ hơnong pơkă kơ bruă ngă hmua pơdai, mrô kyâo pơging amăng glai, jao brơi anom bruă bơdjơ̆ nao pơsit; lăng glăi hơdôm anŏ bơdjơ̆ nao mơng akŏ bruă anai hăng anih dŏ hơdip jum dar, kơsem min glăi bruă dưm graih, lăng glăi tong ten hơdôm anŏ bơdjơ̆ nao lơm pok pơhai ngă tui akŏ bruă anai kiăng hơmâo hơdră gir run truh thun 2035 amra pơgiong; răng kơđiăng kơ bruă pơhrui glăi lŏn mơnai, gum djru, man pơdong plơi pla phrâo; bruă ruah anom bruă tuh pơ alin, bruă mă yua boh thâo phrâo, mơnuih mă bruă, gơnam tam, bruă mă yua apui lơtrik lơm man pơkra hăng pok pơhai mă yua jơlan anai.

Kơ rơnoh prăk ngă tui akŏ bruă anai, abih tih prăk tuh pơ alin brơi akŏ bruă anai yôm phăn biă mă, wŏt prăk tuh pơ alin man pơkra laih dong prăk duh lơm mă yua. Yua anun, kiăng pơhlôm lăp djơ̆, pơhlôm mă yua prăk kak lăp djơ̆, tơlơi anai kiăng lăng glăi tong ten, lơm dêh čar ta glăk pok pơhai man pơkra lu akŏ bruă kiăng hloh, ječ ameč amăng bruă man pơkra jơlan glông, bruă mă yua apui lơtrik, kiăng hơmâo hơdră pơhlôm hlâo bưp tơlơi tap, sit biă ñu lĕ bĕ hĭ tơlơi ngă tơnap yua ƀu dưi mă yua yua kơƀah prăk, tơlơi tơnap dong lĕ ƀu pơhlôm ngăn rơnoh yua man ƀrô lơm hơdôm rơnoh prăk čan truh hrơi tla glăi hăng tla glăi lu hloh; tơlơi ngă tơnap dong lĕ gơnang nao hnưh mơng tač rơngiao, bơdjơ̆ nao tơlơi gơgrong mă yua prăk kak, ngăn drăp dêh čar.

Jơnum min apăn bruă Khua pơ ala mơnuih ƀôn sang dêh čar tŭ ư kiăng hơmâo hơdôm hơdră bruă yôm phara kiăng ngă tui akŏ bruă anai. Samơ̆, kiăng pơhlôm lăp djơ̆ tui tơlơi kiăng, rơkâo kơnuk kơna pel ĕp glăi 19 hơdră bruă lăi pơthâo tong ten ƀiă dong, lăng glăi anŏ bơdjơ̆ tong ten, ba nao amăng tơlơi pơtrun hơdôm hơdră bruă ngă tui kiăng hloh bơdjơ̆ nao sat, huăi bơdjơ̆ nao hơdră kah pơpha, gum hrŏm wai pơgang kơplah wah hơdôm anom bruă, hơdră pel ĕp, krăo lăng, anăm brơi mă yua khưi khai, ngă soh, đing nao hơdôm hơdră bruă, anom bruă pel ĕp, rơkâo anăm hơmâo tơlơi pơkă pơplih pơkra ƀudah lăng nao tong ten anŏ bơdjơ̆ nao lơm hơmâo tơlơi pơkă. /.